اتىراۋ وبلىسىنىڭ توتەنشە جاعدايلار جونىندەگى جەدەل شتاب مالىمەتىنشە تاسقىن سالدارىنان زارداپ شەككەن ۇيلەر مامانداردىڭ باعالاۋىنان ءوتتى.
«5 ساۋىردە مەنىڭ اۋلام سۋ استىندا قالىپ, ءۇيىم قۇلادى. ءۇيىم سامان تاستان سالىنعان بولاتىن. ارنايى كوميسسيا ونى اپاتتى دەپ تانىدى. بۇگىن مۇلكىمدى باعالاۋ ناتيجەسىن الدىم, ۇسىنىلعان وتەماقى كولەمى مەن ءۇشىن جەتكىلىكتى. كومەك پەن قولداۋ ءۇشىن مەملەكەتكە العىسىمدى بىلدىرەمىن. وسىنداي قيىن ساتتە جالعىز قالعان جوقپىز», دەدى «4 اۋىل» شاعىن اۋدانىنىڭ تۇرعىنى گۇلفايرۋز ابيروۆا.
كەيبىر تۇرعىندار ءوز ۇيلەرىن جوندەۋگە كىرىسىپ كەتكەن.
«ۇيىمىزگە دەزينفەكتسيا جۇرگىزدى. باعالاۋ كوميسسياسى كەلىپ, تەحنيكالىق ساراپتاما جاسادى. 15 مامىردا ماعان باعالاۋ ناتيجەلەرىن اكەلىپ تانىستىردى, تانىسىپ شىقتىم. 17 مامىر كۇنى كەشكىلىك شوتىما قاراجات ءتۇستى. مەن ءۇشىن وتەماقى كولەمى جەتكىلىكتى», دەدى ايگۇل يحسانوۆا.
قازىرگى ۋاقىتتا قۇلسارىدا №20 مەكتەپ بازاسىندا ۇيلەرى اپاتتى دەپ تانىلعان تۇرعىندارعا اقپاراتتاندىرۋ, ءتۇسىندىرۋ جۇمىستارى جۇرگىزىلىپ جاتىر.
تاسقىننان زارداپ شەككەندەردەن كۇنى بۇگىنگە دەيىن وتەماقى تولەۋ ءتارتىبى بويىنشا بارلىعى 800-دەن استام ادام اقپارات الدى. تەلەفون ارقىلى 200 تۇرعىنعا تۇسىنىك جۇمىستارى جۇرگىزىلدى.
