وبلىس اكىمى قۇمار اقساقالوۆ جاڭا قونىس يەلەرىمەن كەزدەستى.
«مەملەكەت باسشىسىنىڭ تاپسىرماسى بويىنشا بارلىق زارداپ شەككەندەرگە جان – جاقتى كومەك كورسەتىلەدى», دەدى وبلىس اكىمى قۇمار اقساقالوۆ. – « مەملەكەت بار جاعدايدى جاساپ, شىعىنداردى وتەۋ, الەۋمەتتىك تولەم جاساۋ, بۇزىلعان ۇيلەردى قالپىنا كەلتىرۋ, جاڭاسىن تۇرعىزۋ ىسپەتتى جۇمىستاردى اتقاراتىن بولادى.
بۇدان باسقا, قوستاناي اۋدانىنىڭ زارداپ شەككەن تۇرعىندارىنىڭ زاقىمدانعان م ۇلىك شىعىنى وتەلىپ, الەۋمەتتىك كومەك تۇرىندەگى وتەماقى بەرىلدى. تولەمدەردىڭ جالپى سوماسى 191,3 ملن تەڭگە.
قالپىنا كەلتىرۋگە جاتاتىن بارلىق ۇيلەردە جوندەۋ جۇمىستارى ءجۇرىپ جاتىر, جوندەۋ جۇمىستارى وسى جىلدىڭ 15 ماۋسىمىنا دەيىن اياقتالۋى ءتيىس.
بۇدان باسقا, «قازاقستان حالقىنا» قوعامدىق قورىنىڭ قاراجاتى ەسەبىنەن وبلىستىڭ قوستاناي, امانگەلدى جانە جانگەلدين اۋداندارىندا 88 جەكە تۇرعىن ءۇيدىڭ قۇرىلىسى باستالدى.
BAZIS-A كومپانياسى ارقالىق قالاسىندا 50 پاتەرلى تۇرعىن ءۇيدىڭ قۇرىلىسىن باستادى. پاتەرلەر ارقالىق قالاسىنىڭ, امانگەلدى جانە جانگەلدين اۋداندارىنىڭ زارداپ شەككەن تۇرعىندارىنا بەرىلەدى.
سونداي-اق زارداپ شەككەن تۇرعىندار ءۇشىن قوستاناي قالاسىنىڭ قوناي شاعىن اۋدانىندا 15 ءۇي سالۋ جوسپارلانعان, ونىڭ 8-ءى باستالدى.
مەملەكەت شىعىندى وتەۋدىڭ ەكى ءادىسىن: جاڭا ءۇي سالۋ نەمەسە نارىقتا دايىن پاتەر ساتىپ الۋدى ۇسىنادى.
زالالدى باعالاۋ جونىندەگى كوميسسيانىڭ مالىمەتىنشە, قوستاناي وبلىسىندا 475 ءۇي قالپىنا كەلتىرۋگە جاتپايدى. قازىرگى ۋاقىتتا 208 تۇرعىن جاڭا باسپانامەن قامتاماسىز ەتىلگەن, بۇل زارداپ شەككەندەردىڭ 43,7% قۇرايدى. پاتەرلەر تۇرعىنداردىڭ مەنشىگىنە بەرىلەدى.
