رەسپۋبليكالىق شتابتىڭ جەتەكشىسى رەتىندە سۋ باسقان بارلىق وڭىرلەرگە بىرنەشە رەت بارىپ, تۇرعىندارمەن جۇزبە-ءجۇز كەزدەسىپ, تىلدەسىپ, قاجەتتىلىكتەرىن ناقتىلادىق. شتاب وكىلدەرىمەن بىرگە ءالى دە زارداپ شەككەن ازاماتتار مەن قۇتقارۋشىلاردى ىستىق تاماقپەن, كيىم-كەشەكپەن, توسەك-ورىندارمەن جانە باسقا دا قاجەتتى قۇرال-جابدىقتارمەن قامتاماسىز ەتىپ كەلەمىز. مەتسەناتتارىمىزدىڭ دەمەۋشىلىگىمەن زارداپ شەككەن وڭىرلەرگە 1 500 توننا ازىق-ت ۇلىك پەن العاشقى قاجەتتىلىك زاتتارىن جەتكىزدىك.
«جۇمىلا كوتەرگەن جۇك جەڭىل» دەگەندەي, بۇگىندە اسسامبلەيا مەتسەناتتارى زارداپ شەككەن ەلدى مەكەندەردى قالپىنا كەلتىرۋ جۇمىستارىنا دا كىرىسىپ كەتتى. قازىردىڭ وزىندە باتىس قازاقستان وبلىسىنا 14 ۆاگون تسەمەنت جونەلتىلدى جانە 5 جاڭا ءۇي تۇرعىزىپ بەرۋ جۇمىستارى باستالعالى تۇر. ارينە, مەملەكەت تاراپىنان دا قاجەتتى كومەك كورسەتىلىپ جاتىر.
ەڭ باستىسى – وڭىرلەردەگى حالىقتىڭ ۇيىمشىلدىعى مەن اۋىزبىرشىلىگى. ازاماتتاردىڭ تۋعان جەرگە دەگەن شەكسىز سۇيىسپەنشىلىگى – ولاردىڭ اپاتپەن كۇندىز-ءتۇنى تىنىمسىز كۇرەسۋىندە انىق بايقالادى. بۇل – ەشقاشان سارقىلمايتىن كۇش.
2020 جىلى ماقتاارال اۋدانىندا دا سۋ تاسقىنى بولعانى ەسىمىزدە. كوپتەگەن ازاماتىمىز ءۇي-جايىنان ايىرىلدى. دەگەنمەن مەملەكەت بىردە-ءبىر ازاماتىن دالادا قالدىرمادى. بارلىعىنا ءۇي سالىپ, جول توسەپ, گاز بەن سۋىن تارتىپ بەردى. سول كەزدە دە وتانداستارىمىز ەل بولىپ, ءبىر كىسىدەي جۇمىلىپ ول اپاتتان امان-ەسەن شىقتىق. حالىق ءالى كۇنگە دەيىن جەدەل اتقارىلعان ىسكە ءدان ريزا.
بيىلعى سۋ تاسقىنى ودان دا كولەمدى, الايدا, ءار قيىندىقپەن بىرگە جەڭىلدىك بار دەمەكشى, ءبىز بۇل سىناقتى اۋىزبىرشىلىك پەن مەيىرىمدىلىك, قامقورلىقتىڭ ارقاسىندا بىرلەسە ەڭسەرەمىز.
اكبارجون يسمايلوۆ,
رەسپۋبليكالىق تاجىك ەتنومادەني ورتالىعىنىڭ توراعاسى
