«مەملەكەت باسشىسىنىڭ, ۇكىمەتتىڭ تاپسىرماسىنا سايكەس ءبىز دەنساۋلىق ساقتاۋ سالاسىنىڭ دامۋىنا, مەديتسينا ۇيىمدارىنىڭ ماتەريالدىق-تەحنيكالىق بازاسىنىڭ نىعايۋىنا, ولاردىڭ قاجەتتى مەديتسينالىق قۇرال-جابدىقتارمەن قامتاماسىز ەتىلۋىنە, تاپشى كادرلاردى دايارلاۋعا ەرەكشە كوڭىل ءبولىپ كەلەمىز. ەل يگىلىگىنە جاڭا عيماراتتار تابىستاپ, سالا ماماندارىنىڭ حالىققا ساپالى قىزمەت ەتۋى ءۇشىن بارلىق جاعداي جاسالىپ وتىر. وسىنىڭ ناتيجەسىندە وتكەن جىلمەن سالىستىرعاندا انا ءولىمى 5,7 ەسە, سابيلەردىڭ شەتىنەۋى 13,4%-عا تومەندەدى. بىلتىرعى قورىتىندىدا 3 نەگىزگى مەديكو-دەموگرافيالىق كورسەتكىشتىڭ نىسانالى ينديكاتورىنا قول جەتتى. وتكەن جىلى رەسپۋبليكالىق جانە جەرگىلىكتى بيۋدجەتتەن 52,1 ملرد تەڭگە قارالىپ, 23 مەديتسينالىق نىسان بوي كوتەردى. ونىڭ 17-ءسىنىڭ قۇرىلىسى اياقتالدى. بيىل 5,5 ملرد تەڭگە قارجى ءبولىنىپ, 5 نىسان قۇرىلىسى جۇرگىزىلدى, ونىڭ ەكەۋى پايدالانۋعا بەرىلىپ وتىر. بۇعان قوسا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 11 نىسان قۇرىلىسىنا ساتىپ الۋ كونكۋرسى جاريالاندى. مەردىگەرلەر انىقتالىسىمەن قۇرىلىستى باستايمىز. نىساندار جىل سوڭىنا دەيىن قولدانىسقا بەرىلەدى», دەدى وبلىس اكىمى.
وبلىس باسشىسى مينيستردەن قىزىلوردا قالاسى مەن اۋدانداردا سالىنۋعا ءتيىس بىرقاتار مەديتسينالىق نىسان قۇرىلىسىنا قارجى بولۋگە ىقپال ەتۋدى سۇرادى. قىزىلوردا قالاسىنداعى №4 جانە №5 قالالىق ەمحانالاردىڭ قۇرىلىسى شەشىمىن تاپپاي كەلە جاتقانىنا ءبىراز بولدى. وبلىستىق مەديتسينالىق جەدەل جاردەم ستانساسىنىڭ بولىمشەلەرىنە مودۋلدىك جەدەل جاردەم ستانساسىن سالۋ قاجەتتىگى دە انىق بايقالىپ وتىر.
اقمارال شارىپبايقىزى ايماقتىڭ مەديتسينا سالاسىنداعى جەتىستىكتەرىن اتاپ ءوتىپ, ءوڭىر باسشىسى كوتەرگەن ماسەلەلەر زەرتتەلىپ, شەشۋ جولدارى قاراستىرىلاتىنىن ايتتى. باق وكىلدەرىنە ارنالعان بريفينگتە مينيستر مەملەكەت باسشىسىنىڭ تاپسىرماسى اياسىندا اۋىلدىق ەلدى مەكەندەردەگى باستاپقى مەديتسينالىق-سانيتارلىق كومەكتىڭ ساپاسىن ارتتىرۋ جوباسى, مەديتسينا سالاسىندا كورسەتىلەتىن قىزمەتتەر مەن ءمامس جۇيەسىن جەتىلدىرۋدىڭ ماڭىزىنا توقتالىپ ءوتتى. وڭىرلەردەگى مەديتسينا سالاسىنىڭ الەۋەتىن ارتتىرىپ, باعدارلامالار تيىمدىلىگىن جۇزەگە اسىرۋدى كوزدەگەن ساپاردىڭ ماقساتى دا – ماماندارمەن, قاراپايىم جۇرتشىلىقپەن جۇزدەسىپ, ۇسىنىس-پىكىرلەرىن تىڭداۋ. جالپى, كەيىنگى ءۇش جىلدا سالا قىزمەتىنە قاتىستى حالىقتان تۇسكەن ارىز-شاعىمدار ەسەلەي ارتقان. ولاردىڭ باسىم كوپشىلىگى ەمحانالاردىڭ قىزمەتىنە قاتىستى بولىپ وتىر. تۇرعىنداردى جولداما الۋداعى قيىندىقتار, مەديتسينالىق كومەكپەن قامتىلۋداعى تەكسەرىستەردىڭ ۇزاقتىعى دا قاتتى الاڭداتاتىنى انىقتالدى. قازىر مينيسترلىك وسى ماسەلەلەردى كەزەڭ-كەزەڭىمەن شەشۋگە كىرىسىپ, سالاداعى بىرقاتار زاڭدارعا وزگەرىس ەنگىزۋ باستالىپ كەتتى.
ء«بىزدىڭ سالاداعى ەڭ وزەكتى ماسەلەلەردىڭ ءبىرى – مامان جەتىسپەۋشىلىگى. وسى كۇنى قىزىلوردا وبلىسىنىڭ وزىندە عانا 150-دەن اسا دارىگەر مامان جەتىسپەيدى. وسىعان سايكەس, وبلىس اكىمدىگى جانە وبلىستىق دەنساۋلىق ساقتاۋ باسقارمالارى مەديتسينالىق وقۋ ورىندارى باسشىلارىمەن بايلانىستى جولعا قويىپ, ءبىلىم الىپ جاتقان ستۋدەنتتەردىڭ وڭىرلەرگە كەلىپ جۇمىس ىستەۋىنە مۇمكىندىك جاساپ وتىر. ەلىمىزدە جۇرەك-قان تامىرلارى اۋرۋىمەن اۋىراتىن ازاماتتاردىڭ كوبەيۋى دە ماسەلەگە اينالىپ وتىرعانىن بىلەسىزدەر. سوندىقتان دا اتالعان اۋرۋدىڭ الدىن الۋ جانە ازاماتتارىمىزدىڭ دەنساۋلىعىن جاقسارتۋ باعىتىنداعى ءتيىستى جۇمىستار قولعا الىندى», دەدى ا.شارىپباەۆا.
ەلدەگى دەموگرافيالىق ءوسىمنىڭ ارتۋىنا ۇلكەن ۇلەس قوسىپ وتىرعان تۇركىستان مەن قىزىلوردا وبلىستارى ءۇشىن بالالار دارىگەرىنىڭ ورنى بولەك. وسى ساپاردا مينيسترلىكتىڭ جاۋاپتى وكىلدەرىنەن بولەك ماماندار دايارلايتىن جوعارى وقۋ ورنى باسشىلارى دا جۇرتتىڭ ۇسىنىس-پىكىرلەرىنە قۇلاق ءتۇردى. ساپار اياسىندا مينيستر جاڭاقورعان, شيەلى اۋداندارىندا بولىپ, ونداعى ەمدەۋ مەكەمەلەرىنىڭ جۇمىسىمەن تانىستى. وبلىس ورتالىعىنداعى كوپسالالى اۋرۋحانا جۇمىسىن كوردى, تۇرعىندارمەن كەزدەستى. ازاماتتاردى جەكە وتىنىشتەرى بويىنشا قابىلدادى.
قىزىلوردا
