بالا قۇقىن قورعايتىن شەشىم

قۇقىق قورعاۋشى رەتىندە كامەلەت­كە تولماعانداردىڭ جىنىستىق تيىسپەۋ­شىلىگىنە قارسى قىلمىستار جاساعاندارعا ەلىمىزدىڭ ازاماتتىعى بەرىلمەيتىنى, سونداي-اق ونداي ادامداردىڭ ەلگە كىرۋىنە تىيىم سالىناتىنى تۋرالى شەشىمدى وتە جوعارى باعالايمىن.

جالپى, كەيىنگى جىلدارى مەملە­كەت باسشىسى قاسىم-جومارت توقاەۆتىڭ باستاماسىمەن ەلىمىزدە وتباسىلىق زورلىق-زومبىلىقتىڭ الدىن الۋ, سونىڭ ىشىندە ايەل مەن بالا قۇقىن قورعاۋ, سونداي-اق كامەلەتكە تولماعان جاسوسپىرىمدەرگە جىنىستىق قولسۇعۋشىلىقتىڭ جولىن كەسۋگە باعىتتالعان ىرگەلى قادامدار جاسالىپ جاتىر. ماسەلەن, جۋىردا پرەزيدەنت قولدانىستاعى زاڭناماعا ايەل قۇقىعى مەن بالا قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭدارعا قول قويعانى بەلگىلى. سونىڭ ىشىندەگى ەڭ باستى جاڭالىق – جاسوسپىرىمدەرگە قارسى جىنىستىق زورلىق-زومبىلىق كورسەتىلەتىن بولسا, بىردەن ءومىر بويىنا باس بوستاندىعىنان ايىرۋ جازاسى تاعايىندالادى. بۇعان دەيىن مۇنداي جازالار قولدانىلا بەرمەيتىن. مۇنى بالا قۇقىن قورعاۋ سالاسىنداعى ءىرى جەڭىس دەپ باعالادىق.

بۇگىنگى قابىلدانىپ وتىرعان زاڭنىڭ دا الەۋەتى زور. وكىنىشكە قاراي, ءوز ەلىمىزدە دە پەدوفيلدەر بار. ال ەگەر سىرتتان كەلىپ جات­قان ادامداردىڭ اراسىندا بۇ­رىن بالالارعا جىنىستىق تۇرعىدا تيىس­كەندەر بولسا, ولاردى ىشكە كىرگىزۋ ونسىز دا كۇردەلەنىپ تۇرعان جاعدايى­مىزدى قيىنداتىپ جىبەرەرى حاق. پەدوفيليا قىلمىسىنا بارۋ – بالانى ولتىرگەنمەن تەڭ. ولاردىڭ بولاشاعىنا بالتا شابۋ. ونداي بالانى قايتا قالپىنا كەلتىرۋ, پسيحيكاسىن دۇرىستاۋ – قيىننىڭ قيىنى. سوندىقتان بۇگىنگى تاڭداعى ەڭ باستى مىندەتىمىز – بالالاردىڭ قاۋىپسىزدىگىن قامتاماسىز ەتۋ. بۇل – كۇن تارتىبىن­دەگى كۇيىپ تۇرعان ماسەلە. ولاردىڭ قاۋىپسىزدىگىن ساقتاۋ مەن قۇقىن قورعاۋ ماقساتىندا ءبىز بۇنىمەن دە شەكتەلىپ قالماۋىمىز كەرەك. پرەزيدەنتتىڭ وسى پروبلەماعا ايرىقشا نازار اۋدارىپ وتىرعانى قۋانتادى.

ايمان وماروۆا,

قۇقىق قورعاۋشى