مەملەكەت باسشىسى ەلىمىز ءۇشىن بۇگىنگىدەي جاۋاپتى كەزەڭدە ۇلتتىڭ بىرلىگى مەن ىنتىماعىن نىعايتۋ اسا ماڭىزدى ەكەنىن اتاپ ءوتتى. قحا وكىلدەرىنە قازاقستاننىڭ بىرقاتار وڭىرىندە بولعان الاپات سۋ تاسقىنىنىڭ سالدارىن جويۋعا بەلسەندى قاتىسقانى ءۇشىن العىس ءبىلدىردى. قازىر اسسامبلەيانىڭ مىڭداعان ەرىكتىلەرى توتەنشە جاعدايدىڭ زاردابىن جويۋ جۇمىستارىنا كومەكتەسىپ جاتىر.
قاسىم-جومارت كەمەل ۇلى اتاپ وتكەندەي, تاسقىننان زارداپ شەككەندەردىڭ بارىنە مەملەكەت تاراپىنان ءتيىستى كومەك پەن قولداۋ كورسەتىلەدى. ەشكىم نازاردان تىس قالمايدى. بيزنەس وكىلدەرى دە بەلسەندى كومەك كورسەتىپ جاتقانىن اتاپ وتكەن ءجون.
سەسسيا بارىسىندا قازاقستان حالقى اسسامبلەياسىنىڭ ەتنوسارالىق كەلىسىمدى نىعايتۋدا, قوعامدا تولەرناتتىلىق, بەيبىتشىلىك جانە تاتۋلىق قۇندىلىقتارىن دارىپتەۋدە ەرەكشە ءرول اتقاراتىنى ايتىلدى.
بۇل ءتيىمدى ءارى حالىققا باعدارلانعان ەكونوميكا مەن دەموكراتيالىق ساياسي جۇيە قۇرۋعا ارنالعان اۋقىمدى ەكونوميكالىق, الەۋمەتتىك جانە ساياسي رەفورمالار جۇزەگە اسىرىلىپ جاتقان قازىرگى كەزەڭدە وتە وزەكتى.
بۇگىندە ەلىمىز ونداعان جىلدار بويى ءتۇرلى سالادا قوردالانىپ قالعان كوپتەگەن پروبلەمانى شەشىپ جاتقانى بەلگىلى. وسى ورايدا قوعامداعى تاتۋلىق, تۇراقتىلىق جانە ءوزارا تۇسىنىستىك كوزدەگەن ماقساتتارعا قول جەتكىزۋدىڭ نەگىزگى شارتتارى ەكەنى انىق.
بۇل اسىرەسە, بۇگىنگىدەي كۇردەلى گەوساياسي احۋال كەزىندە ايرىقشا ماڭىزدى بولىپ وتىر. قازىر كەيبىر ەلدەر اراسىندا جانجال مەن قاقتىعىستاردىڭ ۋشىعا تۇسكەنىن كورىپ وتىرمىز. مۇنى بەلگىلى ءبىر كۇشتەر وزدەرىنىڭ راديكالدى يدەولوگياسىن ناسيحاتتاپ, كسەنوفوبيانى قوزدىرۋ ءۇشىن پايدالانادى. وسىنداي جاعدايدا قازاقستان ءوزارا تۇسىنىستىككە, ديالوگكە جانە كەز كەلگەن سيپاتتاعى راديكاليزم مەن ەكسترەميزمگە مۇلدەم توزبەۋشىلىككە باعىتتالعان كۇن ءتارتىبىن دايەكتى تۇردە دارىپتەپ كەلەدى.
سونىمەن قاتار مەملەكەت باسشىسى اۋقىمدى رەفورمالاردى ىسكە اسىرۋدا جاستار ايرىقشا ءرول اتقاراتىنىن ايتتى.
ەركىن, كرەاتيۆتى, جاڭا يدەيالارعا اشىق, ەڭبەكقور, تولەرانتتى ازاماتتار ارقىلى عانا ۇلتتىڭ جاسامپاز الەۋەتى جۇزەگە اسادى.
سوندىقتان وسكەلەڭ ۇرپاقتىڭ بويىنا دۇرىس قۇندىلىقتاردى ءسىڭىرۋ, ولاردى مەملەكەتتىك تىلگە جانە حالقىمىزدىڭ تاريحى مەن داستۇرىنە قۇرمەتپەن قاراۋعا تاربيەلەۋ اسا ماڭىزدى. بۇل رەتتە جاس بۋىن تاريحقا قاتىستى وكپە-رەنىشتەردەن, دوگماتيزمنەن جانە ەسكىرگەن مادەني ستەرەوتيپتەردەن ادا بولۋى كەرەك.
قازاقستان حالقىنىڭ وسىنداي جاڭا بۋىنىن تاربيەلەۋدە اسسامبلەيانىڭ اتقاراتىن ءرولى زور.
پرەزيدەنتىمىز ناشاقورلىقتىڭ, قۇمار ويىنداردىڭ, تۇرمىستىق زورلىق-زومبىلىق پەن ءۆانداليزمنىڭ زيانى مەن سالدارىنا تاعى ءبىر مارتە توقتالدى. قازىرگى تاڭدا بۇل كەسەلدەرگە قارسى تۇرۋ ءۇشىن اۋقىمدى جۇمىس جۇرگىزىلىپ جاتىر. وسى باعىتتا مەملەكەت پەن قوعامدىق ينستيتۋتتار, اسىرەسە, قازاقستان حالقى اسسامبلەياسى جۇدىرىقتاي جۇمىلۋى قاجەت.
سەسسيا بارىسىندا مەملەكەت باسشىسى قازاقستان حالقى اسسامبلەياسىنىڭ گۋمانيتارلىق الەۋەتىن دامىتۋ جونىندە جاڭا مىندەتتەر جۇكتەدى. 2025 جىلى اسسامبلەيانىڭ قۇرىلعانىنا 30 جىل تولادى. بۇل اتاۋلى داتا ماڭىزدى الەۋمەتتىك جوبالار مەن باستامالاردى ىسكە اسىرۋعا تىڭ سەرپىن بەرەتىنى انىق.
قازىر پارلامەنت سەناتىنىڭ دەپۋتاتتارى پرەزيدەنتىمىز بەلگىلەپ بەرگەن مىندەتتەردى ىسكە اسىرۋعا بەلسەندى اتسالىسىپ كەلەدى. بارلىق زاڭ ەلدەگى تىنىشتىق پەن كەلىسىمدى قامتاماسىز ەتۋ تۇرعىسىنان جان-جاقتى ساراپتالادى. اسسامبلەيادان سايلانعان دەپۋتاتتار باسقا ارىپتەستەرىمەن بىرگە قازاقستاندا تۇراتىن بارلىق ەتنوستاردىڭ مادەني-گۋمانيتارلىق مۇددەلەرىن ەسكەرە وتىرىپ, جۇمىس ىستەيدى.
سەنات الداعى ۋاقىتتا دا مەملەكەت باسشىسىنىڭ ەلىمىزدەگى بەيبىتشىلىك پەن كەلىسىمدى قامتاماسىز ەتۋگە ارنالعان ساياساتىن بەلسەندى تۇردە قولداپ, ادىلەتتى, دەموكراتيالىق جانە تۇراقتى قازاقستان قۇرۋعا ارنالعان كەشەندى رەفورمالاردى ىسكە اسىرۋ ءۇشىن قۇقىقتىق نەگىز قالىپتاستىرۋدى جالعاستىرا بەرەدى.
ماۋلەن اشىمباەۆ,
پارلامەنت سەناتىنىڭ توراعاسى
