دەرەكتەرگە سۇيەنسەك, حان كەنەنىڭ ءبىر قىلىشى وڭتۇستىك قازاقستان وبلىستىق ولكەتانۋ مۇراجايىندا ساقتاۋلى تۇر. مۋزەي قورىنا ءازىمحان كەنەسارين ءوز قولىمەن اپارىپ تاپسىرعان. الايدا اتالعان قىلىش بۇعان دەيىن ەشقانداي كورمە زالىنا قويىلماپتى, تەك تاريحي جادىگەرلەر قورىندا قۇپيا ساقتالعان.
قىلىشتىڭ ءوزى شاعىن, جەڭىل, ۇستاۋعا ىڭعايلى. حاننىڭ جورىققا ۇستايتىن قىلىشى بولسا كەرەك. تىركەۋ كىتاپشاسىندا جادىگەر تۋرالى بارلىق دەرەك جازىلعان. ايتا كەتەيىك, بۇل كىتاپشا زاڭدى قۇجات بولىپ ەسەپتەلەدى.
وندا «152.8-VI-1931. پوداروك ۆنۋكا ك.كاسىموۆا – ازىمحانا كەنەسارينا. سابليا, پرينادلەجاششايا سۋلتانۋ كەنەسارى كاسىموۆۋ. كريۆايا, س نوجنىمي يز كوجي, رۋكاياتكا يز كوستي. ماتەريال جەلەزا. دل. لەزۆيا 70 سم. دل. رۋكاياتكا 15 سم. ستارايا, رجاۆايا» دەپ انىق جازىلعان.
وسى قىلىشتى وڭتۇستىك قازاقستان وبلىستىق ولكەتانۋ مۇراجايىنا وتكىزگەن ءازىمحان كەنەساريننىڭ كىم ەكەنىن بىرەۋ بىلسە, بىرەۋ بىلمەس. ءازىمحان – كەنەسارىنىڭ بايبىشەسى كۇنىمجاننان تۋعان بالاسى احمەتتىڭ ۇلى. بىلايشا ايتقاندا, كەنەسارىنىڭ نەمەرەسى.
ۇلتى ءۇشىن كۇرەسكەن ەردىڭ ءومىرى, ءار ءسوزى مەن ءار زاتى وسكەلەڭ ۇرپاققا قۇندى تاريحي جادىگەر بولۋعا ءتيىس. جاڭا ايتقانىمىزداي, كەنەسارىنىڭ قىلىشى ەشقانداي كورمە زالىنا قويىلماي, قۇپيا قوردا ساقتالىپ كەلەدى. ەگەر تاريحي قىلىش حالىق الدىنا ۇسىنىلىپ جاتسا, جادىگەردى كورگەن جاس ۇرپاق حان كەنەدەي باتىردىڭ عۇمىرىنان ءتالىم الارى ءسوزسىز.
