اعاش تاقتادان (فانەر) ءتورت بۇرىشتى پىشىندە كەپتىرىلگەن جەمىس سالۋعا قولايلى قوراپشالار جاساپ, ونى ينتەرنەت-دۇكەن ارقىلى ساتىپ, كاسىپ كوزىن تابۋ تۋرالى بولەسىنىڭ ۇسىنىسىن قابىل الىپ, نار تاۋەكەلگە بەل بۋادى. دەنساۋلىعىنداعى كىناراتتى العا تارتىپ, قول قۋسىرىپ وتىرۋ ولجاسقا ءتان قاسيەت ەمەس. تاعدىردىڭ اۋىرتپالىعىنا مويىماي ەڭبەك ەتىپ, اتا-اناعا سەپتەسىپ, وتباسىن اسىراۋ – ازاماتتىق پارىزى. وسى جولدا وقىپ-توقىپ, ىزدەندى.
الماتى قالاسىنداعى ەستۋ قابىلەتى تومەن بالالارعا ارنالعان №5 ارنايى مەكتەپ-ينتەرناتتا وقىپ, ءبىلىم العان جاس تالانت الماتى مەملەكەتتىك پوليتەحنيكالىق كوللەدجىن تامامداعان. جاستايىنان سپورتقا جاقىن ولجاس قازاق سپورت جانە تۋريزم اكادەمياسىنىڭ تۇلەگى اتانادى. الادوپ تەۋىپ وسكەن ول كىشكەنتايىنان فۋتبولشى بولۋدى ارمانداعان ەكەن. فۋتبول جارىسىنا قاتىسىپ, ەلىمىزدىڭ كوپتەگەن قالاسىندا بولعانىن ماقتان ەتەدى. ەستۋ قابىلەتى تومەن ۇلتتىق قۇراما ساپىندا قىزىقتى ويىن ورنەگىن كورسەتكەن ساتتەرى كۇنى كەشە سياقتى ەدى. قازىر دە الماتى قالاسى اتىنان جارىستارعا ارا-تۇرا شاقىرتۋ الىپ تۇرادى. الايدا اۋىل الىستا بولعاندىقتان ءار كەز قاتىسۋدىڭ مۇمكىندىگى بولا بەرمەيدى.
تۇلا بويى تۇڭعىشىنىڭ كەمىستىك كورمەۋىنە كۇش سالعان اتا-اناسىنىڭ بارماعان جەرى, اشپاعان ەسىگى قالماعان. الايدا ەش ناتيجە بولماعان سوڭ ولجاس قاناتوۆقا 3-دارەجەلى مۇگەدەكتىك تاعايىندالعان. جۇرەككە سالماق سالسا دا ۇلىنا جان جاراسىن سەزدىرمەي, دەمەۋ بولۋعا دايار اكەسى ولجاستىڭ يكەمدى كاسىبىن ىلگەرىلەتۋىنە دەمەۋشىلىك جاسايدى. ءۇيىنىڭ ىرگەسىندەگى ۇيشىكتەي بولمەگە اعاش تىلەتىن ستانوك قويىپ, قوراپشالار جاساۋىنا قولايلى جاعداي جاساپ بەرگەن. ال اناسى مەن جان جارى باعلان دايار بولعاندارىن لاكتاپ, جيناپ, تاكسيمەن قالاعا جونەلتۋدى مىندەتىنە العان.
– ء«ان ايتساڭ دا, جانىڭدى جەپ ايتاسىڭ» دەمەكشى, كاسىپپەن اينالىسۋدىڭ قيىندىعى از ەمەس. سول سەبەپتى قولىنان ءىس كەلىپ, العا ۇمتىلىپ تۇرعان ۇلىمىزعا اكەسى, باۋىرى بولىپ جابىلا قولعابىس جاساۋعا جۇمىلدىق. باستاپقىدا اعاش جۇمىسىنا كەرەك-جاراعىن الىپ بەردىك. سودان كەيىن كاسىپكەرلىكتى قولداۋ بويىنشا وقىپ, ارنايى سەرتيفيكات الىپ, سونىڭ نەگىزىندە 583 000 تەڭگە مەملەكەتتىك قايتارىمسىز گرانت الدى. سول اقشانىڭ ۇستىنەن ءوز قارجىمىزدى قوسىپ, 1 ملن 350 مىڭ تەڭگەگە جازۋ جازاتىن لازەرلىك ستانوك الىپ بەردىك. وسىلايشا كاسىبىن باستادى. جۇمىستىڭ جەڭىلى جوق. تابىسقا جەتۋ ءۇشىن تاباندىلىق كەرەكتىگىن ۇلىمىز دا ۇيرەندى. سونىڭ ناتيجەسىندە ءۇش جىل بۇرىن باستاعان كىشكەنە كاسىبى تۇراقتى تابىس كوزىنە اينالىپ, وتباسىن اسىراپ وتىر, – دەيدى اناسى ەلميرا تىشتىباەۆا.
وتىزىندا وردا بۇزۋعا ۇمتىلعان ولجاستىڭ ەڭبەك ونىمدىلىگى ەسەلەنە تۇسكەنى انىق. «Jidek» دەگەن برەندتىك بەلگىسى بار كەپتىرىلگەن جيدەكتىڭ سان ءتۇرىن سالۋعا ارنالعان تابيعي تازا قوراپشالاردىڭ 250-300-ءىن ون كۇننىڭ ىشىندە جاساپ شىعارۋعا ابدەن توسەلگەن. وسىنشاما زاتتىڭ تاقتايشالارىن قيىپ, قۇراستىرىپ, دايىن ءونىمدى جيناۋعا جۇمىس ورنى تارشىلىق ەتىپ وتىر.
مۇگەدەكتىگىنە قاراماي ەڭبەك ەتىپ وتىرعان كاسىپ يەسىنىڭ الداعى ارمانى – تسەحتىڭ اۋماعىن كەڭەيتىپ, زاماناۋي ستانوكتار قويىپ, جۇمىس كولەمىن ارتتىرۋ, ىسكە بەيىم اۋىل ازاماتتارىن جۇمىسپەن قامتۋ, وتاندىق ءونىمدى كوبەيتۋ. ومىرلىك قوساعى باعلان تالعاتقىزى دا ىسمەرلىكتى مەڭگەرگەن ەكەن. ول دا وندىرىستىك ءىس ماشيناسىن الۋدى ارماندايدى. ەكى جۇرەكتىڭ نيەتى ءبىر – ورتاق كاسىپتەرىن كەڭەيتۋ.
– جوعارى ءبىلىمىم بولسا دا ءبىزدىڭ اۋىلدا دەنەشىنىقتىرۋ پانىنەن ساباق بەرە المايمىن. سەبەبى مەن ساباق بەرەتىندەي ارنايى مەكتەپ جوق. قۇلاعىمنىڭ ەستىمەيتىنىنە بايلانىستى قالاعان جەردە جۇمىس ىستەي المايمىن. سوندىقتان كوپ ۋاقىت جۇمىسسىز ۇيدە وتىردىم. وتباسىن قۇرعاننان كەيىن قارجىلىق قيىندىق تۋدى. كەلىنشەگىممەن دوسىمىزدىڭ تويىندا تانىستىق, ول دا ءوزىم سياقتى مۇمكىندىگى شەكتەۋلى جان, ەكەۋمىز ىم-يشارا ءتىلى ارقىلى سويلەسەمىز. شاڭىراق كوتەرگەنىمىزگە بيىل 4 جىل تولادى. العاشقى كەزدە وتباسىم كومەكتەستى, اسىرەسە, اكەم. ول قاجەت قۇرالداردى تاۋىپ بەرىپ وتىردى, العاشقى فانەردى كەسۋگە قاجەت الماس ارانى اكەم ەكەۋمىز قولدان جاسادىق, كەيىن تاپقان تابىسىما ەلەكترلى ءتۇرىن ساتىپ الدىم. بارلىق جۇمىستىڭ ءوز قيىندىعى بار, دەسە دە مەن ءۇشىن فانەردى كەسۋ, ولشەۋ, قۇراستىرۋ اۋىر بولدى. سوسىن الماس ارا – وتە قاۋىپتى تەحنيكا. ونىمەن جۇمىس ىستەۋدە وتە مۇقيات بولۋ كەرەك. ءبىر كۇنى ءبىر كومپانيا 500 قوراپ دايىنداۋعا تاپسىرىس بەردى. ۋاقىتى وتە قىسقا ەدى. تاڭعا دەيىن جاساپ, ارەڭ وتكىزدىك. تاپسىرىس بەرەتىن كومپانيا الماتىدا بولعاندىقتان جەتكىزۋ دە قيىن بولدى. تۇنىمەن تاكسيگە ارتىپ ارەڭ ۇلگەردىك. بىراق تۇگەل وتكىزىپ, اقشاسىن العان كەزدە قاتتى قۋاندىق, – دەيدى ولجاس.
ەلەكترلى ستانوكتار ىستەن شىعىپ قالسا, ونى جاساۋعا ارنايى ماماندى الماتىدان شاقىراتىن كەزدەرى دە بولادى. كەيدە ءتىپتى اۋىلدا فانەر تابىلماي قالعان كەزدەرى تاپسىرىستى توقتاتپاۋ ءۇشىن 60 شاقىرىم جەردەگى جاركەنت قالاسىنا دەيىن ىزدەپ سابىلعان. سونداي-اق ول 5 ميلليوندىق گرانتقا قاتىسقانىمەن, ونى جەڭە الماعانىنا قىنجىلىس ءبىلدىردى.
– تاپسىرىس قىس ايلارىندا, اسىرەسە, مەيرام كەزدەرىندە جاقسى تۇسەدى. قىس مەزگىلىندە ورتاشا تابىسىم جارتى ميلليونعا جۋىقتايدى. جاز ايلارىندا باسەڭسىپ قالادى. سوندىقتان قوسىمشا تابىس كوزى رەتىندە جيھاز قۇراستىرۋ, كەيدە ساۋدا ورىندارىندا قارا جۇمىسپەن اينالىسامىن. ال اۋىلدا ايەلىمە جۇمىس بولماعاندىقتان ول قالاداعى جۇمىستاردى جاعالايدى. قىزىمىز ءوسىپ كەلە جاتىر. بالامىزدىڭ بولاشاعىن ويلايمىز. باقىتتى بولۋىنا جاعداي جاساعىمىز كەلەدى, – دەيدى ول.
الماتى وبلىسى
