سۋرەتتەردى تۇسىرگەن – دميتري ەروفەەۆ
تۇتىنۋشىلار كوبەيگەن سايىن, زاۋىت تا سوعان ساي ونىمدەرىن تۇرلەندىرىپ وتىر. ماسەلەن, بۇعان دەيىن ءسۇت, سارى ماي, قۇرت, ىرىمشىك, ءتۇرلى اشىتىلعان ءسۇت ونىمدەرى شىعارىلىپ كەلسە, ەندى سوعان قوسىمشا گلازۋرلى ىرىمشىك سۇزبەلەرىن ءوندىرۋدى قولعا العان. ءوڭىر اكىمىنىڭ ءباسپاسوز قىزمەتىنىڭ مالىمەتىنشە, كاسىپ يەسى جاڭا جەلىنى ىسكە قوسۋ ءۇشىن ماجارستاننان تاپسىرىسپەن دايىندالعان قۇنى شامامەن 150 ملن تەڭگە بولاتىن ارنايى جابدىق ساتىپ العان. قازىر سونىڭ يگىلىگىن كورىپ وتىر.
جالپى, زاۋىت ماماندارى «JLC» كومپانيالار توبىنىڭ ءسۇت وڭدەۋ كاسىپورىندارىندا وقىتىپ-ۇيرەتۋدەن وتكەن ەكەن. كاسىپورىن قازىر سۇزبەنىڭ 5 ءتۇرىن شىعارادى. مىسالى, جاڭا گلازۋرلى ىرىمشىك سۇزبەسىن ايىنا 16 توننا وندىرەدى. سەبەبى حالىقتىڭ بۇعان سۇرانىسى جوعارى. سوندىقتان ماماندار بارىنشا تالاپقا ساي جۇمىس ىستەۋگە تىرىسادى.
«JLC ءسۇت» جشس زاۋىتىندا ايىنا 2 مىڭ توننادان استام دايىن ءسۇت ءونىمى وندىرىلەدى. وعان قاجەتتى شيكىزات وڭىردەگى شارۋاشىلىقتاردان ساتىپ الىنادى. دايىن ءونىم تالدىقورعان مەن الماتى قالالارىندا جانە جالپى جەتىسۋ وبلىسى اۋماعىندا ساتىلادى. وبلىس ورتالىعىندا زاۋىتتىڭ 21 فيرمالىق دۇكەنى بار. كاسىپورىن 260-تان استام تۇراقتى جۇمىس ورنىن اشقان, ونىڭ 110-ءى ءسۇت وندىرىسىنە تارتىلعان.
«2014 جىلى تالدىقورعان ءسۇت زاۋىتىنىڭ بازاسىندا قۇرىلىس جانە جاڭعىرتۋ جۇمىستارى جۇرگىزىلدى. سونىڭ ناتيجەسىندە كاسىپورىن زاماناۋي جابدىقتارمەن تولىق جاراقتالدى. وسىنىڭ ارقاسىندا ءبىزدىڭ ونىمدەرىمىزدىڭ ءتۇرى جىل سايىن كوبەيىپ كەلەدى. ءبىز ءسۇت ءوندىرىسىنىڭ ءداستۇرلى جانە زاماناۋي ۇردىستەرىن ۇيلەستىرە وتىرىپ, تۇتىنۋشىلارىمىزدىڭ قاجەتتىلىگىن قاناعاتتاندىرۋعا تىرىسامىز. مىسالى, ءبىزدىڭ كاسىپورىندا ەجەلدەن كەلە جاتقان سارى ماي مەن قۇرت جاساۋدىڭ تەحنولوگياسى مەن رەتسەپتى ساقتالعان. جاقىندا زاۋىتتا جاڭا ءونىم – گلازۋرلى سۇزبە شىعارا باستادىق. جاڭا جەلىنى ىسكە قوسۋعا قاجەتتى زاماناۋي جابدىقتار ساتىپ الدىق», دەيدى ءوندىرىس مەڭگەرۋشىسى ءامينا ارىنبەكوۆا.
ول كاسىپورىندا 10 جىلعا جۋىق قىزمەت ەتىپ كەلەدى. زەرتحاناشىدان ءسۇت ءوندىرىسىنىڭ باسشىسىنا دەيىن كوتەرىلگەن ماماننىڭ ايتۋىنشا, تۇتىنۋشىلاردىڭ ءونىمدى جاقسى قابىلدانعانىنا كوز جەتكىزگەن سوڭ بيىلدان باستاپ كوكوس, قۇلپىناي قوسىلعان تاعى 2 ءتۇرىن قوسقان.
«جابدىقتار شىعارعان زاۋىتتىڭ ماماندارى ىسكە قوسۋ-باپتاۋ جۇمىستارىن جۇرگىزدى. ءبىز وسى قۇرال-جابدىقتارمەن قالاي جۇمىس ىستەۋ كەرەكتىگىن ۇيرەندىك. وسىلايشا, وتكەن جىلدىڭ شىلدەسىنەن باستاپ سۇزبە ءوندىرۋدى قولعا الدىق. نارىقتاعى سۇرانىستى زەرتتەي وتىرىپ, ىرىمشىكتىڭ ءۇش ءتۇرىن: شوكولاد, قويۋلاتىلعان ءسۇت پەن ۆانيل شىعارۋدى باستادىق», دەيدى ءا.ارىنبەكوۆا.
زاۋىت باسشىلىعىنىڭ ايتۋىنشا, سۇزبە ىرىمشىكتەرى كاسىپورىندا وندىرىلەتىن جاڭا ءونىم بولۋىنا بايلانىستى ولار قازىر وزىندىك قۇنىنا ساتىلۋدا, ماسەلەن زاۋىتتىڭ فيرمالىق دۇكەندەرىندە 1 داناسى 150 تەڭگە تۇرادى. ازىرگە قويۋلاتىلعان ءسۇت پەن ۆانيل قوسىلعان ىرىمشىكتەرگە دەگەن سۇرانىس جوعارى.
كاسىپورىن الداعى ۋاقىتتا سارى ماي وندىرەتىن جەكە تسەح اشۋدى جوسپارلاپ وتىر. اتاپ وتسەك, وتكەن جىلى «JLC ءسۇت» زاۋىتى 115 توننا سارى ماي ءوندىردى, ال قازىر ايىنا شامامەن 15-20 توننا وندىرىلۋدە.
وبلىستىق اۋىل شارۋاشىلىعى باسقارماسىنىڭ مالىمەتىنشە, بۇگىندە جەتىسۋدا 8 280 باسقا ارنالعان 36 تاۋارلى ءسۇت فەرماسى بار. ءساۋىر ايىنىڭ باسىندا متف-دا 8 600 تونناعا جۋىق ءسۇت وندىرىلگەن. جالپى, وسى جىلى وڭىردە مال باسى تاعى 2,5 پايىزعا وسەدى دەپ كۇتىلۋدە. دەمەك الداعى ۋاقىتتا 10 مىڭ توننادان استام ءسۇت وڭدەۋگە مۇمكىندىك تۋماق.
جەتىسۋ وبلىسى
