كوللاجدى جاساعان – قونىسباي شەجىمباي, «EQ»
ال كەشە «قازاقستان حالقىنا» قورى, «قازاقمىس» كورپوراتسياسى جانە سولتۇستىك قازاقستان وبلىسىنىڭ اكىمدىگى تاعى 100 ءۇي تۇرعىزۋ جونىندەگى مەموراندۋمعا قول قويدى. بۇل قۇجات سولتۇستىك قازاقستان وبلىسى اكىمدىگى ۇسىنعان تيپتىك جوبا بويىنشا پەتروپاۆل قالاسىنىڭ «سولنەچنىي-2» شاعىن اۋدانىندا تاعى 100 تۇرعىن ءۇيدى سالۋدى قامتىعان. وسى ۇيلەر قۇرىلىسىنىڭ شىعىنىن «قازاقمىس» كورپوراتسياسى كوتەرىپ, 100 ءۇيدىڭ قۇرىلىسى اياقتالعاننان كەيىن مەردىگەرلەرگە تولەۋگە «قازاقستان حالقىنا» قورىنا قايىرىمدىلىق كومەك رەتىندە 2,4 ملرد تەڭگە اۋداراتىن بولىپ كەلىسىلدى.
سۋ تاسقىنىنان زارداپ شەككەن وتباسىلارىن تەز ارادا باسپانامەن قامتاماسىز ەتۋ ماقساتىمەن ءۇش جاقتى قۇجاتتا تاراپتاردىڭ مىندەتتەرى مەن فۋنكتسيالارى ايقىندالعان. «قازاقمىس» كورپوراتسياسى» جشس-نىڭ تۇراقتى دامۋ جونىندەگى ديرەكتورى ساكەن شاياحمەتوۆ بۇل شىعىندار كومپانيانىڭ بيزنەس پەن مەملەكەتتىڭ ارىپتەستىگىن ىسكە اسىرۋدىڭ ناقتى رامىزىنە اينالاتىنىن اتاپ ءوتتى. «قازاقستان حالقىنا» قوعامدىق قورىنىڭ باسقارما توراعاسى بولات جامىشەۆ بارلىق جۇمىستىڭ اشىقتىعى, سونىمەن قاتار قۇرىلىس ساپاسىنىڭ جوعارى بولۋى قوعامدىق باقىلاۋدىڭ قاتىسۋىمەن عانا ىسكە اسىرىلاتىنىن ەسكەرتتى. سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ زارداپ شەككەندەرگە قولداۋ كورسەتكەنى ءۇشىن ارىپتەستەرىنە العىسىن ءبىلدىرىپ, اپاتتىڭ سالدارىن ءساتتى ەڭسەرۋ ءۇشىن ەلدىڭ بارلىق كۇش-جىگەرىن ءبىر ارناعا توپتاستىرا بىلگەن ۇكىمەتكە دە ريزاشىلىعىن ايتتى.
جەرگىلىكتى اتقارۋشى ورگاندار تاپسىرىس بەرۋشى رەتىندە زارداپ شەككەندەردىڭ شىعىنىن باعالاۋعا, جاڭا قۇرىلىستاردىڭ سمەتالىق ەسەپتەرىن دايىنداۋعا, جەر تەلىمدەرىن بولۋگە, جوبالىق-سمەتالىق قۇجاتتامانى كەلىسۋگە, تاۋەلسىز ساراپتامالىق (باعالاۋشى) كومپانيالار مەن قوعامدىق ۇيىمداردى تارتا وتىرىپ, مەردىگەرلەردى تاڭداپ, بار اقپاراتتى جانە قاجەتتى قۇجاتتاردى مەزگىلىمەن ۇسىنىپ وتىر. جاڭا باسپانا الاتىندارعا وزدەرىنىڭ شارۋاسىن دامىتۋعا نەسيە الۋ مۇمكىندىگى دە جەڭىلدەتىلگەن.
سونىمەن, «سولنەچنىي-2» شاعىن اۋدانىندا بۇرىنعى 100 ۇيگە قوسا «قازاقمىس» كورپوراتسياسىنىڭ قولداۋىمەن سالىناتىن باسپانالار قوسىلىپ, 200 ءۇيدى تۇرعىزاتىن قاراجاتتىڭ ماسەلەسى شەشىلدى. العاشقى 100 ءۇيدىڭ قۇرىلىسى مەردىگەرلەر ماۋسىم ايىندا اياقتالاتىنىن ايتتى. «قازاقستان حالقىنا» قورىنىڭ توراعاسى سالىنىپ جاتقان ۇيلەرگە بارىپ, قۇرىلىس بارىسىمەن تانىستى.
«مىنا جوبا وتە جاقسى, ساپالى ءارى كەڭ ەكەنى كورىنىپ تۇر. ءاربىر ءۇيدىڭ كولەمى 80 شارشى مەتردەن ەكەن. ىرگەتاسى مىقتى, استىنان جەل ساۋلاماس ءۇشىن توپىراق ءۇيىلىپ, نىعىزدالعان. توبەسى ءتورت قاتار ماتەريالدارمەن جابىلعان. ۇيگە اۋىزسۋ تارتىلعان, شايىندى سۋلار قالالىق كارىزگە قوسىلادى ەكەن. مەنىڭشە, مۇنداي ۇيلەرگە تۇرعىندار ريزا بولۋعا ءتيىستى», دەدى ب.جامىشەۆ.
وسى «سولنەچنىي-2» شاعىن اۋدانىندا بەكىتىلگەن ءۇش جوبا بويىنشا بارلىعى 500 ءۇي سالىنباق. بۇل ماقساتتا قۇرىلىس جەرلەرى بولىنگەن. قالعان 300 ءۇيدىڭ ماسەلەسىمەن جۋىردا وبلىس اكىمى ع.نۇرمۇحامبەتوۆ استاناداعى ءىرى پانەلدى باسپانانى سالۋعا ماماندانعان ء«ۇي قۇرىلىسى كومبيناتى GLB» زاۋىتىنىڭ باسشىلىعىمەن كەزدەستى. ولاردىڭ كومەگىمەن «Kaspi» اق قاراجاتىنا «سولنەچنىي-2» شاعىن اۋدانىندا تاعى دا 300 تۇرعىن ءۇي سالىنادى. ءسويتىپ, 500 ءۇيدىڭ قۇرىلىسى بيىلعى جاز بويى ءجۇرىپ, كۇزدە ۇيلەردى جوندەۋگە جارامسىز بولعاندار اراسىنان زارداپ شەككەن تۇرعىنداردىڭ وسىنشا وتباسى جاڭا قونىس تويىن جاساماق.
ايتا كەتەتىن جايت, وبلىس ورتالىعىنىڭ تۇرعىندارى سورعى ستانساسىن تاسقىن بۇزىپ, ىستەن شىعارعاننان بەرى ۇيگە كەلەتىن سۋدى قالانىڭ تۇبىندەگى كولدەن تارتىلعان قۇبىردان الىپ وتىرعان. كولدىڭ سۋى تازالانىپ بەرىلگەنىمەن اعىن سۋداي ەمەس ءدامسىز بولعاندىقتان حالىق اۋىزسۋدى دۇكەندەردەن ساتىپ الىپ, ءىشىپ وتىرعان. جۋىردا سورعى ستانساسى جوندەلىپ, اۋىزسۋ ەسىلدەن الىناتىنىن «قىزىلجار سۋ» كومپانياسى جاريالاپ, حالىقتى قۋانتىپ تاستادى.
الايدا ءبارى دە مايدان قىل سۋىرعانداي جىمداسىپ جاتقان جوق. سۋدىڭ استىندا قالعان كەيبىر جاقسى ۇيلەردىڭ شىعىنىن باعالاۋشىلار «بايدىڭ اسىن بايعۇس قىزعانادى» دەگەندەي ارزان باعالاپ, ولاردىڭ كورسەتكەن سوماسى ءۇيدى قالپىنا كەلتىرۋگە جەتپەيتىن بولعان سوڭ نارازىلىق بىلدىرۋشىلەر دە شىعىپ جاتىر.
سولتۇستىك قازاقستان وبلىسى
