حالىقارالىق دەڭگەيدەگى وتىرىسقا ءۇندىستان, يران, قىتاي, قىرعىز رەسپۋبليكاسى, پاكستان, رەسەي, تاجىكستان, وزبەكستان قورعانىس سالالارىنىڭ باسشىلارى قاتىستى. سونىمەن قاتار ءىس-شاراعا شانحاي ىنتىماقتاستىعى ۇيىمىنىڭ باس حاتشىسى, شىۇ ايماقتىق تەرروريزمگە قارسى قۇرىلىمى اتقارۋشى كوميتەتىنىڭ ديرەكتورى جانە بەلارۋس قورعانىس ءمينيسترى قۇرمەتتى قوناق رەتىندە شاقىرىلدى.
ايتا كەتەيىك, بيىل يران كەڭەسكە ۇيىمنىڭ تولىق مۇشەسى رەتىندە العاش رەت قاتىستى. سونداي-اق وسى جىلى شىۇ-عا بەلارۋس ەلى دە قوسىلادى دەپ كۇتىلىپ وتىر.
جىلدان جىلعا ءورىسى كەڭەيىپ كەلە جاتقان ۇيىمعا ەلىمىزدىڭ توراعالىعى اياسىندا نەگىزگى كوڭىل بولىنەتىن ماسەلەلەر ىشىندە ەكولوگيا سالاسى دا بار. 2024 جىل قازاق ەلىنىڭ باستاماسىمەن شىۇ ەكولوگيا جىلى بولىپ جاريالانعانىن ايتا كەتەيىك.
ەلوردامىزعا ات باسىن تىرەگەن شانحاي ىنتىماقتاستىعى ۇيىمىنا مۇشە مەملەكەتتەر قورعانىس مينيسترلەرىنىڭ كەڭەسىنە قاتىسۋشىلار ەڭ الدىمەن ەكولوگيالىق اكتسياعا قاتىسىپ, ەلىمىزدىڭ قورعانىس مينيسترلىگى عيماراتىنىڭ جانىنا كوشەت وتىرعىزۋ ءراسىمىن جاسادى. سونىمەن بىرگە شەتەلدىك دەلەگاتسيالاردىڭ نازارىنا كەڭەس وداعىنىڭ باتىرى, حالىق قاھارمانى, تاۋەلسىز قازاقستاننىڭ تۇڭعىش قورعانىس ءمينيسترى, ارميا گەنەرالى ساعادات نۇرماعامبەتوۆتىڭ 100 جىلدىعىنا ارنالعان مۇراجاي ەكسپوزيتسياسى ۇسىنىلدى.
ءىس-شارانى ەلىمىزدىڭ قورعانىس ءمينيسترى, گەنەرال-پولكوۆنيك رۋسلان جاقسىلىقوۆ اشىپ, كەڭەستىڭ وڭىرلىك, حالىقارالىق قاۋىپسىزدىكتىڭ وزەكتى ماسەلەلەرى بويىنشا پىكىر الماسۋ جانە ودان ءارى ىنتىماقتاستىق پەرسپەكتيۆالارىن تالقىلاۋ الاڭى رەتىندەگى رولىنە توقتالدى. ول شانحاي ىنتىماقتاستىعى ۇيىمىنىڭ قۇرىلۋى مەن دامۋى وڭىردەگى بەيبىتشىلىكتى, قاۋىپسىزدىك پەن تۇراقتىلىقتى ساقتاۋ ىسىنە ماڭىزدى ۇلەس قوساتىنىن اتاپ ءوتتى.
كەشە سونداي-اق حالىقارالىق ءىس-شارا اياسىندا ۇيىمعا قاتىسۋشى مەملەكەتتەر دەلەگاتسيالارى باسشىلارىنىڭ بىرقاتار ەكىجاقتى كەزدەسۋى ءوتتى.
ايتا كەتەيىك, شانحاي ىنتىماقتاستىعى ۇيىمى 1996 جىلى «شانحاي بەستىگى» دەپ اتاۋمەن قۇرىلعان. ەڭ العاشقىدا ونىڭ قۇرامىنا قازاقستان, قىرعىز رەسپۋبليكاسى, قىتاي, رەسەي, تاجىكستان كىرگەن. 2001 جىلى ۇيىمعا وزبەكستان قوسىلعاننان باستاپ شانحاي ىنتىماقتاستىق ۇيىمى دەگەن اتپەن تۇراقتى جۇمىس ىستەپ كەلە جاتقان ۇكىمەتارالىق ۇيىم. مۇشە-مەملەكەتتەر اراسىندا ءوزارا سەنىم مەن دوستىق, تاتۋلىق قارىم-قاتىناستاردى نىعايتۋ, ساياسي, ساۋدا-ەكونوميكالىق, عىلىمي-تەحنيكالىق, ءبىلىم بەرۋ, قۋات كوزى, كولىك, ەكولوگيالىق جانە وزگە دە سالالاردا ءتيىمدى ارىپتەستىك شارالارىن دامىتۋ, سونداي-اق ورتاق كۇش جۇمساپ ايماقتىق بەيبىت ءومىردى, قاۋىپسىزدىك پەن تۇراقتىلىقتى قامتاماسىز ەتۋ, دەموكراتيالىق, ءادىل جانە ۇتىمدى ساياسي, ەكونوميكالىق حالىقارالىق ءتارتىپ ورناتۋعا جاعداي جاساۋدى ماقسات تۇتقان حالىقارالىق ۇيىمعا بيىل ءبىزدىڭ ەلىمىز توراعالىق ەتەدى.
