فوتوسۋرەتتەردى قايتىس بولعان بالانىڭ وتباسى ۇسىندى
بالانىڭ تۋىستارى جول-كولىك وقيعاسىنا كىنالى ادام جاۋاپكەرشىلىكتەن قۇتىلۋى مۇمكىن ەكەنىنە الاڭداۋلى.
قايتىس بولعان بالانىڭ تاتەسى قايعىلى وقيعا 10 مامىر كۇنى سايماساي اۋىلىنداعى ءۇيدىڭ ماڭىندا بولعانىن حابارلادى.
«بالا جول جيەگىندە ويناپ وتىرعان. كولىكتە جولعا ەمەس, تەلەفونعا قاراپ وتىرعان ايەل سول كەزدە جىلدامدىعىن اسىردى. كولىك جول جيەگىنە, ءدال بالا وتىرعان جەرگە شىعىپ كەتىپ, ونى قاعىپ كەتكەن. ءتىپتى وقيعا ورنىنان قاشىپ كەتپەكشى بولدى, مۇنىڭ ءبارىن كورشىلەر دە كوردى. ال كەلىنشەك كولىگىنەن دە تۇسكەن جوق», دەيدى بالانىڭ تۋىستارى.
ولاردىڭ ايتۋىنشا, بالا بىردەن كوز جۇمدى. الايدا جول اپاتىنان كەيىن پوليتسيا قىزمەتكەرلەرى كىنالىنى ۇستامادى.
«ول ءتىپتى بالانىڭ اتا-اناسىنا دا كەلمەدى, كىناسىن مويىندامادى. جول-كولىك وقيعاسىنا بايلانىستى ساراپتامالار جاسالعان جوق. پوليتسيا قىزمەتكەرلەرى كولىكتەن قاندى ءسۇرتىپ قويعان, بالانىڭ اياق كيىمدەرىن مۇلدەم باسقا باعىتتا قويىپ قويعان, ءتىپتى جول جيگەنىدە وتىرعان بالانىڭ سۋرەتىن تاسجولعا سالىپ قويعان», دەيدى مارقۇم بالانىڭ ناعاشىسى.
انىقتالعانداي, كولىك تىزگىندەگەن ايەل مەكتەپتە مۇعالىم بولىپ جۇمىس ىستەگەن.
الماتى وبلىسىنىڭ پوليتسيا دەپارتامەنتى 10 مامىردا سايماساي اۋىلىندا ادام ولىمىمەن اياقتالعان جول-كولىك وقيعاسى بولعانىن راستادى.
«سايماساي اۋىلىندا «وپەل-استرا» كولىگىنىڭ جۇرگىزۋشىسى جولعا شىعىپ كەتكەن جاس بالانى قاعىپ كەتتى. كامەلەتكە تولماعان بالا ەسىن جيماي, اۋرۋحانانىڭ جانساقتاۋ بولىمىندە كوز جۇمدى», دەپ حابارلادى پوليتسيا قىزمەتكەرلەرى.
جول-كولىك وقيعاسىنا قاتىستى قىلمىستىق ءىس قوزعالدى. قاجەتتى ساراپتامالار تاعايىندالدى.
