كۇللى الەم كوز تىككەن ادامزات تاريحىنداعى الاپات سوعىستىڭ نۇكتەسىن قويعان قازاقتىڭ باتىر ۇلى راقىمجان قوشقارباەۆ ەدى. ونىڭ ەرلىگى تۋرالى العاش جازۋشى كاكىمجان قازىباەۆ جازدى. رەيحستاگتا جەڭىس تۋىن جەلبىرەتكەن راقىمجان قوشقارباەۆقا باۋىرجان مومىش ۇلىنىڭ ۇيىتقى بولۋىمەن كەڭەس وداعىنىڭ باتىرى اتاعىن بەرۋ تۋرالى ۇسىنىس ورتالىق كوميتەتكە, ماسكەۋگە دەيىن سۇراۋ سالىنادى. كەيبىر دەرەكتەرگە قاراعاندا, 1945 جىلعى 5 مامىردا راقىمجان قوشقارباەۆقا كەڭەس وداعىنىڭ باتىرى اتاعىن بەرۋ تۋرالى ۇسىنىس قوزعالعانىمەن, وعان ماسكەۋ ىقىلاس بىلدىرمەدى. زەرتتەۋشىلەردىڭ ايتۋىنشا, ونىڭ ءبىر سەبەبىن راقىمجاننىڭ اكەسى قوشقاربايدىڭ 1937 جىلى قۋعىنعا ۇشىراپ, «حالىق جاۋى» اتانۋىمەن بايلانىستىرادى. ءسويتىپ, بۇل ىسكە قازاق كسر جوعارعى كەڭەسى پرەزيديۋمىنىڭ توراعاسى جۇمابەك تاشەنوۆ ارالاسىپ, راقىمجاننىڭ كەزىندە باتىرلىققا ۇسىنىلعان مۇراعات قۇجاتتارىن كوتەرتىپ, مارشال ي.كونەۆقا جەتكىزەدى. بىراق ونىڭ سوڭى داۋعا ۇلاسىپ, تورەلىك ايتادى دەگەن ك.ۆوروشيلوۆ تاباندىلىق كورسەتە الماعان. وسىلايشا, باتىر باۋكەڭنىڭ مۇرىندىق بولۋىمەن, كاكىمجان قازىباەۆتىڭ ارالاسۋىمەن باستالعان «مايدانعا» سول كەزدەگى ەلىمىزدىڭ باسشىسى د.قوناەۆتان باستاپ باسقا دا قايراتكەرلەر مەن قالامگەرلەر ءۇن قوسادى. جامپوز جۋرناليست جانبولات اۋپباەۆ ۇزدىكسىز ماقالالار جاريالاپ, قامال العان قاھارماننىڭ ەرلىگىن قايتا جاڭعىرتىپ وتىردى. اقىرىندا ەلىمىز تاۋەلسىزدىك العاننان كەيىن بارىپ, 1999 جىلى 7 مامىردا راقىمجان قوشقارباەۆقا «حالىق قاھارمانى» اتاعى بەرىلدى.
– سودان بەرى راقىمجان قوشقارباەۆتىڭ اتى قايتا جاڭعىرىپ, حالقىمىزدىڭ ماقتانىشىنا اينالدى. ەلىمىزدە باتىردىڭ ەسىمى ەرەكشە اتالىپ كەلەدى. سونىڭ ءبىر كۋاسى – مەكتەبىمىزگە باتىر ەسىمىنىڭ بەرىلۋى. بۇل – مەكتەپ ءۇشىن ۇلكەن مەرەكە. ءبىلىم ورداسىنا باتىردىڭ ەسىمىمەن اتالعانىن ماقتان تۇتامىز. مەكتەبىمىزدىڭ بۇگىنگى ميسسياسى – ۇلتتىق قۇندىلىقتار نەگىزىندە وقۋشىلارعا پاتريوتتىق تاربيە بەرۋ, – دەدى مەكتەپ ديرەكتورى ءلاززات مۇحانبەتقىزى.
جيىنعا قورعانىس مينيسترلىگى تاربيە جانە يدەولوگيالىق جۇمىس دەپارتامەنتىنىڭ باستىعى تىلەۋحان باسقوجاەۆ, الماتى اۋدانى اكىمىنىڭ ورىنباسارى نۇرمات ءابدرايموۆ, الماتى اۋدانى ارداگەرلەر كەڭەسىنىڭ توراعاسى مارات مۇستافين, استانا قالالىق ارداگەرلەر كەڭەسى مەن قوعامدىق كەڭەسىنىڭ توراعاسى سانسىزباي ەسىلوۆ, «نامىس-ارداگەر» قوعامدىق قورىنىڭ توراعاسى تولەگەن تورەگەلدين, ارداگەرلەر كەڭەسىنىڭ مۇشەلەرى بولات تەمىرباەۆ, كەنداي احمەتوۆ, ورتالىق ارداگەرلەر كەڭەسىنىڭ ءبىرىنشى ورىنباسارى ومىرزاق وزعانباي ۇلى, مەكتەپ قامقورشىلىق كەڭەسىنىڭ ءتورايىمى مايرا الىمحانقىزى, اۋعان سوعىسى ارداگەرلەرى جانە جەرگىلىكتى جاۋىنگەرلەر وداعى كەڭەسى توراعاسىنىڭ مىندەتىن اتقارۋشى سەرىك وسپانوۆ, اۋعان سوعىسى ارداگەرلەرى جانە جەرگىلىكتى جاۋىنگەرلەر وداعى كەڭەسى توراعاسىنىڭ ورىنباسارى قانات وماروۆ قاتىستى.
سالتاناتتى جيىندا كوك تۋ كوككە كوتەرىلىپ, اسكەرلەر مەن مەكتەپ وقۋشىلارى اۋەلەتە ءانۇراندى شىرقادى. يگى ءىستىڭ بەتاشار ءسوزىن سويلەگەن قورعانىس مينيسترلىگى تاربيە جانە يدەولوگيالىق جۇمىستار دەپارتامەنتىنىڭ باستىعى, پولكوۆنيك تىلەۋحان باسقوجاەۆ بيىل كەڭەس وداعىنىڭ باتىرى, حالىق قاھارمانى ساعادات نۇرماعامبەتوۆ پەن رەيحستاگقا تۋ تىككەن باتىر, حالىق قاھارمانى راقىمجان قوشقارباەۆتىڭ 100 جىلدىعى ەكەنىن جەتكىزدى.
– ءىس-شارانىڭ ءبارى ۇكىمەت بەكىتكەن كەشەندى جوسپار شەڭبەرىندە وتكىزىلەدى. ونىڭ ءبارى وتان قورعاۋشىلاردىڭ بۇگىنگى جانە بولاشاق ۇرپاعى ءۇشىن ۇلگى بولىپ سانالاتىن قازاقتىڭ باتىر ۇلىنىڭ ەسىمىن ماڭگىلىككە قالدىرۋعا ارنالعان. داڭقتى باتىردىڭ ەسىمىن الۋ قۇرمەتتى ءارى جاۋاپكەرشىلىگى جوعارى, – دەدى ول.
كەلەشەك ۇرپاقتى پاتريوتتىق رۋحتا تاربيەلەپ, وتانعا دەگەن سۇيىسپەنشىلىكتى, ەرلىك پەن ورلىك قاسيەتتى سىڭىرۋدە مەكتەپتىڭ باتىر ەسىمىمەن اتالۋىنىڭ ماڭىزى زور. وسى ورايدا №44 ورتا مەكتەبىنىڭ مۇعالىمى, اۋعان سوعىسىنىڭ ارداگەرى باقىتبەك تەرسەباەۆتىڭ مەكتەپكە راقىمجان قوشقارباەۆتىڭ ەسىمىنىڭ بەرىلۋىنە زور ۇلەس قوسىپتى. ول باتىر تۋرالى تاريحي ەستەلىكتەر مەن مۇرالاردى جيناقتاپ, باتىرعا ارنالعان كابينەتتىڭ اشىلۋىنا ەڭبەك سىڭىرگەن كورىنەدى.
– مەكتەبىمىزگە راقىمجان قوشقارباەۆتىڭ ەسىمىنىڭ بەرىلگەنىنە قاتتى قۋاندىق. حالقىمىزدىڭ ەل قورعاعان ەرلەرى مەن باتىر ۇلدارىنىڭ قاھارماندىعى بالالارىمىزعا, ۇرپاعىمىزعا مۇرا بولىپ, ماڭگى جاساي بەرسىن. وسكەلەڭ ۇرپاقتىڭ بويىندا بەلسەندى ازاماتتىق ۇستانىمدى قالىپتاستىرۋ, وتانسۇيگىشتىك رۋحىندا تاربيەلەۋ ماقساتىندا مەكتەبىمىزدىڭ وقۋشىلارى قالالىق, مەكتەپىشىلىك ساپتىق جاتتىعۋلار مەن ءان بايقاۋلارىنا قاتىسىپ, جۇلدەلى ورىندارعا يە بولدى, – دەدى ب.تەرسەباەۆ.
ال استانا قالاسى ءبىلىم نىساندارىنىڭ تىنىس-تىرشىلىگىن قامتاماسىز ەتۋ جانە اباتتاندىرۋ ءبولىمىنىڭ باسشىسى ءمادينا سۇلەيمەنوۆا جينالعان كوپشىلىكتى مەرەكەمەن قۇتتىقتاپ, راقىمجان قوشقارباەۆتىڭ ءومىرى مەن ەرلىگى تۋرالى ايتىپ بەردى. مەرەكەلىك ءىس-شارادا اق تىلەكتەر اقتارىلىپ, قۇتتىقتاۋلار تولاستاعان جوق. ال باتىردىڭ تۋىستارى دا يگى ىسكە العىس ءبىلدىردى.
– مەن – راقىمجان اعاتايىمنىڭ نەمەرە قارىنداسىمىن. ول كىسىنىڭ قارىنداسى قولىمدا تۇرادى. بۇگىنگى ءوتىپ جاتقان ءىس-شاراعا وتە قۋانىشتىمىن. №44 مەكتەپ اعامنىڭ اتىنا بەرىلىپ جاتىر. جاس ۇرپاق ەشقاشان سوعىس كورمەسىن! – دەدى مارجان نۇرماعانبەتوۆا.
ءبىرى ءبىلىپ, ءبىرى بىلمەس, باتىردىڭ تەگى مۋسين بولعان ەكەن. بىراق ونىڭ اتاسىنا «حالىق جاۋى» جالاسى جابىلعان سوڭ, اۋلەت بولىپ تەگىن وزگەرتۋگە ءماجبۇر بولعان. راقىمجان قوشقارباەۆ تۋرالى وسىنداي از-كەم ەستەلىكتەردى جيىندا تۋىستارى ايتىپ بەردى. ءىس-شارا سوڭىندا قۇرمەت قاراۋىل روتاسى قارۋ-جاراقپەن دەفيلە كورسەتسە, وقۋشىلار «باتىردىڭ ەرلىگى – ەل ەسىندە» اتتى راقىمجان قوشقارباەۆتىڭ ومىرىنەن كورىنىستەر قويدى.
