وتانىمىز – ورتاق ءۇيىمىز
ەلباسى باسقاراتىن قازاقستان حالقى اسسامبلەياسى – قوعامدىق كەلىسىم مەن ەتنوسارالىق تولەرانتتىلىق ماسەلەلەرىنە جاۋاپكەرشىلىك تانىتاتىن قۇرىلىم. اسسامبلەيا بۇگىندە بارلىق الەمدىك قوعامداستىق قىزىعۋشىلىق تانىتىپ وتىرعان وتە ۇلكەن وڭ تاجىريبە جيناقتادى. ونىڭ قىزمەتى مەملەكەت باسشىسىنىڭ قازاقستان جاعدايىنداعى كوپۇلتتىلىق – كەمشىلىك ەمەس, قوعامنىڭ ارتىقشىلىعى تۋراسىندا ايتىلعان ءسوزىنىڭ اقيقاتىن كورسەتىپ وتىر. بىزدەر, قازاقستاندىقتار ەلىمىزدەگى كەلىسىم مەن تۇراقتىلىقتى باعالاپ, ءارى قاستەرلەۋىمىز كەرەك. مەملەكەت باسشىسىنىڭ «ونى ءبىز ءۇشىن ەشكىم ەشقاشان سىرتتان كەلىپ جاسامايدى. سىرتتان كەلىپ ارالاسقاننىڭ سوڭىنىڭ نەگە اكەلىپ سوقتىراتىنىن كورىپ وتىرسىزدار», دەگەن ءسوزى – كورەگەندىك.
قازىرگى تاڭداعى مەنىڭ تاريحي وتانىمداعى جاعداي بارشاعا ايان جانە بۇل وزگەلەر ءۇشىن ساباق الارلىق وقيعا. بارلىق الەمدە بولىپ جاتقان جاعدايلاردى كورە وتىرىپ, اربىرەۋىمىز دە ءاربىر مەملەكەتتەگى ەڭ باستى قۇندىلىق دەپ ءوز مەملەكەتتەرىندە تاتۋلىقتا ءومىر ءسۇرىپ جاتقان, ءوزىنىڭ قاۋىپسىزدىگىنە, ءوز بالالارىنىڭ بولاشاعىنا زور سەنىممەن قارايتىن ۇلت ەكەندىگىن تۇسىنەمىز.
الەۋمەتتىك ساۋالدامالار مالىمەتى بويىنشا قازاقستاندىقتاردىڭ باسىم بولىگى ەلىمىزدەگى ۇلتارالىق جاعدايدى بىرقالىپتى سانايدى جانە ۇلتارالىق كەلىسىمنىڭ جوعارى دەڭگەيدە ەكەندىگىنە سەنىمدى.
پرەزيدەنتتىڭ ناقتى جانە ورىندى ايتىلعان مىنا ءبىر ءسوزىن اتاپ وتكىم كەلەدى: «كوبى قازاقستانداعى تۇراقتىلىق پەن جايلى تۇرمىستى تۋعاننان بەرىلەتىن قالىپتى جاعداي دەپ قابىلدايدى». ءبىز قولىمىزدا بار اماندىعىمىزدى, دوستىعىمىزدى, ءوزارا تۇسىنىستىگىمىزدى نىعايتۋىمىز كەرەك. مۇنىڭ ءبارى ءبىزدىڭ مەملەكەتىمىزدى نىعايتا تۇسپەك. حالىق بىرلىگى – قازاقستان جەتىستىگىنىڭ كىلتى.
ايەل رەتىندە, انا رەتىندە مەملەكەتتىڭ الەۋمەتتىك جالعا بەرىلەتىن تۇرعىن ءۇي سالىپ جانە ونى تۇرعىندارعا ساتىپ الۋ قۇقىعىمەن ۇزاق مەرزىمدى جالعا بەرەتىنى مەنى قاتتى قۋانتتى. دەلدالدارسىز تىكەلەي جانە ەڭ تومەنگى پايىزبەن نەسيەگە تۇرعىن ءۇيدىڭ بەرىلۋى ونى ساتىپ الۋداعى باعانىڭ تومەندەۋىنە مۇمكىندىك بەرەدى. بۇل جاستارىمىز, جاس وتباسىلارىمىز ءۇشىن ەڭ جاقسى جاعداي بولىپ وتىر. پرەزيدەنت 2015-2016 جىلدارعا ارنالعان جالعا بەرىلەتىن تۇرعىن ۇيلەر قۇرىلىسىنىڭ قارجىلاندىرىلۋىن قوسىمشا كوبەيتۋ جونىندە تاپسىرما بەردى. جولداۋداعى تاعى ءبىر جان جادىراتار جاڭالىق – ينفراقۇرىلىمدىق دامۋ جوسپارىندا كولىكتىك-لوگيستيكالىق ينفراقۇرىلىم دامۋىنىڭ ءبىرىنشى بولىپ كورسەتىلگەنى. سونىمەن قاتار, باستى اۆتوجول جوبالارىنىڭ ىشىندە اتىراۋ – استاراحان باعىتىنىڭ بولعانى. بۇل – قازاقستاننىڭ باتىس قاقپاسى.
جولداۋدا ايتىلىپ وتكەندەي, بيىل تويلاناتىن كونستيتۋتسيامىزدىڭ 20 جىلدىعى مەن قازاقستان حالقى اسسامبلەياسىنىڭ جىلى, ۇلى جەڭىستىڭ 70 جىلى قازاقستاندىقتاردى بۇدان ءارى بىرىكتىرە تۇسەتىن شارالار بولادى دەپ ويلايمىن.
تاتيانا لەسنيچەنكو,
ماڭعىستاۋ وبلىستىق قازاقستان حالقى اسسامبلەياسى توراعاسىنىڭ ورىنباسارى, ت.شەۆچەنكو اتىنداعى ۋكراين ەتنومادەني بىرلەستىگىنىڭ ءتورايىمى.
اقتاۋ.
ايقىن جولدان اينىمايمىز
يگور سپيريدونوۆ,
باتىس قازاقستان وبلىستىق قازاقستان حالقى اسسامبلەياسى جاستار قاناتىنىڭ جەتەكشىسى.
ەلباسىمىزدىڭ تاۋەلسىزدىك كۇنىنە ارنالعان سالتاناتتى جيىندا سويلەگەن ءسوزى ءبىز سياقتى جاستارعا ەرەكشە اسەر ەتتى. سونىڭ ىشىندە «ءبىز ەگەر ءبىرتۇتاس بولساق, كۇشتىرەك بولا تۇسەمىز», دەگەنى ايناقاتەسىز شىندىق. تاۋەلسىز قازاقستاندا بارلىق ۇلت وكىلدەرى ءۇشىن تەڭ جاعداي جاسالىپ كەلە جاتقانى انىق. ءار ەتنومادەني بىرلەستىكتىڭ ءوز ءتىلىن, سالت-ءداستۇرىن دامىتۋىنا تولىق مۇمكىندىگى بار. ءبىزدىڭ مىندەتىمىز – ۇلتارالىق تاتۋلىقتى نىعايتىپ, ەلىمىزدىڭ ودان ءارى وركەندەۋىنە بارىنشا اتسالىسۋ.
ەلباسى باستاماسىمەن قۇرىلعان قازاقستان حالقى اسسامبلەياسى قازىرگى تاڭدا ەلىمىزدە تۇرىپ جاتقان بارلىق ۇلتتىڭ مۇددەسىنە قىزمەت ەتۋدە. ال وبلىستىق قازاقستان حالقى اسسامبلەياسىنىڭ جاستار قاناتى دا وزىنە جۇكتەلگەن جاۋاپكەرشىلىكتى سەزىنىپ, كەيىنگى ۇرپاقتى وتانشىلدىق رۋحتا تاربيەلەۋ, تاۋەلسىزدىكتى ودان ءارى ورنىقتىرۋ باعىتىندا ەڭبەك ەتۋدە. ءتۇرلى ۇلت وكىلدەرى ءوزارا دوستىق قارىم-قاتىناستا ءومىر ءسۇرىپ, ءبىر-ءبىرىنىڭ ءداستۇرىن, سالتىن ساقتاۋىنا ىقپالىن تيگىزىپ كەلەدى. بيىل قازاقستان حالقى اسسامبلەياسىنىڭ 20 جىلدىعى تويلاناتىن بولادى. وسىعان بايلانىستى ءبىز دە ءوز جوسپارىمىزدى قۇرىپ, جۇمىستانۋدامىز. ورال قالاسىندا دوستىق ءۇيى سالىنىپ, پايدالانۋعا بەرىلمەك. ال ءبىز, جاستار پرەزيدەنتىمىز كورسەتكەن ايقىن جولدان اينىماي, تاۋەلسىزدىك مۇراتتارىنا قىزمەت ەتە بەرەتىن بولامىز. ەلىمىزدىڭ بەدەلى بۇكىل الەمدە نىعايا تۇسەرىنە سەنەمىز جانە وعان ءوز ۇلەسىمىزدى قوسامىز. قازاقستاننىڭ بارلىق جاستارىن وسىعان شاقىرامىز.
ورال.
تابان تىرەيتىن تۇعىرىمىز
راحيمجان توحتاحۋنوۆ, قازاقستان حالقى اسسامبلەياسىنىڭ مۇشەسى. ەلىمىزدە ەتنوسارالىق تاتۋلىقتى ساقتاپ, يندۋستريالىق-يننوۆاتسيالىق دامۋ باعدارلاماسىن ىسكە اسىرۋ, جاڭا جۇمىس ورىندارىن اشۋ, شاعىن جانە ورتا كاسىپكەرلىكتى دامىتۋ, اۋىل شارۋاشىلىعىنا جاڭا سەرپىن بەرۋ – قاراپايىم حالىقتىڭ ءال-اۋقاتىن جاقسارتۋعا الىپ باراتىن جول. مىنە, سوندىقتان ەلباسى نۇرسۇلتان نازارباەۆ جولداۋىندا حالىقتىڭ الەۋمەتتىك جاعدايىن جاقسارتۋعا, تۇرعىنداردىڭ دەنساۋلىعىن جاقسارتۋعا, جاستاردىڭ ءبىلىمىن جەتىلدىرۋگە باسا كوڭىل ءبولىپ, ۇكىمەتكە ناقتى مىندەتتەردى جۇكتەدى. پرەزيدەنت جولداۋىندا بەلگىلەنگەن مىندەتتەر ەلىمىزدىڭ بولاشاعىنىڭ جارقىن دا جاسامپاز ەكەندىگىن ايعاقتايدى. جاڭا تابىستار مەن جالىندى ىستەرگە جىگەرلەندىرەدى. حالىققا ارناعان جولداۋدى تىڭداعان ءاربىر ادام ءوزىن تولعاندىرىپ جۇرگەن ماسەلەلەرگە جاۋاپ تاۋىپ, بولاشاققا ۇلكەن ءۇمىت ارتىپ, مەملەكەت پەن قوعامعا دەگەن سەنىمىن نىعايتا ءتۇستى. قازىرگى جەتكەن جەتىستىكتەرىمىز كەلەشەكتەگى الار اسۋلارىمىز بەن تولاعاي تابىستارىمىزدىڭ تابان تىرەيتىن تۇعىرى ەكەنىنە كوز جەتكىزدى. «ىنتىماعى ورناعان ەلدىڭ بولاشاعى دا بەرەكەلى» دەمەكشى, ەلىمىزدەگى ساياسي تۇراقتىلىق پەن قوعامدىق كەلىسىمنىڭ ارقاسىندا ۇلكەن جەتىستىكتەرگە جەتكەنىمىز كۇمانسىز. ەل بىرلىگىن تاتۋلىق پەن ۇلتارالىق كەلىسىمدى نىعايتۋ ءۇشىن قولدانۋدا قازاقستان حالقى اسسامبلەياسىنا ۇلكەن سەنىم ارتىلادى. «نۇرلى جول – بولاشاققا باستار جول» جولداۋى حالقىمىزدى جاڭا بەلەستەرگە – «نۇرلى جولعا» الىپ باراتىن جولداۋ دەپ بىلەمىن. الماتى وبلىسى.
