سالىنعان ورنەكتەرى قازاقتىكى ەمەس, كاۆكازدىق زەرلەرمەن كومكەرىلگەن, ىلمەشەگى دە ەرەكشە, قولدان جاسالعان بۇيىم. بەلگىسىز زەرگەردىڭ ۇزاق ۋاقىت بويى كوز مايىن تاۋىسىپ جاساعان اسىل بۇيىمىن سولتۇستىك قازاقستان وبلىستىق مۇراجايىنان كوردىك. وسى مۇراجايدىڭ ءبولىم مەڭگەرۋشىسى عاليا جاقىپوۆا بۇل ەكسپوناتتىڭ تاريحى مەن جاسالۋى جونىندە ايتتى. ونى مۋزەيگە قوشان اقساقالدىڭ نەمەرەسى مۇرات اعامىز تاپسىرىپتى.
قوشان اقساقالدىڭ تاعى ءبىر بالاسى اكادەميك امانجول قوشانوۆتى (1934-2021) حالىق جاقسى بىلەدى. ول ەكونوميكا عىلىمدارىنىڭ دوكتورى, ۇلتتىق عىلىم اكادەمياسىنىڭ اكادەميگى اتانعان. مەملەكەتتىك سىيلىقتىڭ لاۋرەاتى, قازاقستانعا ەڭبەك سىڭىرگەن قايراتكەر. ۇزاق جىلدار بويى اكادەميانىڭ ەكونوميكا ينستيتۋتىن باسقارعان. نارىقتىق ەكونوميكانىڭ بىلگىرى رەتىندە تانىلىپ, 1995 جىلدان ەكونوميكا ينستيتۋتىنىڭ نارىقتىق ەكونوميكا تەوريالارى ءبولىمىن باسقارعان, ال 2010 جىلدان ءومىرىنىڭ سوڭىنا دەيىن الەۋمەتتىك باعدارلانعان ەكونوميكا تەوريالارى ورتالىعىنىڭ ديرەكتورى بولدى. ول 400-دەي ماقالانىڭ, 29 مونوگرافيانىڭ اۆتورى.
ال اكادەميكتىڭ اكەسى قوشان جانتىلەۋوۆ اقساقالدىڭ ءوزى شەجىرەشى, تەرەڭ بىلىكتى اڭگىمەشى بولعان. ول تاريحتى, اقىندار مەن جىراۋلاردىڭ شىعارمالارىن تەگىس ءبىلىپ, كەزىندە حالىق مۇرالارىن جيناعان جازۋشى, عالىم مۇحتار ماعاۋينگە اكەسىنىڭ اعاسى شال اقىن تۋرالى مول ماعلۇمات بەرگەن. مۇحتار اعامىز 1964 جىلى قوشان اقساقالدىڭ ۇيىندە قونا جاتىپ, شال اقىن تۋرالى كوپ مالىمەت جازىپ العان.
مىنا بەلبەۋدى اقساقالعا كاۆكازدىق زەرگەردىڭ ءوزى سىيعا تارتىپتى. تۇرمىستا ءتوزىمدى ءارى ءساندى بەلبەۋدى اقساقال 50-جىلداردىڭ ورتاسىنان ءومىرىنىڭ سوڭىنا دەيىن تاستاماي, بۋىنىپ جۇرگەن. اكەسىنەن قالعان اسىل كوزدى مۇرات قوشانوۆ ۇزاق جىلدار بويى ساقتاپ, اقىرى مۋزەيگە تاپسىرعان. ءسويتىپ, ول قازىر كوڭىلگە ءتۇرلى وي سالار وتكەن تاريحىمىزدىڭ ءبىر كۇندەرىن ەسكە سالىپ, مۋزەي كورەرمەندەرىنىڭ كوزايىمىنا اينالىپ تۇر.
ستاليندىك قۋعىن-سۇرگىن جىلدارىندا قاپ تاۋىنىڭ تۇرعىندارىن قازاقستانعا كوشىردى ەمەس پە؟ اسىرەسە 1944 جىلى قاپ تاۋى ءوڭىرى حالقىن تۇتاستاي قازاقستان مەن ورتا ازياعا جەر اۋداردى. سوندا كەلگەن كاۆكازدىق شەبەردىڭ ءبىرى قوشان اقساقالدان ءبىر قامقورلىق كورىپ, ءوزىنىڭ قولىنداعى اسىل دۇنيەسىن سىيعا تارتىپ كەتكەن بولۋى كەرەك. مۋزەي قىزمەتكەرلەرى ونىڭ تاريحىن ءالى دە زەرتتەپ, انىقتاي تۇسەمىز دەپ وتىر.
سولتۇستىك قازاقستان وبلىسى
