فوتو: aikyn.kz
زاڭداعى نەگىزگى جاڭالىقتىڭ ءبىرى – تەرروريستىك-ەكسترەميستىك ۇيىمدارعا نەمەسە كامەلەتكە جاسى تولماعان ادامدارعا قارسى جىنىستىق سيپاتتاعى قىلمىس جاساعان ازاماتتاردىڭ نەمەسە قىلمىس الەمى «سەركەلەرىنىڭ», قىلمىستىق توپتاردىڭ مۇشەلەرىنىڭ شەكارادان كىرۋىنە تىيىم سالىنادى.
جالپى, ءبىز ءبىر نارسەنى ەسكەرۋىمىز كەرەك. قازىر الەمدەگى گەوساياسي احۋال كۇردەلەنىپ, كوپ ەل تۇراقسىز, الماعايىپ كەزەڭدى باستان وتكەرىپ جاتىر. وسى تۇستا مەملەكەتتىڭ قاۋىپسىزدىگى ەڭ باستى نازاردا تۇر. ەلگە كەلىپ جاتقان ازاماتتاردىڭ تەگىن, وسىعان دەيىنگى ومىرىندەگى ۇستانىمىن زەرتتەۋ-زەردەلەۋ – وتە ماڭىزدى. جالعان قۇجات, جالعان كۋالىكتەرمەن قانداس قۇقىعىنا يە بولعان فاكتىلەر بار. وسىعان وراي ەلگە كەلۋشىلەردىڭ گەوگرافياسىنىڭ كەڭەيۋىنە بايلانىستى سول ماسەلەنى كەڭىرەك ساراپتاپ, زەردەلەۋ قاجەت. ايتالىق, مەملەكەتىمىزگە كەلەتىن ازاماتتاردىڭ تىلىنە, باسقا دا ەرەكشەلىكتەرىنە قاراپ, ولاردى اجىراتۋ مۇكىن ەمەس بولاتىن جاعدايلار كەزدەسەدى. سونداي جاعدايدا ەندىگى جەردە ءتىپتى گەنەتيكالىق ساراپتاما جاساۋعا دەيىن مۇمكىندىك بار.
بۇل زاڭ – ۋاقتىلى قابىلدانعان ءارى قاجەتتى نورمالار قامتىلعان قۇجات. الەمدەگى تەرروريستىك قاتەردىڭ, قاۋىپتىڭ قانشالىقتى اۋقىمدى ەكەنىن كەيىنگى ۋاقىتتاعى وقيعالار ايقىنداپ, دالەلدەپ وتىر. سوندىقتان بۇل زاڭ ۇلتتىق قاۋىپسىزدىك تۇرعىسىنان بارىنشا جەتىلدىرىلدى. زاڭنىڭ باستى ەرەكشەلىگى, باسىمدىعى دا – وسىندا.
بۇدان بولەك, ىشكى قونىستانۋشىلارعا, جۇمىس كۇشى كوپ, حالىق تىعىز قونىستانعان وڭتۇستىك وڭىرلەردەن سولتۇستىككە قونىس تەپكەن, شەتەلدەن كوشىپ كەلگەن قانداس باۋىرلارىمىزعا دا كوپ مۇمكىندىك قاراستىرىلعان. اتاپ ايتساق, شەتەلدەن كوشىپ كەلگەن قانداستار ۇكىمەت بەلگىلەگەن وڭىرلەرگە قونىستانعان جاعدايدا ولارعا اۋىل شارۋاشىلىعى ماقساتىنداعى جەر تەلىمدەرى كەلەسى بىرەۋگە پايدالانۋعا بەرۋ قۇقىعىنسىز, جالداۋ قۇقىعىمەن بەس جىل مەرزىمگە كونكۋرسسىز نەگىزدە بەرىلەدى. بۇل – ۇلكەن جەڭىلدىك, مەملەكەتتىڭ قانداستارعا جاساپ وتىرعان جاقسىلىعى, كورسەتىپ وتىرعان قامقورلىعى. كونكۋرسسىز جەر بەرۋ – قازىرگى تاڭدا ەلىمىزدەگى مۇمكىن ەمەس, كۇرمەۋى قيىن ماسەلە. سوندىقتان زاڭدا اۋىل شارۋاشىلىعىمەن اينالىسامىن دەگەن قانداستارعا ءتيىمدى جەڭىلدىك قاراستىرىلىپ, ۇلكەن موتيۆاتسيا بەرىلەدى. جۇمىس كۇشى جەتپەيتىن شەكارالاس سولتۇستىك وڭىرلەرگە بۇل وتە قاجەتتى شەشىم بولدى.
ۇيىمداسقان قىلمىستىق توپتاردىڭ «سەركەلەرى», بەلگىلى ءبىر قىلمىستىق اتاۋلارعا يە بولعان ازاماتتاردىڭ بازاسى, اسىرەسە تمد ەلدەرى اۋماعىندا قالىپتاسقان. بۇل ءىستى ۇلتتىق قاۋىپسىزدىك كوميتەتىنىڭ شەكارا قىزمەتى ايقىنداپ, اينالىسادى. ولار قىزمەتتى بىرنەشە مەملەكەتپەن بايلانىستى دەرەكتەر بازاسى ارقىلى جۇرگىزەدى. ياعني شەكارادان وتۋگە قۇقىعى جوق تۇلعالاردىڭ ەلگە كىرۋىن تەجەپ, تىيىم سالادى. جالپى, مۇنداي جۇيە بىزدە عانا ەمەس, بىرقاتار كورشىلەس ەلدە بار تاجىريبە.
جارقىنبەك امانتاي ۇلى,
ءماجىلىس دەپۋتاتى
