فوتو: قر تجم
جىلىوي اۋدانىنىڭ اكىمى جۇمابەك قاراجانوۆتىڭ مالىمەتىنە سۇيەنسەك, قۇلسارى قالاسىنان ەۆاكۋاتسيالانعان تۇرعىنداردىڭ اراسىندا ءۇيى سۋعا كەتپەگەن تۇرعىندار دا بار.
«قازىر قۇلسارى تۇرعىندارىنىڭ باسىم بولىگى ورالدى. ولاردىڭ ىشىندە تۇرعىن ءۇيى سۋعا كەتپەگەن, بىراق, ەۆاكۋاتسيا جاريالانعان ۋاقىتتا قالادان كەتىپ قالعان ازاماتتار دا بار. وسىلايشا, 12 مىڭعا جۋىق ادام ءوز ۇيىنە ورالدى. تۇرعىنداردىڭ كەيبىرى اعايىن-تۋىستارىنىڭ ۇيىنە ورنالاستى. ءالى دە ەۆاكۋاتسيالىق پۋنكتتەردە, جالدامالى پاتەرلەردە تۇرىپ جاتقان ادامدار بار. تۇرعىندار ۇيىنە دەزينفەكتسيالاۋ جۇمىسىن جۇرگىزىپ, قالپىنا كەلتىرۋدى قولعا الدىق», دەدى جۇمابەك قاراجانوۆ.
وبلىستىق جەدەل شتاب ۇسىنعان مالىمەتكە قاراعاندا, جىلىوي اۋدانىنان 36 مىڭعا جۋىق ادام ەۆاكۋاتسيالانعان.
«قازىر ماڭعىستاۋ وبلىسىنداعى ەۆاكۋاتسيالىق پۋنكتتەردە تۇرىپ جاتقان قۇلسارىلىق تۇرعىنداردىڭ سانى – 1800 ادام. «تەڭىز» قالاشىعىنداعى جاتاقحانالاردا 600-گە جۋىق تۇرعىن قالىپ وتىر. ال قۇلسارى قالاسىنداعى ەۆاكۋاتسيالىق پۋنكتتە 170 ادام ورنالاسقان», دەدى وبلىستىق جەدەل شتاب وكىلدەرى.
