تالعار اۋداندىق مادەنيەت ۇيىندە ايماقتىق تەحنيكالىق جانە كاسىپتىك ءبىلىم بەرەتىن وقۋ ورىندارىنىڭ ستۋدەنتتەرى اراسىندا وتكەن بۇل بايقاۋعا وڭىردەگى 23 كوللەدجدەن 84 ءبىلىم الۋشى قاتىسىپ, 12 اتالىم بويىنشا باق سىناستى.
«بۇل جارىس كاسىپتىك ءبىلىم الۋشى ستۋدەنتتەردىڭ كاسىبي شەبەرلىگى مەن شىعارماشىلىق ىزدەنىستەرىن جان-جاقتى كورسەتتى. «WorldSkills Qonaev – 2024» – جۇمىسشى ماماندىقتارىنىڭ وليمپياداسى دەۋ ورىندى. ويتكەنى ول, ستۋدەنتتەرگە العان ءبىلىمىن كادەگە جاراتۋمەن قاتار, شەبەرلىكتەرىن شىڭداۋعا, قاتەلىكتەرىن تۇزەۋگە, كاسىبيلىگىن ارتتىرۋعا باعىت-باعدار بەرەدى. بايقاۋعا قاتىسۋشى ستۋدەنتتەردىڭ بارلىعى تالانتتى, ءوز كاسىبىن قادىرلەيتىنى كورىنىپ تۇر. وسى جارىستا توپ جارعان جەڭىمپازدار بىلىمدەرى مەن كاسىبي شەبەرلىكتەرىن رەسپۋبليكالىق چەمپيوناتتا دالەلدەيتىن بولادى. وزدەرىڭىزگە بەلگىلى, ۇلتتىق چەمپيوناتتىڭ ءبىر تاپسىرماسى اعىلشىن تىلىندە ۇسىنىلادى, سول سەبەپتى جەڭىمپاز ستۋدەنتتەرىمىز اعىلشىن ءتىلىن ۇيرەنۋمەن قاتار, پراكتيكالىق دايىندىعىن كاسىپورىن بازاسىندا جەتىلدىرۋدىڭ مۇمكىندىگىن قاراستىرۋ ماڭىزدى», دەدى وبلىستىق ءبىلىم باسقارماسىنىڭ باسشىسى س. بەسپاەۆا.
ءۇش كۇندىك چەمپيوناتتا «اسپاز ءىسى» بويىنشا الماتى وبلىسىنىڭ قىزمەت كورسەتۋ جانە تاماقتاندىرۋ سالاسىنداعى يننوۆاتسيالىق تەحنولوگيالار كوللەدجىنىڭ ستۋدەنتى نۇرسۇلتان تولىبەك جەڭىمپاز اتانسا, «شاشتاراز ونەرى» مەن ء«سان تەحنولوگياسى» اتالىمدارىندا دا وسى كوللەدجدىڭ ستۋدەنتتەرى انەل يمانقوجا مەن الميرا كاريموۆا توپ جاردى. «گرافيكالىق ديزاين» بويىنشا الماتى ەكونوميكالىق كوللەدجىنىڭ ستۋدەنتى ايسۇلتان بەردەشوۆ 1-ورىن يەگەرى اتانسا, «ۆەب تەحنولوگيالار» جانە «ەلەكترومونتاجداۋ جۇمىستارى» اتالىمىندا تالعار پوليتەحنيكالىق كوللەدجىنىڭ ستۋدەنتتەرى تايرجان احمەتوۆ پەن اناتولي كونچاكوۆ جەڭىمپازدار قاتارىنان كورىندى.
ءوز ماماندىقتارىن قورعاۋ بويىنشا بىلىكتىلىك تانىتقان ءبىلىم مەكەمەلەرى بارىنشا بەلسەندى بولدى. «تومەنگى سىنىپتاردى وقىتۋ» بويىنشا ەسىك گۋمانيتارلىق-ەكونوميكالىق كوللەدجىنىڭ ستۋدەنتى سوفيا ۆيۋن ۇزدىك اتانسا, «شاناق جۇمىستارى» بويىنشا قاراكەمەر كاسىپتىك كوللەدجىندە ءبىلىم الۋشى قۋاندىق ورازىمبەتوۆ ورتاسىنان وزدى. سونداي-اق «جەڭىل اۆتوموبيلدەردى جوندەۋ جانە قىزمەت كورسەتۋ» سايىسىندا تالعار اگروبيزنەس جانە مەنەدجمەنت كوللەدجىنىڭ ستۋدەنتى ادىلەت ادەبيەت ۇلى جوعارى بالل جيناپ, جەڭىمپاز اتاندى.
«دانەكەرلەۋ تەحنولوگياسى» بويىنشا كاسىپتىك وقۋداعى كوپسالالى كوللەدجىندە ءبىلىم الاتىن ءىلياس جارىمبەتوۆ 1-ورىندى يەلەنسە, «مەكتەپكە دەيىنگى تاربيە جانە دايىندىق» اتالىمىندا ەسىك گۋمانيتارلىق-ەكونوميكالىق كوللەدجىنىڭ تۇلەگى ەڭلىك ءالنۇر, ال «جەلىلىك جانە جۇيەلىك اكىمشىلەندىرۋ» بويىنشا تالعار پوليتەحنيكالىق كوللەدجىنىڭ ستۋدەنتى سابىرجان ءامىروۆ ۇزدىكتەر قاتارىنان كورىندى.
جەڭىمپازداردى وبلىستىق ءماسليحات دەپۋتاتى سەرىكحان ءادىلحانوۆ قۇتتىقتاپ, ستۋدەنتتەردىڭ كاسىپتىك شەبەرلىگى جىلدان جىلعا ارتا تۇسكەندىگىن اتاپ ايتتى.
«مەن «ELECTUDE» باعدارلاماسى بويىنشا «پريورا» اۆتوكولىگىنىڭ قوزعالتقىشىن جانە ۆاز-2107 كولىگىنىڭ بەرىلىس قوراپشاسىن بۇزىپ-جيناۋ بويىنشا باعىمدى سىنادىم. قوزعالتقىشتى بۇزىپ-جيناۋعا 3 ساعات, بەرىلىس قوراپشاسىنا 1,5 ساعات ۋاقىت بەرىلدى. وعان قوسا, اينالاڭدى تازا ۇستاۋ دا نازارعا الىندى. سونداي-اق اقاۋدى انىقتاۋدا دا تاپقىرلىق تانىتۋىم كەرەك بولدى. وسىنىڭ ءبارى ەسكەرىلە كەلىپ, 100-دەن 90,8 بالل جيناپ, جەڭىمپاز اتاندىم. مەنىڭ بۇل ماماندىققا كەلۋىمە اكەمنىڭ 40 جىلدان بەرى كولىك جۇرگىزەتىنى جانە اعامنىڭ دا ماشينا جاساۋمەن اينالىساتىنى ايرىقشا اسەر ەتتى. الداعى رەسپۋبليكالىق چەمپيوناتتا جەڭىس تۇعىرىنان كورىنۋگە كۇش سالامىن», دەگەن «جەڭىل اۆتوموبيلدەردى جوندەۋ جانە قىزمەت كورسەتۋ» سايىسىنىڭ جەڭىمپازى ادىلەت ادەبيەت ۇلى كەلەشەكتە قازاق كولىك قاتىناستارى ۋنيۆەرسيتەتىنە وقۋعا ءتۇسىپ, جوعارى ءبىلىم الۋدى, مىقتى مامان بولۋدى ارماندايدى.
الماتى وبلىسى
