سۋرەتتى تۇسىرگەن – ن.بايبۋلين
سونداي-اق ساعادات نۇرماعامبەتوۆ ەسكەرتكىشىنىڭ اشىلۋ راسىمىنە قورعانىس ءمينيسترى رۋسلان جاقسىلىقوۆ, اقمولا وبلىسىنىڭ اكىمى مارات احمەتجانوۆ, باتىردىڭ قىزى ايسۇلۋ نۇرماعامبەتوۆا, قارۋلى كۇشتەردىڭ ارداگەرلەرى, حالىق قاھارمانى, وتستاۆكاداعى ارميا گەنەرالى مۇحتار التىنباەۆ, حالىق قاھارمانى, وتستاۆكاداعى گەنەرال-لەيتەنانت باقىتجان ەرتاەۆ, كەڭەس وداعىنىڭ باتىرى, حالىق قاھارمانى, وتستاۆكاداعى اۆياتسيا گەنەرال-مايورى توقتار اۋباكىروۆ, ەلورداداعى اسكەري كوللەدجدىڭ كۋرسانتتارى, اقمولا گارنيزونىنىڭ اسكەري قىزمەتشىلەرى, ساعادات نۇرماعامبەتوۆتىڭ جاقىندارى جانە قالا تۇرعىندارى قاتىستى.
ءىس-شاراعا قاتىسۋشىلار اسكەريلەر روتاسىنىڭ قۇرمەت قاراۋىلىنىڭ جانە قارۋلى كۇشتەردىڭ ۇلتتىق اسكەري-پاتريوتتىق ورتالىق وركەسترىنىڭ سۇيەمەلدەۋىمەن داڭقتى باتىردىڭ ەسكەرتكىشىنە گۇل شوعىن قويىپ, رۋحىنا تاعزىم ەتتى.
سالتاناتتى راسىمدە ماۋلەن اشىمباەۆ جۇرتشىلىققا مەملەكەت باسشىسى قاسىم-جومارت كەمەل ۇلى توقاەۆتىڭ قۇتتىقتاۋ حاتىن وقىپ بەردى. سونداي-اق ول ساعادات نۇرماعامبەتوۆتىڭ ونەگەلى ءومىرى وسكەلەڭ ۇرپاققا ءاردايىم ۇلگى ەكەنىن جانە باتىردىڭ ەسىمى ەل تاريحىنا ماڭگىگە جازىلعانىن اتاپ ءوتتى.
«قازاقستاننىڭ العاشقى ارميا گەنەرالى ساعادات نۇرماعامبەتوۆ بۇكىل سانالى عۇمىرىن اسكەري قىزمەت سالاسىنا ارنادى. مەملەكەتىمىزدىڭ تۇڭعىش قورعانىس ءمينيسترى رەتىندە ايبىندى ارميامىزدى قۇرۋعا جانە ونى نىعايتۋعا زور ۇلەس قوستى. ول ءوزىنىڭ بولمىس-بىتىمىمەن, ومىرلىك ۇستانىمىمەن جانە اقىل-پاراساتىمەن قازاق گەنەرالىنىڭ ناعىز ۇلگىسىنە اينالدى. باتىردىڭ ەسكەرتكىشى – حالىقتىڭ قاھارمان ۇلىنا ىستىق ىقىلاسىنىڭ, وتان قورعاۋعا ءومىرىن ارناعان بارشا ازاماتقا شىنايى قۇرمەتىنىڭ بەلگىسى. ساعادات نۇرماعامبەتوۆتىڭ «بەيبىت كۇندى قىراعى كۇزەتىڭدەر!» دەگەن ءسوزى بار. بۇل – تەك ساربازدارعا ەمەس, ءار وتانداسىمىزعا جۇكتەلگەن امانات. ونى ورىنداۋ – ءبارىمىزدىڭ پەرزەنتتىك پارىزىمىز», دەلىنگەن ەل پرەزيدەنتىنىڭ قۇتتىقتاۋ حاتىندا.
ءوز سوزىندە سەنات سپيكەرى گەنارالدىڭ ەرلىگى مەن ەلگە سىڭىرگەن ەسەلى ەڭبەگى ءاردايىم حالىقتىڭ جادىندا ساقتالاتىنىن ايتتى. سونداي-اق ول كورنەكتى مەملەكەت جانە قوعام قايراتكەرىنىڭ ءومىرى مەن سوڭىندا قالعان رۋحاني مۇراسىن دارىپتەۋ ماڭىزدى ءىس ەكەنىن, مۇنداي قادام ۇلتتىق بىرەگەيلىكتى نىعايتا تۇسەتىنىن تىلگە تيەك ەتتى.
باتىردىڭ قىزى ايسۇلۋ نۇرماعانمبەتوۆا اكەسى بۇكىل عۇمىرىن وتانعا قىزمەت ەتۋگە ارناعانىن ايتىپ, ەستەلىكتەرىمەن ءبولىستى. سونىمەن بىرگە ول يگىلىكتى ىسكە ۇيىتقى بولعان ازاماتتارعا جانە ەسكەرتكىشتىڭ اۆتورى ايدوس بۇركىتباەۆقا العىسىن ءبىلدىردى.
جاس ساربازدار داڭقتى قولباسشىعا قۇرمەت كورسەتىپ, اسكەري وركەستردىڭ سۇيەمەلدەۋىمەن ەسكەرتكىش الدىنان ساپ تۇزەپ ءوتتى.
ايتا كەتەيىك, ساعادات نۇرماعامبەتوۆ 1924 جىلعى 25 مامىردا اقمولا وبلىسىنىڭ ەڭبەك اۋلىندا دۇنيەگە كەلگەن. ول – اسكەري كوللەدجدىڭ كۋرسانتىنان ارميا گەنەرالىنا دەيىن, پۋلەمەتشىلەر ۆزۆودىنىڭ كومانديرىنەن تاۋەلسىز قازاقستاننىڭ قورعانىس مينيسترىنە دەيىنگى جولدى ءجۇرىپ وتكەن بىرەگەي تۇلعا. ساعادات قوجاحمەت ۇلىنىڭ ەرەن ەرلىگى مەن قايسارلىعى كسرو-نىڭ, قازاقستان رەسپۋبليكاسىنىڭ جانە تاعى باسقا مەملەكەتتەردىڭ 16 وردەنىمەن جانە 30 مەدالىمەن ماراپاتتالدى.
اقمولا وبلىسى,
اقكول اۋدانى
