بۇگىن قوعامدىق رەزونانس تۋدىرعان اتالعان ءىستىڭ نۇكتەسى قويىلدى. استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا بيشىمباەۆ پەن بايجانوۆقا قاتىستى قىلمىستىق ءىس بويىنشا ۇكىم جاريالاندى.
ەسكە سالايىق, قۋاندىق بيشىمباەۆقا قىلمىستىق كودەكستىڭ 99-بابى جانە 110-بابى بويىنشا ايىپ تاعىلعان. ال باقىتجان بايجانوۆ قىلمىستىق كودەكستىڭ 432-بابى بويىنشا ايىپتالىپ وتىر.
سوت ۇكىمىنە سايكەس, ەكس-مينيستر قۋاندىق بيشىمباەۆ قىلمىستىق كودەكستىڭ 110-بابى 2-بولىگى 1-تارماعى (قيناۋ) بويىنشا كىنالى دەپ تانىلدى. بۇل باپ بويىنشا ايىپتالۋشى 7 جىلعا باس بوستاندىعىنان ايىرىلدى.
ول سونداي-اق قىلمىستىق كودەكستىڭ 99-بابى 2-بولىگى 5-تارماعى (اسا قاتىگەزدىكپەن ادام ءولتىرۋ) بويىنشا كىنالى دەپ تانىلدى. بۇل باپ بويىنشا 20 جىلعا باس بوستاندىعىنان ايىرىلدى. جازانى جەڭىلدەتەتىن ءمان-جايلاردىڭ, دالىرەك ايتقاندا كامەلەت جاسىنا تولماعان بالالارىنىڭ بولۋىنا بايلانىستى بيشىمباەۆ تۇپكىلىكتى 24 جىلعا باس بوستاندىعىنان ايىرىلدى.
ال باقىتجان بايجانوۆ قۋاندىق بيشىمباەۆ جاساعان اسا اۋىر قىلمىستى ۋادەسىز جاسىرۋ بويىنشا كىنالى دەپ تانىلىپ, قىلمىستىق كودەكستىڭ 432-بابى بويىنشا 4 جىلعا سوتتالدى. ايىپتاۋ قورىتىندىسىنا سايكەس, بايجانوۆتىڭ قىلمىستىق جاۋاپكەرشىلىگى مەن جازاسىن اۋىرلاتاتىن ءمان-جايلار انىقتالماعان.
ايتا كەتەيىك, قىلمىستىق ىس القابيلەردىڭ قاتىسۋىمەن قارالدى.
سوتتالۋشىلاردىڭ كىناسى جابىرلەنۋشىنىڭ, كۋالاردىڭ ايعاقتارىمەن, اۋديو-بەينەماتەريالدارمەن, ساراپتامالىق قورىتىندىلارمەن جانە قىلمىستىق ءىستىڭ باسقا ماتەريالدارىمەن دالەلدەندى.
بۇعان دەيىن, پروكۋرور بيشىمباەۆتى 24 جىلعا, بايجانوۆتى 4 جىلعا باس بوستاندىعىنان ايىرۋدى سۇراعان ەدى. ال سوتتالۋشىلار ءوز كىنالارىن مويىندامادى.
سوت قىلمىستىق كودەكستىڭ 14-بابىنىڭ 2-بولىگىنىڭ 2-تارماعىنىڭ نەگىزىندە بيشىمباەۆتىڭ قىلمىستىق جاۋاپتىلىعى مەن جازاسىن اۋىرلاتاتىن ءمان-جاي رەتىندە قىلمىستاردىڭ قاۋىپتى قايتالانۋىن, سونداي-اق ماس كۇيىندە قىلمىستىق قۇقىق بۇزۋشىلىقتى جاساۋىن تانىدى.
