سۋرەتتى تۇسىرگەن – ۆيكتور فەديۋنين
ارينە, بۇگىنگى قىلقالام ۇستاعان تاۋەلسىز ۇرپاق العاشقى تالپىنىسىن مۇلدەم باسقاشا باستاعان بولار. دەسە دە ەگەمەن ەلدىڭ ەركىن ورەندەرىنىڭ ونەردەگى العاشقى ۇستازى قاستەەۆ ەكەنى ءسوزسىز. القيسسا.
كۇنى كەشە عانا بەيبىتشىلىك جانە كەلىسىم سارايىنىڭ «قۇلانشى» زاماناۋي ونەر ورتالىعىندا قازاقستاننىڭ حالىق سۋرەتشىسى ءابىلحان قاستەەۆتىڭ 120 جىلدىعىنا ارنالعان قازاق ۇلتتىق ونەر ۋنيۆەرسيتەتىنىڭ كوركەمسۋرەت فاكۋلتەتى ستۋدەنتتەرىنىڭ شىعارماشىلىق جۇمىستارىنىڭ كورمەسى ءوتتى.
كورمەگە ىرىكتەلگەن, ۇزدىك تۋىندىلار قويىلعان. ءار شىعارماداعى ءتۇرلى قولتاڭبا, ءتۇرلى تالعام, ءتۇرلى شەبەرلىك بىردەن بايقالادى. جاڭاشا كوزقاراستارى دا ايرىقشا كورىنىپ تۇر.
اتالعان كورمەگە جاس سۋرەتشى ەراسىل ورازدىڭ بىرنەشە تۋىندىسى قويىلىپتى. اسىرەسە شوقان ءۋاليحانوۆتى بەينەلەگەن سۋرەتى نازاردى بىردەن اۋدارادى.
«بۇل سۋرەتتى سالۋعا ەكى اپتا ۋاقىتىمدى جۇمسادىم. ارينە, ءوز ويىڭنان سالعان سۋرەتتەن بىرەۋدىڭ سۋرەتىن قاعازعا ءتۇسىرۋ وڭايىراق. ماسەلەن, ءابىلحان اتامىزدىڭ شوقان ءۋاليحانوۆتى بەينەلەگەن سۋرەتىن سالۋ قيىنعا سوقپادى. شامام كەلگەنشە شوقاندى شىنايى كەلتىرۋگە تىرىستىم. ارينە, سۋرەت ونەرىنەن حابارى از ادامدارعا سىرتتاي ءبارى تاماشا كورىنگەنىمەن ۇيرەنەرىمىز كوپ. گۋاشپەن سالىنعان سۋرەت كورەرمەننىڭ كوڭىلىنەن شىققانىنا قۋانىشتىمىن. بۇگىن ەرەكشە شابىتتانىپ تۇرمىن», دەيدى سۋرەتشى.
كورمەگە كەلۋشىلەردىڭ ىستىق ىقىلاسىنا بولەنگەن تاعى ءبىر سۋرەتتىڭ اۆتورى – ءمادينا ورازاەۆا.
ونىڭ ءابىلحان قاستەەۆتى سالعان سۋرەتى جاناردى الىستان باۋرايدى.
«بۇل سۋرەت مايلى بوياۋمەن سالىندى. تۋىندىنى ءبىر سەمەستر بويى, ياعني جارتى جىل سالدىم. بۇل – مەنىڭ العاشقى ءىرى كورمەم. جينالعاندار سۋرەتتى جوعارى باعالاپ جاتقانىنا قۋانىشتىمىن», دەيدى ءمادينا.
«قۇلانشى» ونەر ورتالىعىنىڭ جەتەكشىسى ءلايلا ماحاتتىڭ ايتۋىنشا, جىل سايىن 14 مامىر – قازاق ۇلتتىق ونەر ۋنيۆەرسيتەتى كوركەمسۋرەت فاكۋلتەتى ستۋدەنتتەرىنىڭ شىعارماشىلىعىنا ارنالادى.
«ەلىمىزدە تالانتتى بالالار كوپ. ولار تاسادا قالماي, شىعارماشىلىق قابىلەتىن شىڭداۋعا ءتيىس. اسىرەسە قازاق ۇلتتىق ونەر ۋنيۆەرسيتەتىنە رەسپۋبليكانىڭ تۇكپىر-تۇكپىرىنەن دارىندى ستۋدەنتتەر جينالعان. ءبىز ءوز تاراپىمىزدان تالانتتى جاستاردى قولداۋعا دايىنبىز», دەدى ول.
ايتا كەتەيىك, كورمە بارىسىندا قازاق ۇلتتىق ونەر ۋنيۆەرسيتەتى ستۋدەنتتەرىنىڭ ۇيىمداستىرۋىمەن ءسان كورسەتىلىمى ءوتتى.
