اۋىل ورتالىعى ۋاقىت تالابىنا ساي دامىپ كەلەدى. مىسالعا ايتساق, بىرەر جىل بۇرىن اشىلعان «جاستار» ستاديونىندا سەرۋەندەيتىندەر قاتارى كوبەيگەن. بيىلعى جىلى پايدالانۋعا بەرىلگەن «جاستار رەسۋرستىق ورتالىعى» عيماراتى دا اۋىلعا اجار قوسۋمەن قاتار, جاستاردىڭ ەڭسەسىن تىكتەپ, ەسەلى ەڭبەك ەتۋىنە وڭ اسەرىن تيگىزگەن. اۋىلدىڭ گۇلدەپ, كوركەيە تۇسكەنىنە تۇرعىندار دا ءدان ريزا.
«جوعارى وقۋ ورنىن ءبىتىرىپ, اۋىلىما كەلىپ ەڭبەككە ارالاسۋدامىن. ءسان-سالتاناتى جاراسقان «جاستار رەسۋرستىق ورتالىعىندا» اۋدان جاستارى جۇمىسقا ورنالاسۋ, كاسىپ باستاۋ, مەملەكەتتىك باعدارلامالار بويىنشا دا كەڭەستەر الادى. كورمەلەر مەن شەبەرلىك ساباقتارى, كەزدەسۋلەر ۇيىمداستىرىلىپ, تانىمدىق كوكجيەكتەرىن كەڭەيتىپ كەلەدى», دەيدى ورتالىقتىڭ جاس مامانى ءادىل تەلمان.
اۋدان ورتالىعىندا ىرگەتاسى كوپ جىلدار بۇرىن قالانعان قوسقاباتتى تۇرعىن ۇيلەر بار. بيىلعى جىلى كوپقاباتتى 5 تۇرعىن ءۇيدىڭ اعىمداعى جوندەۋ جۇمىستارىنا 135 ملن تەڭگە قاراجات قارالىپ, مەملەكەتتىك ساتىپ الۋدىڭ اشىق كونكۋرسى جاريالانىپ, جەڭىمپاز كومپانيا جوندەۋ جۇمىستارىن باستاعان.
سونىمەن قاتار اۋىل ىرگەسىندەگى پوليگوننىڭ قورشاۋىنا 60 ملن تەڭگە قاراجات بولىنگەنىن جانە كوكتەمگى اباتتاندىرۋ جۇمىستارىنىڭ دا ۇيىمشىلدىقپەن جۇزەگە اسىرىلعانىن اتاعان كەگەن اۋىلدىق وكرۋگىنىڭ اكىمى رۋسلان كەڭەسجان ۇلى اۋىلدا مال باسىنىڭ ارتىپ كەلە جاتقانىن ايتتى.
كەگەن اۋىلىندا كاسىپكەرلىك كەڭەيىپ, جاڭا جۇمىس ورىندارى اشىلعان. «اۋىل اماناتى» باعدارلاماسىنا ءوتىنىم بەرگەن ازاماتتار الداعى ۋاقىتتا جيھاز جاساۋ ورتالىعىن, جىلىجاي ءوندىرىسىن ىسكە قوسۋعا نيەتتى.
ال 80-ءنىڭ سەڭگىرىنە شىققان ءابىلجان ءارىشوۆ اقساقال جەتەكشىلىك ەتەتىن «ەرسىن» شارۋا قوجالىعى 121 ملن تەڭگەگە ليزينگكە 1357 باس «ەدىلباي» قويىن الىپ, وسىرۋدە. قوي تولدەتۋ ناۋقانىن ءساتتى اياقتاعان.
بيىل «اۋىل اماناتى» باعدارلاماسى بويىنشا 2,5 پايىزدىق نەسيە الىپ, جۇمىس جۇرگىزۋ ءۇشىن اۋىلدىق وكرۋگ اكىمىنىڭ اپپاراتى ماماندارىنىڭ كومەگىمەن 4 كووپەراتيۆتىڭ نەسيە قۇجاتتامالارى دايىندالىپ, «قوناەۆ» الەۋمەتتىك-كاسىپكەرلىك كورپوراتسياسىنا جولدانعان. ناتيجەسىندە 3 كووپەراتيۆكە 86 ملن 500 مىڭ تەڭگە نەسيە ماقۇلدانعان.
سونىڭ ءبىرى «كەگەن اگروماش» اۋىلشارۋاشىلىق وندىرىستىك كووپەراتيۆى قۋاتى جوعارى 2 «YUTO» تراكتورىن الدى.
«كوكتەمگى, كۇزگى دالا جۇمىستارىندا تەحنيكا جەتىسپەۋشىلىگىن ايقىن سەزىنەمىز. سول سەبەپتى, «اۋىل اماناتى» باعدارلاماسىمەن 27 600 000 تەڭگەگە 2 تراكتوردى جەر جىرتۋ, وڭدەۋ, ءشوپ شابۋ, تىرمالاۋ اگرەگاتتارىمەن الىپ, بانك قاراجاتى ەسەبىنەن اۋىلىمىزعا ينۆەستيتسيا سالىپ وتىرمىز. دەسە دە, تەحنيكا الىنعانمەن يگەرەتىن جەر تاپشىلىعىن جاسىرعىمىز جوق. ەگەر شابىندىق پەن ەگىستىك جەردىڭ كولەمى ۇلعايسا بۇل تەحنيكانىڭ قىرۋار پايداسىن كورەتىن بولامىز», دەيدى كووپەراتيۆ باسشىسى سىرىم ساعىنبەكوۆ.
كەگەن اۋىلدىق وكرۋگىندە كوكتەمگى دالا جۇمىستارى بويىنشا جوسپار 635 گەكتار جازدىق ارپا مەن بيدايدى قۇرايدى. بۇگىنگى كۇنگە ارپا-بيداي ەگۋ ءۇشىن 658 گەكتار جەر جىرتىلىپ, ياعني جوسپار 104 پايىزعا ورىندالىپ, ءداندى-داقىلدار سەبىلۋدە.
الماتى وبلىسى.
