فوتو: ن.بايبۋلين
پالاتا سپيكەرى ءوز سوزىندە مەملەكەت باسشىسى ورنىقتى دامۋ ماسەلەلەرىنە ۇنەمى باسا ءمان بەرەتىنىن اتاپ ءوتتى. بۇگىندە وسى سالاداعى وڭ وزگەرىستەردى كوزدەيتىن جۇيەلى شارالار جۇزەگە اسىرىلىپ, جاڭا جوبالار ازىرلەنىپ جاتىر. سونىڭ بارىسىندا ودم-عا قول جەتكىزۋ باعىتىنداعى بىرلەسكەن ءىس-قيمىلدىڭ ءتيىمدى تەتىكتەرىنىڭ ءبىرى رەتىندە اكسەلەراتور ءوز جۇمىسىن باستاپ وتىر. ونىڭ اياسىندا جەتى جوبالىق-زەرتتەۋ توبى 100 كۇن بويى سەناتور-كۋراتورلارمەن بىرگە «مىقتى دەنساۋلىق جانە يگىلىك», «ساپالى ءبىلىم», «لايىقتى ەڭبەك جانە ەكونوميكالىق ءوسۋ», «ورنىقتى قالالار مەن ەلدىمەكەندەر» جانە «بەيبىتشىلىك, ادىلدىك جانە ءتارتىپ» سياقتى ورنىقتى دامۋ ماقساتتارىنا قول جەتكىزۋ جولىندا جۇمىس ىستەيدى. توپتاردىڭ جۇمىسىنىڭ ناتيجەسى اقمولا وبلىسىندا پيلوتتىق جوبالار رەتىندە ىسكە اسىرىلاتىنىن اتاپ وتكەن ءجون.
ماۋلەن اشىمباەۆ اتاپ وتكەندەي, ساراپشىلار كومانداسى وسىنداي فورماتتا جۇمىس ىستەي وتىرىپ, زاڭنامانى جەتىلدىرۋ ءۇشىن الەۋەتى جوعارى سالالار مەن ورنىقتى دامۋ ماقساتتارىنا قول جەتكىزۋ جولىنداعى كەدەرگىلەردى انىقتاي الادى.
«پرەزيدەنتىمىزدىڭ تاپسىرماسى بويىنشا پارلامەنتتە ورنىقتى دامۋ سالاسىنداعى ۇلتتىق ماقسات-مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى كوميسسيا قۇرىلدى. وڭىرلەرمەن بىرلەسكەن ءىس-ارەكەتتىڭ ناتيجەسىندە اكسەلەراتور ءوز جۇمىسىن باستاپ وتىر. ول ورنىقتى دامۋ ماقساتتارىن جۇزەگە اسىرۋ اياسىنداعى جۇيەلى جۇمىستى جالعاستىرىپ, ءتيىمدى شەشىمدەر ازىرلەۋدىڭ ماڭىزدى تەتىگى بولادى دەپ سەنەمىز. الداعى ۋاقىتتا ءبىز كوماندالاردان ماڭىزدى ماسەلەلەردى شەشۋگە ارنالعان زاڭ جوبالارى بويىنشا تىڭ باستامالار, سونداي-اق, ورنىقتى دامۋ ماقساتتارىنا قول جەتكىزۋ جانە وڭىرلەردى دامىتۋ جونىندە ناقتى ۇسىنىستار كۇتەمىز», دەپ ماۋلەن اشىمباەۆ وسى باعىتتا بىرلەسىپ بەلسەندى جۇمىس ىستەپ كەلە جاتقان ساراپشىلارعا العىس ءبىلدىردى.
ايتا كەتەيىك, اكسەلەراتور كوماندالارىنىڭ قۇرامىنا سەنات جانىنداعى جاس ساراپشىلار كلۋبىنىڭ مۇشەلەرى, تالداۋ مەكتەبىنىڭ تۇلەكتەرى, Maqsut Narikbayev University-ءدىڭ عالىمدارى جانە شاقىرىلعان ساراپشىلار ەندى.
