تۇركسوي حالىقارالىق ۇيىمىنىڭ باس حاتشىسى سۇلتان راەۆتىڭ قولداۋىمەن وتكەن اۋقىمدى ءىس-شارا كونفەرەنتسيادان باستاۋ الدى. كونفەرەنتسيا بارىسىندا قازاقستاننىڭ تۇركياداعى ەلشىسى ەركەبۇلان وڭالبەك ۇلى ەكى ەلدىڭ مادەني قارىم-قاتىناسىن دامىتۋ دەڭگەيى ارتقانىن اتاپ ايتتى. سونداي-اق قازاقستان جازۋشىلار وداعىنىڭ توراعاسى مەرەكە قۇلكەنوۆ ادەبي مۇرانى باۋىرلاس مەملەكەتتەردە دارىپتەۋدىڭ ماڭىزىنا توقتالدى.
جيىندا ءسوز العان الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىم ۇيىمداستىرۋشىلارعا العىس ايتىپ, ءوڭىر باسشىسى مارات ەلەۋسىز ۇلىنىڭ جىلى لەبىزىن جەتكىزدى.
«ەكى ەلدىڭ اراسىندا مادەني ىنتىماقتاستىقتى دامىتۋ ماقساتىندا تۇركسوي حالىقارا-لىق ۇيىمىمەن بىرلەسكەن جۇمىس جوسپارى جاسالعان. سونىڭ اياسىندا قازاق ادەبيەتىنىڭ كلاسسيگى بەردىبەك سوقپاقباەۆتىڭ 100 جىلدىق مەرەيتويى حالىقارالىق دەڭگەيدە اتالۋدا. اتالعان ۇيىمنىڭ قولداۋىمەن ماڭىزدى حالىقارالىق جوبا قولعا الىنىپ وتىر. ول – بەردىبەك سوقپاقباەۆتىڭ «ولگەندەر قايتىپ كەلمەيدى» رومانىنىڭ جازىلعانىنا 40 جىل تولۋىنا بايلانىستى, تاماشا تۋىندى تۇرىك تىلىنە اۋدارىلدى. وسى ىسپەتتەس يگى ءىس-شارالاردىڭ باسىنان تابىلعان ءاربىر ازاماتقا العىس بىلدىرەمىن», دەدى وبلىس اكىمىنىڭ ءبىرىنشى ورىنباسارى نۇرلان ەرعالي ۇلى.
مەرەيتوي اياسىندا حالقىمىزدىڭ رۋحانياتىنا وشپەس مۇرا قالدىرعان جازۋشىنىڭ جەكە زاتتارى, كىتاپتارى مەن ەكسپوناتتار قويىلعان كوشپەلى كورمە ۇيىمداستىرىلدى. كورمەدە كەگەن اۋداندىق تاريحي-ولكەتانۋ مۋزەيىنىڭ نەگىزگى قورىندا ساقتالعان بەردىبەك سوقپاقباەۆتىڭ قولشاتىرى, ساعاتى, وتباسىلىق سۋرەتتەرى جانە تاعى باسقا دا زاتتارى كوپشىلىك نازارىنا ۇسىنىلدى.
تۇركيانىڭ تورىندە وتكەن مادەني-ادەبي ءىس-شارادا مەملەكەتتىك سىيلىقتىڭ لاۋرەاتى, داۋلەسكەر كۇيشى-كومپوزيتور سەكەن تۇرىسبەكتىڭ جەتەكشىلىگىمەن «اقجاۋىن» كامەرالىق وركەسترى ونەر كورسەتتى. كونتسەرتتە قازاق كومپوزيتورلارىنىڭ تۋىندىلارىمەن قاتار, تۇرىك ەلىنىڭ اۋەزدى اندەرى ورىندالدى.
تۇرىك جۇرتى قارىمدى قالامگەردىڭ شىعارمالارىمەن تانىسىپ, كۇي تىڭداپ, قازاقتىڭ مۋزىكا ونەرىن تاماشالادى.
الماتى وبلىسى
