قازاق ونەرىنىڭ كەشى رانەلاگ تەاترىندا انشلاگپەن ءوتىپ, كەلۋشىلەردىڭ بارلىعى انسامبل كونتسەرتىن كورۋگە جينالعان. اتالعان ۇجىم پاريج ساحناسىندا العاش رەت ونەر كورسەتىپ وتىر. ۇلتىمىزدىڭ ءتول مۋزىكاسى تالعامى بيىك فرانتسۋزدار ءۇشىن تاڭسىق ەمەس. دەسە دە, مۇنداي ەرەكشە ورىنداۋدى ەشبىر جەردەن ەستىمەگەندەرىن ايتادى. كۇمبىرلەگەن قوڭىر كۇيلەر زامانعا ساي جاڭاشا فورماتتا ورىندالدى. اسىرەسە كورەرمەننىڭ نازارىن ۇلتتىق اسپاپتار اۋداردى. بۇرىن-سوڭدى شەرتەر مەن داڭعىرانى ەستىپ-كورمەگەن كورەرمەن ۇزاق تىڭداپ, قىزىقتادى.
كەشتە «قازاقكونتسەرتتىڭ» سوليستەرى ايزات قارابەك پەن انەل ماراباەۆا ونەر كورسەتتى. شىعارماشىلىق ۇجىمنىڭ برەندىنە اينالعان «استانا سازى» ءانسامبلى پاريج تورىندە ۇلتتىق ونەردىڭ وزىق ۇلگىلەرى مەن ۇزدىك تۋىندىلارىن ۇسىندى.
ايتا كەتەيىك, اتالعان انسامبل قازاقتىڭ باي مۇراسىن ساقتاپ, قايتا جاڭعىرتىپ ءجۇر. ارتىستەر وسى كەشتە قۇرمانعازى, تاتتىمبەت كۇيلەرىمەن, جاياۋ مۇسا مەن حالىق اندەرىن قۇيقىلجىتا شىرقادى.
«ەۋروپالىقتاردى تاڭعالدىرۋ وڭاي ەمەس. سوندىقتان كونتسەرتتە بارىمىزدى سالدىق. پاريجگە جەتۋ ءۇشىن سەگىز ساعات جول ءجۇرىپ كەلدىك, قالجىراساق تا, بۇگىنگى كەش ءبارىن ۇمىتتىردى», دەيدى انسامبل مۇشەسى انەل ماراباەۆا.
سونداي-اق سادجانا مۇرزاليەۆا دا كورەرمەننىڭ ەرەكشە ىقىلاسىن تەبىرەنىسپەن جەتكىزدى. «كورەرمەندەر ءبىزدى قۇشاق جايا قارسى الدى, كونتسەرت سوڭىندا ۇزاق قول سوعىپ, جىبەرگىسى كەلمەدى, ال ارتىسكە ونەگە دەگەن قوشەمەت بولسا جەتكىلىكتى», دەيدى ول.
«استانا سازىنىڭ» پاريج ساحناسىنداعى العاشقى قادامى قۇتتى ءوتتى دەۋگە ابدەن بولادى. بۇل ءسوزىمىزدى پاريجدىك كورەرمەننىڭ قوشەمەتى دە اڭعارتىپ تۇرعانى انىق.
