زەرتحانانىڭ اشىلۋ راسىمىنە قحر-دىڭ قازاقستانداعى توتەنشە جانە وكىلەتتى ەلشىسى چجان سياو, ءال-فارابي اتىنداعى قازۇۋ-دىڭ باسقارما توراعاسى-رەكتور جانسەيىت تۇيمەباەۆ, قحر مەملەكەتتىك كەڭەسىنىڭ كەڭسە باسشىسىنىڭ ورىنباسارى گو ۆەي, قحر ۇكىمەتىنىڭ ەۋرازيا ىستەرى جونىندەگى ارنايى وكىلى لي حۋەي, قحر اۋىل شارۋاشىلىعى ءمينيسترىنىڭ ورىنباسارى چجان سينۆان, قحر كوممەرتسيا ءمينيسترىنىڭ ورىنباسارى لي فەي, وقۋ ورداسىنىڭ عالىمدارى مەن وقىتۋشى-پروفەسسورلار قۇرامى, ستۋدەنتتەر قاتىستى.
جاڭا عىلىمي زەرتحانا تەلەكوممۋنيكاتسيالىق بايلانىس جۇيەلەرىنىڭ ماماندارىن دايارلاۋعا, جاڭا تەحنولوگيالاردى مەڭگەرىپ, ينتەرنەت جىلدامدىعىن جەتىلدىرۋگە, 6G جەلىسىن ەنگىزۋگە مۇمكىندىك بەرەدى. بولاشاقتا ورتالىق زەرتتەۋ جۇمىستارىن باقىلاپ قانا قويماي, جوعارى تەحنولوگيالىق بايلانىس قۇرىلعىلارىنىڭ وندىرىسىنە, ولاردى قۇراستىرۋعا جانە ىسكە قوسۋعا دا قاتىسا الاتىن الاڭعا اينالادى.
«زەرتحانانىڭ قازۇۋ بازاسىندا اشىلۋى قازاقستان مەن قىتاي تاراپى ءۇشىن ايتۋلى وقيعا دەپ سانايمىن. قازىرگى تاڭدا كوممۋنيكاتسيا سالاسى الەم بويىنشا قارقىندى دامۋ ۇستىندە. بۇل جاڭاشا وزگەرىستەردەن قالىس قالۋعا بولمايدى. سوندىقتان اتالعان سالادا مامانداردى دايارلاۋعا, ينتەرنەت جەلىسىن دامىتۋدا وسىنداي ورتالىقتاردىڭ كوپ بولۋى ماڭىزدى», دەدى قحر مەملەكەتتىك كەڭەسىنىڭ ۆيتسە-پرەمەرى ليۋ گوچجۋن.
«5G/5.5G كوممۋنيكاتسيالىق تەحنولوگيالار» زەرتحاناسى قىتايدىڭ قازاقستاندا اشىلعان فيليالىندا جۇزەگە اسىپ وتىر. قىتاي – ەلىمىز ءۇشىن ءبىزدىڭ سەنىمدى سەرىكتەستەرىمىزدىڭ ءبىرى. وسى تۇرعىدا قازۇۋ قىتاي جوو-لارىمەن عىلىم جانە جوعارى ءبىلىم بويىنشا تىعىز قارىم-قاتىناستا. بۇگىنگى اشىلعان عىلىمي زەرتحانا ەكى مەملەكەتتىڭ جوعارى وقۋ ورىندارى ءۇشىن الداعى ۋاقىتتا بىرلەسىپ جۇمىس ىستەۋگە جانە ىنتىماقتاستىقتى ودان ءارى ارتتىرۋعا مول سەپتىگىن تيگىزەدى دەپ سانايمىن», دەدى رەكتور.
ءال-فارابي اتىنداعى قازۇۋ مەن قحر سولتۇستىك-باتىس پوليتەحنيكالىق ۋنيۆەرسيتەتى بىرلەسىپ اشقان زەرتحاناعا Huawei كومپانياسى دەمەۋشىلىك كورسەتتى. زەرتحانا قازۇۋ بازاسىنداعى سولتۇستىك-باتىس پوليتەحنيكالىق ۋنيۆەرسيتەتىنىڭ فيليالىندا ورنالاسقان.
الماتى
