«وبلىستىق چەمپيوناتتىڭ نەگىزگى ماقساتى – وسكەلەڭ ۇرپاققا اسىق ويناۋدى جەتىك مەڭگەرتىپ, جاسوسپىرىمدەردىڭ قىزىعۋشىلىعىن ارتتىرۋ. جەڭىمپازدار رەسپۋبليكالىق چەمپيوناتقا جولداما الىپ, ەل مىقتىلارىمەن باق سىناسادى. بۇل جارىسقا قىزدارىمىز دا قاتىسىپ, بەس اسىقتان باسەكەگە ءتۇستى. بۇرىن اتا-بابامىز «بەس تاس» ويناعان, سونى «بەس اسىق» دەپ وزگەرتتىك. جالپى, اسىق پەن بەس اسىق ويناۋدىڭ بالا دەنساۋلىعىنا تيگىزەر پايداسى وراسان زور. ەڭ باستىسى, سمارتفونعا تاۋەلدىلىلىكتەن ارىلىپ, قيمىل-قوزعالىسىن ارتتىرادى», دەيدى الماتى وبلىسىنىڭ اسىق اتۋ فەدەراتسياسىنىڭ اتقارۋشى ديرەكتورى ەركىن راقىمباەۆ.
بىلتىر جەلتوقسان ايىندا قۇرىلعان وبلىستىق اسىق اتۋ فەدەراتسياسى ۇيىمداستىرعان بۇل سايىسقا قوناەۆ قالاسى مەن جامبىل, تالعار, قاراساي, ەڭبەكشىقازاق اۋداندارىنان كوماندالار قاتىسىپ, باسەكەلى جارىستىڭ بەل ورتاسىنان تابىلعان. ال اسىق ويناۋدا قارا جەردىڭ شاڭىن شىعاراتىن ناعىز شەبەرلەر شىعارىنا شەك كەلتىرمەيتىن رايىمبەك, كەگەن, بالقاش اۋداندارى شەت قالىپ وتىر. وعان شتاتتىڭ بولىنبەۋى قولبايلاۋ كورىنەدى.
سونىمەن اسىق اتۋدان كوماندالىق جارىستا 1-ورىندى ۇلتتىق سپورت, 2-ورىندى جامبىل اۋدانىنىڭ «جاسۇلان» ۇيىمى, ال 3 جانە 4-ورىندى قاراساي اۋدانى مەن قوناەۆ قالاسىنىڭ ويىنشىلارى يەلەندى.
جەكەلەي جارىستا نۇرالي ورالباي, جاسۇلان جانىبەكوۆ, ەرداۋلەت ەسەنكەلدى مەرگەندىك تانىتىپ, الدىنا قارا سالمادى.
بەس اسىق جارىسىنا قاتىسقان قىزدار دا ويىن كورىگىن قىزدىردى. 2014-2016 جىلعى كىشى جاسوسپىرىمدەر اراسىنداعى باسەكەدە 1-ورىندى قاراساي اۋدانىنىڭ كومانداسى, 2 جانە 3-ورىنداردى تالعار مەن جامبىل اۋدانىنىڭ ويىنشىلارى ۇتىپ الدى.
جەكەلەگەن جارىستا تالشىن اسلانبەكقىزى, بالاۋسا مىقتىبەك, جانەركە سوۆەتحان سىندى شەبەرلەر چەمپيوناتتا تاماشا ويىن ۇلگىسىن كورسەتىپ, تۇعىرعا كوتەرىلدى.
الماتى وبلىسى
