ءوڭىرىمىزدىڭ ەڭ مىقتى بالۋانى اتاعىن جەڭىپ الۋ جانە «قازاقستان بارىسى» رەسپۋبليكالىق تۋرنيرىندە سولتۇستىك قازاقستان وبلىسىنىڭ نامىسىن قورعاۋعا قاتىسۋ ءۇشىن 32 ۇزدىك سپورتشى سايىسقا ءتۇستى. كەڭ سارايدىڭ كورەرمەندەر ورنى دا لىقا تولعان. جۇرتتىڭ بارىنە الىپتاردىڭ ايقاسى قىزىق كورىنەدى.
سولتۇستىك قازاقستان وبلىسى دەنە شىنىقتىرۋ جانە سپورت باسقارماسى ءباسپاسوز قىزمەتىنىڭ مالىمەتىنە قاراعاندا, «قازاقستان بارىسى» رەسپۋبليكالىق ءتۋرنيرىنىڭ وڭىرلىك كەزەڭىنە بارلىق اۋدان بەلسەندى قاتىسىپ, ءوز بالۋاندارىن شىعارعان. بۇل جارىستا سالماعى 95 كيلودان جوعارى تۇيە بالۋاندار كۇرەسەتىنى بەلگىلى. الىپ تۇلعالى جىگىتتەر وبلىستىڭ 13 اۋدانى مەن پەتروپاۆل قالاسىنان ىرىكتەلىپ كەلىپتى. كورەرمەندەردى ريزا قىلىپ قازاقشا ىشتەن, سىرتتان شالىپ ءتۇسىرۋدىڭ ادىستەرىن جەتىك مەڭگەرگەندەر شۋ دەگەننەن العا ءتۇستى.
فينالدا قىزىلجار اۋدانىنىڭ جاس بالۋانى ادىلەت مىرزاش پەن ءۋاليحانوۆ اۋدانىنىڭ تۋماسى, ءتۋرنيردىڭ بىرنەشە دۇركىن جەڭىمپازى التىنبەك اۋساعيتوۆ كەزدەستى. بۇل جەردە جاستىڭ كۇشى مەن ءتىس قاققان بالۋاننىڭ تاجىريبەسى سىنعا تۇسكەندەي بولدى. قىزىلجار اۋدانىنىڭ بالۋانى «قىزىلجار بارىسى» تۋرنيرىنە العاش رەت قاتىسىپ وتىر. ونىڭ جاسى نەبارى – 18-دە عانا. قارا كۇشى كوپ بولعانىمەن ءادىس-ايلاسى جەتىسپەي جاتقانى كورىنىپ تۇر. ال ءۋاليحانوۆ اۋدانىنىڭ وكىلى بۇل جارىسقا بىرنەشە رەت قاتىسقان, ءارى تاجىريبەلى, ءارى كۇرەس ادىستەرىن جەتىك مەڭگەرگەن شەبەر. كورەرمەننىڭ ءىشىن تارتقىزىپ قىزىقتىرعان كۇرەستە وزىق تاجىريبە وزىپ, التىنبەك اۋساعيتوۆ بۇل جولى دا جەڭىسكە جەتتى. ەندى ول رەسپۋبليكالىق «قازاقستان بارىسى» تۋرنيرىندە قىزىلجار ءوڭىرىنىڭ نامىسىن قورعايتىن بولدى.
ءسويتىپ, باس بايگەگە تىگىلگەن 500 مىڭ تەڭگەنى التىنبەك اۋساعيتوۆ ەنشىلەدى. ال جاس بالۋان ادىلەت مىرزاش 300 مىڭ تەڭگەنىڭ بايگەسىن السا, قولا جۇلدەگەر شال اقىن اۋدانىنىڭ بالۋانى باتىرحان قايىربەككە 200 مىڭ تەڭگەنىڭ سەرتيفيكاتى بۇيىردى.
سولتۇستىك قازاقستان وبلىسى
