فوتو: primeminister.kz
قازاقستان بيزنەس-دەلەگاتسياسىنىڭ قۇرامىندا سەرىكتەستىكتىڭ جاڭا باعىتتارىن قۇرۋ ءۇشىن «QarMet» كومپانيالارىنىڭ, «Doscar Group» ديلەرلىك ورتالىعىنىڭ (KIA, Chevrolet برەندتەرى), كەنتاۋ ترانسفورماتور زاۋىتىنىڭ, «Kaspy Group» كومپانيالار توبىنىڭ (مەتالل كونسترۋكتسيالارىن دايىنداۋ, اۋىل شارۋاشىلىعى تەحنيكاسىن ءوندىرۋ) وكىلدەرى, زەرتحانالىق سىناقتاردى, مەديتسينالىق ءدارى-دارمەك, ماي ونىمدەرى, كونديتەرلىك ونىمدەر, توقىما جانە باسقا دا تاۋار ءوندىرۋشى كاسىپكەرلەر كەلدى.
بيزنەس-فورۋمنىڭ اشىلۋىندا پرەمەر-ءمينيستردىڭ ورىنباسارى سەرىك جۇمانعارين اۋعانستان دەلەگاتسياسىنىڭ قازاقستانعا ساپارى قورىتىندىسىنا سايكەس ەكىجاقتى تاۋار اينالىمىن $3 ملرد-قا دەيىن ارتتىرۋ مىندەتى قويىلعانىن ەسكە سالدى.
ء«بىز حيميا ونەركاسىبىندەگى, تاۋ-كەن مەتاللۋرگيا كەشەنىندەگى ءوندىرىستى بىرلەسىپ دامىتۋدى, اۋعانستان اۋماعىندا قاتتى پايدالى قازبالاردى گەولوگيالىق بارلاۋ, يت-تەحنولوگيار سالاسىندا, ءوندىرۋ جانە وڭدەۋ بويىنشا بىرلەسكەن جوبالاردى ىسكە اسىرۋ جونىندەگى ءوزارا ءىس-قيمىلدى قاراستىرۋدى ۇسىنامىز. قازاقستان تاراپى اۋعانستاندا اۆتوكولىكتەرگە قىزمەت كورسەتەتىن ديلەرلىك ورتالىقتاردىڭ ورنالاسۋ ورنىن كەيىننەن انىقتاي وتىرىپ, وتاندىق ءوندىرىستىڭ اۆتوموبيلدەرىن جەتكىزۋگە مۇددەلى», دەدى س.جۇمانعارين.
ەكى ەلدىڭ جوعارى ءبىلىم جانە عىلىم سالاسىنداعى ىنتىماقتاستىعى اياسىندا سەرىك جۇمانعارين اۋعانستان ازاماتتارىنا قازاقستاننىڭ جوعارى وقۋ ورىندارىندا وقۋعا بەرىلەتىن گرانتتاردىڭ جىل سايىنعى سانىن 30-دان 60-قا دەيىن ارتتىرۋدى ۇسىندى. سونداي-اق ۆيتسە-پرەمەر اۋعانستاننان كەلگەن 30 بالانى قازاقستاننىڭ جازعى لاگەرلەرىندە 10 كۇن دەمالۋعا شاقىردى.
اۋعان كاسىپكەرلەرىنىڭ اراسىندا قازاقستاندىق اۋىل شارۋاشىلىعى ونىمدەرىنە سۇرانىس ءالى دە جوعارى. بيزنەس-فورۋم قورىتىندىسى بويىنشا $12 ملن-نان استام سوماعا كۇنباعىس مايى, ءداندى داقىلدار مەن ۇن جىبەرۋ تۋرالى كەلىسىمدەرگە قول جەتكىزىلدى. اۋعان كومپانيالارى موتور مايىنا ۇلكەن قىزىعۋشىلىق تانىتىپ, وتاندىق جەتكىزۋشىلەرمەن وسى تاۋاردى جەتكىزۋگە العاشقى كەلىسىمشارتقا قول قويۋدى جوسپارلاپ وتىر.
ايتا كەتۋ كەرەك, گەرات قالاسىندا قازاقستان ساۋدا ءۇيى رەسمي تۇردە اشىلىپ, ءوز جۇمىسىن باستادى, سونداي-اق ول قازاقستان-اۋعانستان ساۋدا-ەكونوميكالىق قارىم-قاتىناستارىنىڭ جاندانۋىنا ىقپال ەتەتىن بولادى.
سونىمەن قاتار قازاقستاندىق دەلەگاتسيانىڭ اۋعانستانعا رەسمي ساپارى اياسىندا «ەلەكتروندىق ۇكىمەت» بويىنشا وتاندىق ازىرلەمەلەردىڭ ەڭ ۇزدىك شەشىمدەرى تانىستىرىلدى.
«ۇلتتىق اقپاراتتىق تەحنولوگيالار» اق وكىلدەرى «Data Lake», «Smart Bridge» جانە «Gov.kz» سياقتى ۇزدىك قازاقستاندىق شەشىمدەردى ەنگىزۋدىڭ مۇمكىندىكتەرى مەن ەكونوميكالىق تيىمدىلىگىن كورسەتتى.
«بۇگىندە قازاقستان مەملەكەتتىك قىزمەتتەردى ونلاين فورماتقا كوشىرۋ بويىنشا الەمدە العاشقىلاردىڭ قاتارىندا. ءبىز تاجىريبەمىزبەن بولىسۋگە جانە اۋعان سەرىكتەستەرىمىزگە ۇزدىك تاجىريبەلەردى بەرۋگە دايىنبىز. ءبىز ءۇشىن تاعى ءبىر باسىم باعىت – مەكتەپتەرگە ينتەرنەت قوسۋ. ءبىز بارلىق وقۋشىنىڭ ءبىلىم الۋعا قولجەتىمدىلىگىن قامتاماسىز ەتۋ ءۇشىن قاجەتتى قولداۋدى كورسەتۋگە دايىنبىز», دەدى س.جۇمانعارين.
سونداي-اق تاراپتار «قازاقتەلەكوم» اق مەن «اۋعانتەلەكومنىڭ» كوممەرتسيالىق ىنتىماقتاستىعى اياسىندا اۋعانستانعا ينتەرنەت ترافيگىن 60-تان 100 گبيت/س-قا دەيىن كەڭەيتۋ مۇمكىندىكتەرىن تالقىلادى.
