فوتو: Olympic.kz
پاريج وليمپياداسىنا جولداما جەڭىپ العان سپورتشىنىڭ ءبىرى – بوكسشى نۇربەك ورالباي. وتانداسىمىز جولدامانى بيىل يتاليانىڭ بۋستو-ارسيتسيو قالاسىندا وتكەن الەمدىك ىرىكتەۋ كەزەڭىندە جەڭىپ الدى.
«اپەننين تۇبەگىندەگى تۋرنيرگە التى بوكسشى بارىپ, سونىڭ بەسەۋى جولداماعا قول جەتكىزدى. ارينە ىرىكتەۋ جارىسى بولعان سوڭ, بارلىق بوكسشىنىڭ ماقساتى – وليمپيادا جولداماسىن جەڭىپ الۋ عوي. سوندىقتان بارلىعىمىزعا جەكپە-جەكتەر وڭاي بولعان جوق. مەنىڭ سالماعىمدا 62 بوكسشى جۇدىرىقتاسىپ, سونىڭ تورتەۋىنە جولداما بۇيىردى. ەندى ءبىز ءۇشىن ماڭىزدى كەزەڭ باستالدى. وليمپياداعا جوعارى دايىندىقپەن بارىپ, قازاق ەلىن التىن جۇلدەمەن قۋانتۋعا تىرىسامىز», دەيدى نۇربەك ورالباي.
2000 جىلى تۋعان سپورتشى بوكسقا كەزدەيسوق كەلگەن.
«اكەم سىڭارىم ايبەك ەكەۋمىزدى استاناداعى «الاتاۋ» سپورت كەشەنىنە ەرتىپ اپاردى. ويى – كۇرەسكە بەرۋ ەدى. الدىمىزدان كەزدەيسوق اسقار ەركەباەۆ ەسىمدى جاتتىقتىرۋشى جولىقتى. ول كىسى: «مەن بۇرىننان وسىنداي ەگىز بالالاردى بوكسقا باۋلىپ, سولاردى چەمپيون ەتىپ تاربيەلەپ شىعارۋدى ماقسات تۇتىپ ءجۇر ەدىم», دەپ ايتىپ قالدى. ءسويتىپ اكەم قازىرگى باپكەرىمە رۇقساتىن بەردى. وسىلايشا, بوكس زالىنان ءبىر-اق شىقتىق», دەيدى الەم چەمپيونى.
«80 كگ سالماقتاعى الەم چەمپيونى نۇربەك ورالبايدىڭ بوكسقا كەلگەندەگى ءوز ماقساتى بار. سول ماقساتىنا جەتۋ ءۇشىن تىنباي ەڭبەك ەتىپ ءجۇر. ءبىر ارتىقشىلىعى – ول قارسىلاسقا وتە ىڭعايسىز بوكسشى. سول سەبەپتى نۇربەك – وسى وليمپيادادا مەدال كۇتەتىن جىگىتتەرىمىزدىڭ ءبىرى», دەپ پىكىر ءبىلدىردى ۇلتتىق قۇرامانىڭ باس باپكەرى مىرزاعالي ايتجانوۆ.
بوكسشى ءوزىنىڭ باستى جانكۇيەرى وتباسى ەكەنىن ايتادى.
«بىلتىر وزبەكستان استاناسى تاشكەنتتە وتكەن الەم چەمپيوناتىنا اتا-انامىز ءبىز ءۇشىن بارىپ, قولداۋ كورسەتۋى قوسىمشا كۇش بەردى, سەنىمدىلىگىمىزدى ارتتىردى. ءبىز دە اتا-انامىزدى, قولداپ وتىرعان جانكۇيەرلەردى قۋانتۋ ءۇشىن ءار جەكپە-جەكتە, جارىستاردا جەڭىسكە جەتۋگە تىرىسامىز», دەيدى نۇربەك ورالباي.
