حالىقارالىق ءبىلىم بەرۋ جونىندەگى امەريكالىق كەڭەستەردىڭ «فلاگمان» باعدارلاماسى, ۇلتتىق ۋنيۆەرسيتەتتىڭ تۇركولوگيا جانە التايستيكا عىلىمي-زەرتتەۋ ينستيتۋتى, شەتەل فيلولوگياسى جانە اۋدارما كافەدراسى بىرلەسىپ ۇيىمداستىرعان كونفەرەنتسيا جۇمىسىنا اقش جانە قازاقستان ديپلوماتتارى, حالىقارالىق ءبىلىم بەرۋ جونىندەگى امەريكالىق كەڭەستەردىڭ (ACCELS) باسشىلارى, «فلاگمان» باعدارلاماسىنىڭ وقىتۋشىلارى, قازاقستان, قحر, اقش, قىرعىزستان ۋنيۆەرسيتەتتەرىنىڭ شەت ءتىلى رەتىندە قازاق جانە ورىس تىلدەرىن وقىتاتىن ماماندار, سونداي-اق «فلاگمان» باعدارلاماسىنىڭ ستۋدەنتتەرى مەن قازۇۋ دوكتورانتتارى قاتىستى.
قازۇۋ-دىڭ باسقارما مۇشەسى – وپەراتسيالىق قىزمەت جونىندەگى پرورەكتورى ەركىن دۇيسەنوۆ حالىقارالىق كونفەرەنتسيا قازاقستاننىڭ مۋلتيلينگۆالدى جانە مۋلتيمادەنيەت ورتاسى جاعدايىندا تىلدىك دايارلىقتىڭ زاماناۋي ترانسفورماتسيالىق مودەلىن تانىمال ەتۋگە باعىتتالعانىن اتاپ ءوتتى. ءال-فارابي اتىنداعى قازۇۋ مەن حالىقارالىق ءبىلىم بەرۋ جونىندەگى امەريكالىق كەڭەستەر (ACCELS, اقش) اراسىنداعى ىنتىماقتاستىق تۋرالى ەكىجاقتى كەلىسىمگە 2014 جىلى قول قويىلعان بولاتىن. قۇجات قازاقستان مەن اقش اراسىنداعى ءبىلىم مەن عىلىمداعى ەكىجاقتى گۋمانيتارلىق قاتىناستاردى ودان ءارى دامىتۋ قاجەتتىلىگىن تەڭ قۇقىلى ارىپتەستىك ىنتىماقتاستىققا جانە تانۋعا نەگىزدەلگەن.
10 جىل ىشىندە «فلاگمان» باعدارلاماسى بويىنشا (Russian Overseas Flagship) ۋنيۆەرسيتەتتە اقش-تىڭ ءتۇرلى جوعارى وقۋ ورىندارىنان 200-دەن استام ستۋدەنت ءبىلىم الدى. بىلتىر شىلدە ايىندا قازۇۋ العاش رەت ءار شتاتتان كەلگەن 15 امەريكالىق ورىس ءتىلىنىڭ مامانىنا – مەكتەپ مۇعالىمدەرى مەن ۋنيۆەرسيتەت پروفەسسورلارىنا بىلىكتىلىكتى ارتتىرۋ كۋرستارىن وتكىزدى. سونىمەن قاتار بىلتىر اكسەلس جانە قازۇۋ پروفەسسورلارى قاتىساتىن بىرلەسكەن حالىقارالىق جوبا باستالعان ەدى.
كونفەرەنتسيا بارىسىندا قازاقستانداعى اقش ەلشىلىگىنىڭ باس كونسۋلى ەركىن ميشەل, الماتى قالاسىنداعى قر ءسىم وكىلدىگى باسشىسىنىڭ ورىنباسارى يسلامبەك رايىموۆ, ستراتەگيالىق تىلدەر, مادەنيەتتەر جانە وڭىرلەر (اقش) بويىنشا ءبىلىم بەرۋ باعدارلامالارى دەپارتامەنتى ديرەكتورىنىڭ ورىنباسارى كەترين كەشنەر جانە «فلاگمان» باعدارلاماسىنىڭ ستۋدەنتى حلويا ەدجينگتون قۇتتىقتاۋ ءسوز سويلەدى.
قازۇۋ پروفەسسورى ەلەونورا سۇلەيمەنوۆا «فلاگمان» باعدارلاماسىنىڭ تاجىريبەسى: قازاقستاننىڭ مۋلتيمادەنيەتتى جانە مۋلتيلينگۆالدى ورتاسىندا تىلدەردى وقىتۋ» تۋرالى بايانداما جاساپ, و.التىنبەكوۆا, ل.ەكشەمبەەۆا, ز.سابيتوۆامەن بىرلەسىپ جازعان «قازىرگى ورىس ءتىلىنىڭ مورفولوگياسى» وقۋلىعىن تانىستىردى.
پلەنارلىق وتىرىس كەزىندە ءال-فارابي اتىنداعى قازۇۋ-دىڭ قۇرمەتتى دوكتورى, پروفەسسور دەن دەۆيدسون (اقش) «سوڭعى 10 جىلداعى تەستىلىك دەرەكتەر ناتيجەلەرى بويىنشا «فلاگمان» باعدارلاماسىنىڭ ءترانسفورماتيۆتى وقىتۋى» جايلى بايانداماسىن جاساپ, مارتين س.سينتيا (اقش) «فلاگمان» باعدارلاماسىندا بولاشاق كاسىبي شەتەلدىك مامانداردىڭ قۇزىرەتتىلىك بىلىكتىلىگىن باعالاۋعا قاتىستى شەبەرلىك ساعاتىن وتكىزدى. شارا سوڭىندا قاتىسۋشىلار ءوز ويلارىن ءبولىسىپ, پىكىر الماستى.
الماتى
