فوتو: اشىق دەرەككوزدەن
الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قر قىلمىستىق كودەكسىنىڭ 351-بابىنىڭ 3-بولىگى جانە 293-بابىنىڭ 1-بولىگى بويىنشا دارحان احمەتجانوۆقا قاتىستى قىلمىستىق ءىس قارالدى.
32 جاستاعى د.احمەتجانوۆقا ابايسىزدا 2 نەمەسە ودان دا كوپ ادامنىڭ ولىمىنە اكەپ سوققان بۇزاقىلىق جانە كولىكتى قاۋىپسىز پايدالانۋدى قامتاماسىز ەتۋ ەرەجەلەرىن بۇزۋ (قر قك-ءنىڭ 293-بابى 1-بولىگى, 351-باپ 3-بولىگى) بويىنشا ايىپ تاعىلدى. بۇگىن ءىستىڭ نۇكتەسى قويىلدى.
«قايعىلى وقيعا الماتىدا 2023 جىلدىڭ جەلتوقسانىندا بولدى, د.احمەتجانوۆ ايەل ادام باسقارعان اۆتوبۋسقا ءمىنىپ, جول اقىسىن تولەۋ تۋرالى زاڭدى تالابىنا اگرەسسيامەن جاۋاپ بەرگەن. جانجال كەزىندە د.احمەتجانوۆ اۆتوبۋستى رۇقسات ەتىلمەگەن جەردە توقتاتۋدى تالاپ ەتىپ, جۇرگىزۋشىنىڭ باس تارتۋىنان كەيىن ونىڭ بەتىنەن ەكى رەت ۇرعان. ول ەسىن جوعالتىپ, كولىكتى باسقارا الماي قالعان. سالدارىنان اۆتوبۋس جول جيەگىندە تۇرعان ادامداردى قاعىپ كەتكەن. جول اپاتى سالدارىنان ءۇش ادام وقيعا ورنىندا كوز جۇمىپ, تاعى ءبىر ادام زارداپ شەكتى. سوتتالۋشىنىڭ كىناسى زاتتاي ايعاقتارمەن, ساراپتاما قورىتىندىسىمەن جانە بەينەباقىلاۋ كامەراسىنداعى بەينەماتەريالدارمەن دالەلدەندى», دەلىنگەن جوعارعى سوت حابارلاماسىندا.
د.احمەتجانوۆ ابايسىزدا ەكى جانە ودان دا كوپ ادامنىڭ ولىمىنە اكەپ سوققان بۇزاقىلىق جانە كولىكتى قاۋىپسىز پايدالانۋدى قامتاماسىز ەتۋ ەرەجەلەرىن بۇزعانى ءۇشىن كىنالى دەپ تانىلدى. ول 8 جىلعا باس بوستاندىعىنان ايىرىلدى.
سوتتالۋشىدان جابىرلەنۋشى ك.-نىڭ پايداسىنا 6 397 250 تەڭگە ماتەريالدىق شىعىندى جانە 5 000 000 تەڭگە مورالدىق شىعىندى ءوندىرۋ تۋرالى قاۋلى قابىلداندى.
سونداي-اق جابىرلەنۋشى ب.-نىڭ پايداسىنا 10 000 000 تەڭگە مورالدىق شىعىن وندىرىلەدى.
ۇكىم زاڭدى كۇشىنە ەنگەن جوق.
سوت پروتسەسىندە ايىپتالۋشى ءوزىنىڭ كىناسىن بۇزاقىلىق بابى شەڭبەرىندە عانا مويىندادى.
جوعارعى سوت بۇل پروتسەستى الەۋمەتتىك جەلىدەگى پاراقشالارى ارقىلى ونلاين كورسەتتى.
(فوتو: جوعارعى سوت)
