قالالىق اكىمدىكتىڭ ءباسپاسوز قىزمەتىنىڭ حابارلاۋىنا قاراعاندا, جاڭا ۇيلەر ءۇش بولمەدەن تۇرادى, اۋدانى – 80 شارشى مەتردەن. بۇگىنگى تاڭدا مۇندا بارلىعى 500 ءۇي تۇرعىزۋ جوسپارلانعان. سونىڭ ىشىندە 100 ءۇي «قازاقستان حالقىنا» قورىنىڭ ەسەبىنەن تۇرعىزىلماقشى. قوردان بۇل ۇيلەردىڭ قۇرىلىسىنا 2,7 ملرد تەڭگە قاراجات بولىنگەن. قۇرىلىستى جۇرگىزىپ جاتقان جۇمىسشىلار سانى جاقىن كۇندەردە 600-گە دەيىن جەتپەكشى. قۇرىلىسشىلاردىڭ قاراماعىندا 30-دان اسا ءتۇرلى تەحنيكا بار. قۇرىلىس جىلىتۋ ماۋسىمى باستالعانشا اياقتالۋعا ءتيىس. بارلىق ءۇي قالا اكىمدىگىنىڭ بالانسىنا بەرىلەدى.
قالانىڭ ىشىندەگى شاعىن اۋدانداردىڭ اراسىندا ويقالانىڭ سۋ استىندا قالعان ۇيلەرى 1 383 ەكەن. قازىر بۇل اۋداننىڭ ءبىراز اۋماعىنىڭ سۋى تارتىلدى. تۇرعىندار وزدەرىنىڭ مەكەندەرىنە كەلىپ, بارىنشا قيىن جاعدايدى كورىپ, جاعا ۇستاپ جاتىر. بىرنەشە كۇن تەرەزەدەن جوعارى تۇرعان سۋ جيھاز اتاۋلىنى تەگىس ءبۇلدىرىپ, ءۇي ءىشىنىڭ اكتەرى مەن جاپسىرما قاعازدارىن تالقان ەتىپتى. سۋدا قالعان زاتتاردان دا جوبا جوق. قالا اكىمىنىڭ ءباسپاسوز حاتشىسى اسەم ايتۇلوۆا تۇرۋعا جارامدى ۇيلەرگە مەحانيكالىق بريگادالاردىڭ ادامدارى كەلىپ, جوندەۋ جۇمىستارىن جۇرگىزەتىنىن ايتتى. الايدا جوندەۋ جۇمىستارى ەدەن استىنداعى كولكىلدەگەن سۋ تولىقتاي سورعىمەن سورىلىپ, ءۇي ابدەن كەپكەننەن كەيىن جاسالسا دۇرىس. ال قازىر جاسالسا, پايداسىز بولاتىنىن تۇرعىندار كورىپ تۇر. وسى شاعىن اۋدانعا تايىنشا, ايىرتاۋ, ع.مۇسىرەپوۆ اۋداندارىندا جاساقتالعان مەحانيكالىق بريگادالار جوندەۋ جۇمىستارىن جۇرگىزبەك.
ء«بىز جوندەۋ جۇمىستارىنا بىردەن كىرىسپەيمىز. بريگادا الدىمەن جارامسىز جيھازداردى, ءتۇرلى قوقىستاردى شىعارادى. سودان كەيىن ەدەننىڭ تاقتايلارىن قوپارىپ, استىنداعى سۋدى ابدەن قۇرعاتامىز. سوسىن قالپىنا كەلتىرۋ جۇمىستارىنا كىرىسەمىز», دەپ بريگادانى باستاپ كەلگەن تايىنشا اۋدانى اكىمىنىڭ ورىنباسارى ەرلان امانجولوۆ تۇرعىنداردى تىنىشتاندىرىپ جاتىر. تايىنشالىقتاردىڭ ەنشىسىنە 176 ءۇيدى قالپىنا كەلتىرۋ مىندەتى جۇكتەلىپتى.
بارلىق اۋدان مەن قالانىڭ وزىنەن قالپىنا كەلتىرۋ جۇمىستارىنا 100 مەحانيكالىق بريگادا جاساقتالعان. ولاردىڭ قاراماعىندا شامامەن 600 ادام, 140 دانا تەحنيكا بار. تاسقىن سۋى ساپاسىز جۇمىستاردىڭ دا بەتىن اشىپ كەتتى. نورماتيۆتىك تالاپتار ورىندالىپ, دۇرىس تىعىزدالعان اسفالت جولدارى سۋعا مىزعىماسا, كەيبىر اسىعىس قالقايتا سالعان ۋچاسكەلەردى سۋ شايىپ كەتكەن.
وبلىس اكىمى باستاعان توپ وسى ويقالا, تەرى زاۋىتى, تەپليچنىي شاعىن اۋداندارىنداعى قالپىنا كەلتىرۋ جۇمىستارىن ءوز كوزىمەن كورىپ شىقتى. باعالاۋ كوميسسياسى قالپىنا كەلتىرۋگە بولمايدى دەپ قورىتىندى بەرگەن ۇيلەر جەدەل سىرىلماقشى. قازىر اۋلالار مەن ءۇيدىڭ ىشىندە قالعان سۋدى سورۋ جۇمىستارى قىزۋ ءجۇرىپ جاتىر.
تاسقىننان زارداپ شەككەندەرگە كەلگەن قايىرىمدىلىق كومەكتەر ءالى دە تاراتىلىپ جاتىر. كاسىپورىن-مەكەمەلەر عانا ەمەس, كوپتەگەن قوعامدىق ۇيىم مەن شەتەلدەردەن, جەكە ازاماتتاردان كەلگەن كومەكتەردىڭ كولەمى – ۇلان-عايىر. سونىڭ ىشىندە قازاقستان مۇسىلماندارىنىڭ «زەردە» قورى مۇشەلەرىنىڭ ۇيىمداستىرۋىمەن 9 اۋىر توننالىق جۇك كولىگى, 38 «گازەل», 1 «كاماز»
تىركەمەسىمەن, 4 «دجيپ» كولىگى تولى 20 ملن تەڭگەدەي قاراجاتتىڭ قايىرىمدىلىق جۇگى كەلدى. ولاردى سولتۇستىك قازاقستان وبلىسى جانە «قىزىلجار» ورتالىق مەشىتىنىڭ باس يمامى حامزات ادىلبەك باستاعان مەشىت قىزمەتكەرلەرى 637 وتباسىنا ۇلەستىردى. سونىمەن قاتار شىعىس قازاقستان وبلىسى مەن رەسەيدىڭ ومبى قالاسىنان كەلگەن 6,5 ملن تەڭگە اقشالاي قاراجات 40 وتباسىنا تەڭ ءبولىنىپ بەرىلدى. جاقىنعا ارقاشان جاناشىرلىق بىلدىرەتىن مۇسىلمان قاۋىمىنىڭ كومەگىنە حالىق ءتانتى بولدى.
سولتۇستىك قازاقستان وبلىسى
