فوتو: instagram.com. obl_zdrav_kostanay
ساعات 16:10-دا ارقالىق – اقسۇڭقار سانيتارلىق رەيسىن ورىنداعان «ناۆيگاتور» اۋە كومپانياسىنىڭ ان-2 ۇشاعى اۋەگە كوتەرىلگەننەن كەيىن كۇرت تومەن ءتۇسىپ, ەرىگەن قار سۋىنا قونا بەرگەندە اۋدارىلىپ كەتكەن.
بورتتا 2 ەكيپاج مۇشەسى مەن 3 جولاۋشى بولعان, ولاردىڭ بارلىعى ارقالىق قالاسىنداعى قالالىق اۋرۋحاناعا جەتكىزىلگەن. وقيعانىڭ ءمان-جايىن انىقتايتىن كوميسسيا قۇرىلدى.
وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى اۋدارىلىپ كەتكەن ۇشاق بورتىندا جۇرەك تالماسىنا شالدىققان ناۋقاس بولعانىن حابارلادى.
«3 مامىردا ساعات 09:04-تە مەديتسينالىق اۆياتسيانىڭ ەلەكتروندىق پوشتاسىنا 1964 جىلى تۋعان ميوكارد ينفاركتىسى دياگنوزىمەن ناۋقاستى تاسىمالداۋ تۋرالى ءوتىنىش ءتۇستى. ناۋقاستى قوستاناي وبلىستىق اۋرۋحاناسىنا جەتكىزۋ ءۇشىن ساعات 16:09-دا قۇرامىندا ەكى ۇشقىش, دارىگەر جانە فەلدشەر بار سانيتارلىق اۆياتسيا بريگاداسى ارقالىق قالاسىنا ۇشتى. ەكپىندى جەلدىڭ سالدارىنان سانيتارلىق اۆياتسيا اۋەگە كوتەرىلۋ كەزىندە اۋدارىلىپ قالعان», دەلىنگەن باسقارما حابارلاماسىندا.
ناۋقاس ەشقانداي جاراقات الماعان, جاعدايى تۇراقتى. قازىر ارقالىق اۋداندىق اۋرۋحاناسىندا ەمىن جالعاستىرىپ جاتىر. سانيتارلىق اۆياتسيا توبى دا جاراقات العان جوق, قازىر ولار دارىگەرلەردىڭ باقىلاۋىندا.
