سونىمەن سكرينينگتىك زەرتتەۋلەردەن قالاي وتۋگە بولاتىنى جونىندە مسق الماتى فيليالىنىڭ ماماندارى تۇسىنىكتەمە بەردى. مەديتسينالىق ساقتاندىرۋ قورىنىڭ مالىمدەمەسىنە سۇيەنسەك, بيىل 228 مىڭعا جۋىق الماتىلىق تۇرعىن ونكولوگيالىق تەكسەرۋلەردەن وتۋگە ءتيىس.
سكرينينگ ارقىلى قانداي دەرتتى انىقتاۋعا بولادى؟
دەنساۋلىقتى بۇلاي تەكسەرۋمەن جاتىر موينى وبىرىن – 30-70 جاس ارالىعىنداعى ايەلدەردەن, ءسۇت بەزى وبىرىن – 40-70 جاس ارالىعىنداعى ايەلدەردەن جانە كولورەكتالدى وبىردى 50-70 جاس ارالىعىنداعى ەرلەر مەن ايەلدەردەن ەرتە انىقتاۋعا بولادى.
سكرينينگتەن ءوتۋ جيىلىگى قانداي؟
سكرينينگتىك زەرتتەۋلەردىڭ كەي ءتۇرى بەس جىل سايىن, كەيبىرى ەكى نەمەسە ءتورت جىل سايىن جاسالادى. مىسالى, ءسۇت بەزى ىسىگى مەن توقىشەك وبىرىنا ەكى جىلدا ءبىر رەت, ال جاتىر موينى وبىرىنا ءتورت جىلدا ءبىر رەت تەكسەرىلۋ قاجەت.
سكرينينگتىك باعدارلاماعا قانداي قىزمەتتەر كىرەدى؟
ايەلدەر جاتىر موينى وبىرىنا تىركەلگەن ەمحانا ارقىلى تەكسەرىلەدى. اكۋشەر-گينەكولوگ, ونكولوگ پەن ماممولوگ سىندى ماماندار كەڭەسىنە جۇگىنىپ, ۋدز, مامموگرافيا سىندى تەكسەرۋلەردەن وتە الادى. سونىمەن قاتار ءسۇت بەزى وبىرىنىڭ الدىن الۋ ءۇشىن ۆيدەوكولپوسكوپيا نەمەسە كولپوسكوپيا, پاپ-تەست, پۋنكتسيالىق بيوپسيا مەن گيستولوگيالىق زەرتتەۋلەرگە تاپسىرۋعا بولادى.
كولورەكتالدى وبىردىڭ الدىن الۋعا ارنالعان تەكسەرۋلەردەن ەرلەر دە, ايەلدەر دە وتۋگە ءتيىس. پروفيلاكتيكالىق ءىس-شارالار بارىسىندا ولار حيرۋرگ, ونكولوگ, گاستروەنتەرولوگ پەن پروكتولوگ مامانداردان كەڭەس الادى. سونداي-اق ۇلكەن دارەتتەگى جاسىرىن قاندى تەكسەرۋ ماقساتىندا شۇعىل ادىسپەن گەموكۋلت-تەست تاپسىرادى. جالپى ۆيدەوكولونوسكوپيا, ەندوسكوپيالىق بيوپسيا جانە گيستولوگيالىق تەكسەرۋلەردەن وتۋگە بولادى. پروفيلاكتيكالىق تەكسەرۋلەر ءمامس پاكەتىنە ەنگەن, سوندىقتان سكرينينگتەن وتەتىن ازامات ساقتاندىرىلعان بولۋى شارت.
سكرينينگ وتكەننەن كەيىن نە ىستەيمىز؟
سكرينينگتىك زەرتتەۋدەن وتكەن پاتسيەنتتەرگە دەنساۋلىعىنان كىنارات تابىلعان, قاتەرلى ىسىكتەرگە كۇدىك انىقتالعان جاعدايدا سالالىق ماماندارعا جولداما بەرىلەدى, قاجەت بولعاندا ەم تاعايىندالادى.
الماتى
