سۋرەتتى تۇسىرگەن – جەڭىس ىسقاباي
بۇل ويىن الاڭىن شاعىن ەلدى مەكەن بالالارى كوپتەن كۇتكەن ەدى. تۇرعىندار دا سان رەت قالا اكىمدىگىنە حات جازىپ, ماسەلەنى ورتاعا سالعان. قازىر ەركىن اۋىلدىق وكرۋگىنە قارايتىن 3-بولىمشەدە 150 ءتۇتىن تۇرادى. مۇنداعى تۇرعىندار بۇلدىرشىندەر ءۇشىن زاماناۋي تالاپقا ساي جابدىقتالعان ويىن الاڭى قاجەت ەكەنىن ايتىپ, ءتىپتى وبلىس اكىمدىگىنە دە حات جازىپتى. وسى رەتتە يگىلىكتى باستاماعا «حالىق قاتىساتىن بيۋدجەت» باعدارلاماسى مۇرىندىق بولعان. ءوڭىر اكىمىنىڭ ءباسپاسوز قىزمەتىنىڭ مالىمەتىنشە, اتالعان جوباعا 14 ملن تەڭگە قارجى بولىنگەن. ال قۇرىلىس جۇمىستارىن «Mir&Er» جشس قولعا العان.
وسى ءساتتى بالالارىمىز كوپتەن كۇتتى. قالانىڭ سىرتىندا ورنالاسقاندىقتان, بالالارىمىز وينايتىن جەر تاپپاي, قالاعا بارۋعا تۋرا كەلەتىن. جاڭا الاڭدا بالالاردىڭ قاۋىپسىزدىگى ءۇشىن بارلىق جاعداي جاسالعان. وزىنە لايىقتى شاعىن قورشاۋى بار. ەڭ باستىسى, جەرگە رەزەڭكە جابىندىسى توسەلگەن, ويىن قۇرالدارى دا ساپالى. ەندى بالالارىمىز وسى الاڭدا الاڭسىز وينايدى», دەيدى بولىمشە تۇرعىنى سۆەتلانا اجيكەنوۆا.
تالدىقورعان قالاسى اكىمدىگىنىڭ مالىمەتىنشە, ۋاقىت وتكەن سايىن اتالعان باعدارلاماعا قاتىسقىسى كەلەتىن تۇرعىنداردىڭ سانى ارتىپ, ولار ەڭ ماڭىزدى دەگەن جوبالاردى بەلسەندى ۇسىنا باستاعان. بۇل ءوز كەزەگىندە اباتتاندىرۋ جۇمىستارىنىڭ قارقىندى جۇرۋىنە سەپتىگىن تيگىزىپ جاتىر.
«حالىق قاتىساتىن بيۋدجەت» جوباسى بويىنشا وتكەن جىلى 12 جوبا بەلگىلەنسە, سونىڭ بەسەۋى ىسكە قوسىلىپ, ىنتىماق, ەركىن اۋىلدارى, جاستار-1, كوكتال تۇرعىن اۋدانىندا ورتاق قولدانىستاعى اۋلالار اباتتاندىرىلدى, ال قالعان 7 جوبانى بيىل اياقتايمىز. اتاپ ايتقاندا, «المالى», «اششىبۇلاق», ء«ۇيتاس» ساياجايلارىندا, 3-بولىمشە جانە باتىس تۇرعىن اۋدانىندا سپورت جانە بالالار الاڭدارىن ورناتىپ, كوكتالدا تروتۋار اعىمداعى جوندەۋدەن وتپەك. سونىڭ ءبىرى 3-بولىمشەدەگى بالالار ويىن الاڭى قولدانىسقا بەرىلدى», دەيدى قالا اكىمىنىڭ ورىنباسارى رۇستەم بەرشىنبەكوۆ.
ونىڭ ايتۋىنشا, بيىل «حالىق قاتىساتىن بيۋدجەت» باعدارلاماسىنا 500 ملن تەڭگە قاراستىرىلىپ وتىر. بۇگىندە 68 جوبا تۇسكەن, سونىڭ 22-ءسى – داۋىس بەرۋ ساتىسىندا. كوپ ۇزاماي 22 جوبانىڭ شەشىمى شىققاننان سوڭ قالالىق تۇكش ءبولىمى كونكۋرسقا بەرۋ جۇمىستارىن باستايدى.
ايتا كەتەيىك, «حالىق قاتىساتىن بيۋدجەت» – ازاماتتاردىڭ جەرگىلىكتى بيۋدجەت قاراجاتىن بولۋگە قاتىسۋى. تۇرعىنداردىڭ وزدەرى اباتتاندىرۋ يدەيالارىن ۇسىنادى, ولاردى جوبا دەڭگەيىنە دەيىن پىسىقتايدى, سودان كەيىن ونلاين داۋىس بەرۋ ارقىلى جەڭىمپازداردى تاڭدايدى.
جوبا تۇرعىنداردى كەز كەلگەن جەرگىلىكتى پروبلەمانىڭ اينالاسىندا بىرىكتىرەدى, كورشىلەردى تالقىلاۋعا تارتادى, اۋلانى, ساياباقتى نەمەسە الاڭدى قالاي جاقسى جابدىقتاۋ كەرەكتىگىن تۇسىنۋگە مۇمكىندىك بەرەدى.
جەتىسۋ وبلىسى
