فوتو: سەناتتىڭ ءباسپاسوز قىزمەتى
«ايەلدەردىڭ ەكونوميكالىق مۇمكىندىكتەرىن كەڭەيتۋ كەز كەلگەن مەملەكەتتىڭ دامۋىنداعى نەگىزگى ماسەلە جانە ورنىقتى بولاشاق قالىپتاستىرۋدىڭ كىلتى بولىپ تابىلادى. تۇراقتى ەكونوميكالىق ءوسۋدى جەدەلدەتۋ جانە قوعامدىق ءال-اۋقاتتى بارلىق دەڭگەيدە جاقسارتۋ ءۇشىن ايەلدەردىڭ ەكونوميكالىق مارتەبەسىن كوتەرۋ اسا ماڭىزدى. سوندىقتان قازاقستان ايەلدەر كاسىپكەرلىگىن قولداۋدى كۇشەيتۋدە بەلسەندى جۇمىس جۇرگىزىپ كەلەدى. قازاقستانداعى جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ 47%-ىن ايەلدەر باسقارادى. ولاردىڭ الەۋەتىن ساپالى تۇرعىدا كۇشەيتۋ ءۇشىن ازيا دامۋ بانكىمەن جانە بۇۇ دامۋ باعدارلاماسىمەن ىنتىماقتاسا وتىرىپ ەلىمىزدىڭ بارلىق وڭىرلەرىندە ايەلدەر كاسىپكەرلىگىن دامىتۋ ورتالىقتارى ىسكە قوسىلدى», دەدى ولگا پەرەپەچينا.
سونىمەن قاتار سەنات توراعاسىنىڭ ورىنباسارى پەكين تۇعىرناماسى ۇكىمەتتەردىڭ, حالىقارالىق ۇيىمداردىڭ جانە ازاماتتىق قوعامنىڭ كۇش-جىگەرىن جۇمىلدىرۋ ارقىلى جىنىستىق كەمسىتۋدىڭ بارلىق ءتۇرىن جويۋعا باعىتتالعان قۋاتتى تەتىككە اينالعانىن اتاپ ءوتتى. كۇش-جىگەردى بىرىكتىرۋ مەن ەلدەر اراسىنداعى ارەكەتتەردى ۇيلەستىرۋ گەندەرلىك تەڭدىك باعدارلاماسىن ودان ءارى ىلگەرىلەتۋگە ەلەۋلى تۇردە جانە ۇزاق مەرزىمگە وڭ ىقپال ەتە الادى.
سەنات توراعاسىنىڭ ورىنباسارى سونىمەن قوسا وزبەكستان ولي ءماجىلىسى سەناتىنىڭ توراعاسى تانزيلا نارباەۆامەن كەزدەستى. تاراپتار پارلامەنتارالىق ىنتىماقتاستىقتى دامىتۋ, ونەركاسىپ كووپەراتسياسى, كولىك بايلانىسى سالاسىنداعى بايلانىستاردى نىعايتۋ, ينفراقۇرىلىمدىق جانە ساۋدا كەدەرگىلەرىن جويۋ ماسەلەلەرىن تالقىلادى.
ولگا پەرەپەچينا سونداي-اق قاتار شۋرا كەڭەسى توراعاسىنىڭ ورىنباسارى حامدا بينت حاسان ال سۋلايتيمەن كەزدەستى. كەزدەسۋگە قاتىسۋشىلار ەكى ەلدىڭ پارلامەنتتەرى اراسىنداعى ءوزارا ءىس-قيمىلدىڭ كەلەشەگىن, سونداي-اق ايەلدەر مەن بالالارعا قاتىستى زورلىق-زومبىلىقتىڭ بارلىق تۇرلەرىن جويۋداعى وڭىرلىك ماسەلەلەردى تالقىلادى.
