قازاق كسر وقۋ-اعارتۋ مينيسترلىگىنىڭ 1984 جىلعى 29 مامىرداعى №115-158 بۇيرىعىنىڭ نەگىزىندە, شىمكەنت وبلىستىق اتقارۋ كوميتەتىنىڭ سول جىلعى 5 شىلدەدەگى بۇيرىعىمەن «رەسپۋبليكالىق ورىس ءتىلىن تەرەڭدەتىپ وقىتۋ جانە اسكەري كاسىپكە باعىتتالعان مامانداندىرىلعان مەكتەپ-ينتەرناتى» اشىلدى. 1992 جىلى مينيسترلەر كابينەتىنىڭ 9 شىلدەدەگى №587 «ورىس ءتىلىن تەرەڭدەتىپ وقىتاتىن جانە اسكەري دەنە شىنىقتىرۋعا دايىندايتىن مامانداندىرىلعان مەكتەپ-ينتەرناتتىڭ جاساقتالۋى مەن قايتا اتى بەرىلۋى تۋرالى» قاۋلىسىمەن مەكتەپ «رەسپۋبليكالىق اسكەري مەكتەپ» بولىپ وزگەرتىلدى. ۇكىمەتتىڭ 2003 جىلعى 30 مامىرداعى №497 قاۋلىسىمەن مەكتەپكە كەڭەس وداعىنىڭ باتىرى سابىر راقىموۆ ەسىمى بەرىلدى. ال ۇكىمەتتىڭ 2015 جىلعى 26 قىركۇيەكتەگى №789 «قازاقستان رەسپۋبليكاسى ءبىلىم جانە عىلىم مينيسترلىگى قاراماعىنان قازاقستان رەسپۋبليكاسى قورعانىس مينيسترلىگىنىڭ قاراماعىنا بەرۋ جانە مەملەكەتتىك مەكەمەنى قايتا اتاۋ تۋرالى» قاۋلىسىنا سايكەس كەڭەس وداعىنىڭ باتىرى, گەنەرال-مايور سابىر راقىموۆ اتىنداعى شىمكەنت رەسپۋبليكالىق «جاس ۇلان» مەكتەبى بولىپ اتالدى.
مەكتەپتىڭ ماقساتى – ءبىلىمى تەرەڭ, دايىندىعى مىقتى, شىڭدالعان, اسكەري قارۋ-جاراقتى شەبەر مەڭگەرگەن, وتانىن, مەملەكەت مۇددەسىن قورعاي الاتىن ازاماتتار دايارلاۋ. ۇجىمنىڭ باستى مىندەتتەرىنىڭ ءبىرى – تاربيەلەنۋشىلەردى وتانسۇيگىشتىككە باۋلىپ, بولاشاقتا اسكەري جوعارى وقۋ ورىندارىنا تۇسۋىنە كومەكتەسۋ ماقساتىندا تۇلەكتەردى ۇبت سىناعىنا ساپالى دايارلاۋ جانە جوعارى وقۋ ورنىندا ءبىلىمىن جالعاستىرۋىنا لايىق زاماناۋي ءبىلىم بەرۋ. وسى جىلدار ارالىعىندا مەكتەپتى 3 مىڭنان استام تۇلەك ءبىتىرىپ, ەلىمىز بەن الىس-جاقىن شەتەلدەردىڭ جوعارى وقۋ ورىندارىنا جولداما الدى. باسىم بولىگى قازىردە قارۋلى كۇشتەردىڭ ءتۇرلى سالاسىندا ەڭبەك ەتىپ كەلەدى. ەل اۋماعىندا, وزگە دە مەملەكەتتەردە قاپىسىز قىزمەت اتقارىپ, مەكتەپ ابىرويىن اسقاقتاتىپ ءجۇر.
قىرىق جىل ىشىندە مەكتەپ تۇلەكتەرى قاتارىنان 6 بىردەي گەنەرال, بىرنەشە قوعام قايراتكەرى, كوپتەگەن بيىك لاۋازىم يەلەرى شىقتى. ولار – ۇلاعات ۇياسىنىڭ ماقتانىشتارى.
مەملەكەت تاراپىنان قولعا الىنىپ جاتقان قامقورلىقتىڭ ارقاسىندا, سونداي-اق دەمەۋشىلەردىڭ كۇشىمەن «جاس ۇلان» مەكتەبىنىڭ ماتەريالدىق-تەحنيكالىق بازاسى جىل ساناپ نىعايىپ, ۇلانداردىڭ ساپالى ءبىلىم الۋىنا قولايلى جاعداي جاسالىپ كەلەدى. سوعىس جىلدارىندا وشپەس ەرلىك پەن قايتپاس قايسارلىقتىڭ ۇلگىسىن كورسەتكەن قازاق باتىرى, ورتالىق ازيادان شىققان تۇڭعىش گەنەرال سابىر راقىموۆ اتىنداعى مەكتەپتىڭ تاربيەلەنۋشىلەرى دە باتىر اتاسىنىڭ ەسىمىنە لايىق ەلىمىزدىڭ قورعانى, وتانىمىزدىڭ ناعىز پاتريوتى بولىپ شىعاتىنىنا سەنىم مول.
ايكەن وسپانقۇلوۆا,
رەسپۋبليكالىق «جاس ۇلان» مەكتەبىنىڭ قىزمەتكەرى
شىمكەنت
