بۇعان دەيىن ايتقانىمىزداي, سولنەچنىي-2 شاعىن اۋدانىندا 500 ءۇيدىڭ قۇرىلىسى باستالىپ كەتتى. العاشقى 100 ءۇيدىڭ ىشكى جۇمىستارى عانا قالدى دەپ ايتۋعا بولادى. مامىردىڭ 21-ىنە دەيىن 6 مىڭ وتباسى ءبىر رەتتىك 100 اەك كولەمىندەگى وتەماقىنى الدى. بۇعان 2,2 ملرد تەڭگە قاراجات جۇمسالدى.
كەيبىر شىدامسىز تۇرعىندار قولىنا ساراپتاما قۇجاتتارى نەگە بەرىلمەي جاتىر دەپ مازاسىزدانىپ وتىر. بۇل سۇراقتارعا پەتروپاۆل قالاسىنىڭ اكىمى سەرىك مۇحامەديەۆ: «قۇجاتتاردى بەرۋدى كەشىكتىرىپ جاتقان سەبەبىمىز مامانداردىڭ كەسىرىنەن بولىپ تۇر. ءبىز ولارعا الدىمەن ۇيلەردى ساراپتاپ شىعىڭىزدار, قۇجاتتاردى سوسىن تولتىراسىزدار دەگەن تاپسىرما بەرگەن ەدىك. سونى ورىنداماق بولعان ماماندار اكتىلەردى جاساۋعا ەندى عانا كىرىسىپ جاتىر. مامىردىڭ 23-ىنە دەيىن بارلىعىڭىزعا قۇجاتتاردى تاپسىرامىز», دەپ ءوزىنىڭ Instagram-داعى پاراقشاسىندا جاۋاپ بەردى.
سۋ استىندا قالعان شاعىن اۋدانداردىڭ ءبىرى – زارەچنىي كەنتى. بۇل نەگىزىنەن باس ەركىنەن ايىرىلعان قاماۋداعى جانداردىڭ ەرلەر مەن ايەلدەر زونالارىنا ارنالعان كەنت ەدى. تاسقىن سۋ كەزىندە قاماۋداعى جاندار دا تولىق ەۆاكۋاتسيالانعان. مۇنداعى تۇرعىنداردىڭ كوبى – وسى ورىندا كۇزەتشى, باقىلاۋشى, تاربيەشى قىزمەتىندەگى ادامدار. ولاردىڭ ءبىرازى باراقتاردا تۇراتىن. زارەچنىي-2-دەگى سونداي باراقتىڭ ءبىرى 1962 جىلى سالىنعان ەكەن. ابدەن توزىعى جەتكەن وسى ءۇيدىڭ تۇرعىندارى قازىر جاقسى ۇيلەرگە قولىمىز جەتىپ قالار ما ەكەن دەپ الاڭ كوڭىلدە ءجۇر.
ء«بىزدىڭ ءۇيدى ساراپتاۋشىلار ءسۇرۋ كەرەك دەگەن شەشىم قابىلدار دەگەن ۇمىتتەمىز. ءوزى دە ابدەن ەسكىرىپ, قابىرعالارى ءشىرىپ, كوگەرە باستاعان ەدى. قازىر قالادا پاتەر جالداپ تۇرىپ جاتىرمىز. ماسەلەمىز تەزىرەك شەشىلەر دەگەن ويدامىز», دەيدى تۇرعىن جۇلدىز ساپيەۆا.
قازىر مۇندا مەحبريگادالار جۇمىس ىستەپ, قوقىستان تازارتۋ, سىرتقا شىعارۋ جۇمىستارىمەن اينالىسىپ جاتىر. وزدەرى وبلىستىڭ مامليۋت اۋدانىنان جاساقتالعان 5 بريگادادان تۇراتىن 35 جىگىت ەكەن. قاراماعىنداعى 8 تەحنيكامەن ءالى دە كەپپەگەن, تۇرىپ قالعان قاق سۋلاردى سورىپ جاتىر.
ء«اربىر بورتتى ەسەپتەيتىن بولساق, بۇگىنگە دەيىن 110 توننانىڭ قوقىسىن شىعاردىق. بىراق ءالى دە بىتەتىن ەمەس. بىزگە 79 ءۇيدى تازالاۋ تاپسىرىلعان, سولاردىڭ 78-ءىنىڭ ماڭىن تازارتتىق. بىرەۋى ءالى سۋدا تۇر. ماڭايى تازارتىلعان ۇيلەردى ساراپتاۋ اياقتالۋعا جاقىن. تەك 5 ءۇي قالدى», دەيدى مامليۋت اۋدانى اكىمىنىڭ ورىنباسارى تەمىرلان ماماشاريپوۆ.
قالا اكىمى ءۇيىن سۋ باسقان تۇرعىندارعا تىكەلەي ەفير ارقىلى شىعىپ تا كوپتەگەن سۇراققا جاۋاپ بەردى. سونىڭ ىشىندە ءۇيدى قالپىنا كەلتىرۋگە كەتەتىن شىعىنداردى انىقتايتىن سمەتا قالاي جاسالاتىنى سۇرالدى.
«بۇل ءۇشىن اقاۋلىق اكت جاسالادى, وندا دەمونتاج جانە مونتاجداۋ جۇمىستارى كورسەتىلەدى. بىراق ءبىز كەرەمەت پاركەت توسەپ بەرەدى دەپ ويلاماڭىزدار. شىعىن سمەتاسىنىڭ كولەمى ءارتۇرلى. بۇگىنگە دەيىن 50 ءۇيدىڭ تۇرعىندارى جوندەۋ جۇمىستارىن جاساتۋعا كەلىستى. ولاردىڭ شىعىندارى 3 ملن-نان 14 ملن تەڭگە ارالىعىندا بەلگىلەندى. مۇنداي ايىرماشىلىق بۇزىلعان ۇيلەردىڭ قانداي ماتەريالداردان تۇرعىزىلعانىنا, قۇرىلىس ساپاسىنا بايلانىستى», دەدى س.مۇحامەديەۆ.
ءجيى قويىلعان سۇراقتاردىڭ اراسىندا شىعىن سمەتاسى جاسالعان سوڭ, وتەماقى قاشان تولەيتىنى تۋرالى بولدى. بۇعان جاۋاپ بەرگەن اكىم وسى اپتانىڭ ىشىندە كوميسسياعا العاشقى قۇجاتتار وتكىزىلەتىنىن ايتتى. كوميسسيانىڭ قۇرامىنا قوعامدىق ۇيىمداردان وكىلدەر ەنگىزىلگەن. ولار سمەتانى قولداسا, اقشا تولەۋ ءۇشىن قورعا جولدانادى ەكەن.
ازىرگە 500-دەن اسا ءۇي قالپىنا كەلتىرىلمەيتىنىن جوعارىدا ايتتىق. سونشا جاڭا ۇيلەر سولنەچنىي-2 شاعىن اۋدانىندا سالىنىپ جاتىر. ونىڭ ۇستىنە كوپقاباتتى ەسكى ۇيلەردەن پاتەرلەر ساتىپ اپەرىلمەك. ءسويتىپ, ۇيىنەن ايىرىلعانداردىڭ ءبارى دە باسپانامەن قامتاماسىز ەتىلمەك. قۇرىلىسى بيىل بىتەتىن جاڭا ۇيلەردىڭ بارلىعى پايدالانۋعا تازا كۇيىندە بەرىلەدى. قازىر سولنەچنىي-2 شاعىن اۋدانىنىڭ ءوزى دە جوندەلىپ, ەكى-ءۇش كوشەگە اسفالت توسەلىپ جاتىر.
سولتۇستىك قازاقستان وبلىسى
