فوتو: قر اشم بالىق شارۋاشىلىعى كوميتەتى
25 ساۋىردە ماڭعىستاۋ وبلىسى بويىنشا بالىق ينسپەكتسياسى باسقارماسىنىڭ جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ قىزمەتكەرلەرى كاسپي تەڭىزىنىڭ جاعالاۋىن تەكسەرۋ بارىسىندا تۇپقاراعان اۋدانىندا 12 يتبالىق ولەكسەسىن تاپتى.
ينسپەكتسيا مەن جەرگىلىكتى اتقارۋشى ورگانداردىڭ, گيدروبيولوگيا جانە ەكولوگيا ينستيتۋتىنىڭ وكىلدەرىنەن تۇراتىن جۇمىس توبى زەرتتەۋ جۇمىستارىن باستادى.
«يتبالىق ولەكسەلەرى ءشىرىپ كەتكەن, بۇل ولاردىڭ ءولىمى شامامەن قىس مەزگىلىندە بولعانىن بىلدىرەدى. ولار 23 ساۋىردە باستالىپ, بۇگىنگى كۇنگە دەيىن باتىستان سوعىپ تۇرعان داۋىلدىڭ سالدارىنان جاعاعا شىعىپ كەتكەن.
بۇل رەتتە, گيدروبيولوگيا جانە ەكولوگيا ينستيتۋتىنىڭ قىزمەتكەرلەرى ءتيىستى زەرتحانالىق زەرتتەۋلەر جۇرگىزۋ ءۇشىن ىشكى اعزالاردىڭ تىندەرىن, سونداي-اق ازۋ تىستەرىن ءىشىنارا ىرىكتەپ الدى», دەلىنگەن حابارلامادا.
23-24 ءساۋىر ارالىعىندا ينسپەكتسيا گيدروبيولوگيا جانە ەكولوگيا ينستيتۋتىنىڭ قىزمەتكەرلەرىمەن بىرلەسىپ, كاسپي تەڭىزىنىڭ جاعالاۋىن تەكسەرۋ كەزىندە 67 يتبالىق ولەكسەسىن انىقتادى, ولار دا شىرىگەن كۇيدە تابىلدى.
2024 جىلدىڭ 29 ناۋرىزى مەن 25 ءساۋىرى ارالىعىندا بارلىعى 182 يتبالىق ولەكسەسى تابىلدى.
