ادامنىڭ شىنايى داۋىسىن پايدالانۋ ءۇشىن قاسكويلەر مەسسەندجەرلەردەگى (WhatsApp, Telegram جانە ت.ب.) اككاۋنتتاردى بۇزىپ, داۋىستاپ ايتىلعان حابارلامالاردى كوشىرىپ الىپ, ولاردى نەيروندىق جەلىگە جۇكتەيدى, نە بولماسا داۋىس وزگەرتەتىن تەحنولوگيالاردى قولدانادى. كەيىن سمارتفون يەسىنىڭ داۋىسى اقشا جىبەرۋدى سۇرايتىن وتىنىشكە اينالىپ, داۋىستىق حابارلاما تۇرىندە جىبەرىلەدى, ءتىپتى سول ادامنىڭ اتىنان ماتىنمەن دە كەلۋى مۇمكىن.
سمارتفونعا بۇزىپ كىرۋ ءۇشىن الاياقتار ۇيالى بايلانىس وپەراتورىنىڭ تەحنيكالىق قولداۋ قىزمەتىنەن دەپ قوڭىراۋ شالىپ, تەلەفونعا كەلگەن كودتى ايتۋىن سۇرايدى. زيان تيگىزەتىن سىلتەمەلەر بالالار بايقاۋىنا داۋىس بەرۋ نەمەسە الەۋمەتتىك ماڭىزى بار تاقىرىپتاردا ساۋالناماعا قاتىسۋعا شاقىرۋ تۇرىندە دە جىبەرىلۋى مۇمكىن.
سودان كەيىن ايلاسىن اسىرۋعا كىرىسەتىن قاسكويلەر الاياقتىققا كوشىپ, ادامداردان اقشا الۋ ءۇشىن تۋىسىنىڭ, ارىپتەسىنىڭ, تانىسىنىڭ, قانداي دا ءبىر مەديا-تۇلعانىڭ اتىنان بايلانىسقا شىعادى.
جاساندى ينتەللەكتىڭ ءارتۇرلى قۇرالىمەن مەسسەندجەرلەردە «كۇشتىك قۇرىلىم وكىلدەرىنىڭ» (قر ءىىم, باس پروكۋراتۋرا جانە ت.ب.) اتىنان بەينەقوڭىراۋ شالىپ, ازاماتتاردى قازاقستان ۇلتتىق بانكىمەن «بىرلەسىپ جاسالاتىن» تولەم وپەراتسيالارىنا قاتىسۋعا ۇندەيدى. اڭگىمە بارىسىندا رەزەرۆتەلگەن ۇياشىقتىڭ نەمەسە بروندالعان قاراجاتتىڭ قاعازدارى دەپ ۇلتتىق بانكتىڭ اتىنان جالعان قۇجات ۇسىنادى. ازاماتتاردىڭ سەنىمىنە كىرۋ ءۇشىن جالعان قۇجاتتاردا مەملەكەتتىك ورگانداردىڭ نەمەسە جەكە كومپانيالاردىڭ «ۋاكىلەتتى ادامى» قويعان قولى مەن ونىڭ اتى-ءجونى جانە باسىلعان ءمورى كورسەتىلەدى.
ۇلتتىق بانك ءموبيلدى تەلەفوندى بۇزىپ كىرۋگە جول بەرمەس ءۇشىن كۇدىكتى سىلتەمەلەرگە وتپەۋگە, تەلەفونعا كەلگەن كود پەن ءپارولدى ەشكىمگە ايتپاۋعا جانە جىبەرمەۋگە شاقىرادى. سونداي-اق ۇلتتىق بانكتىڭ قىزمەتكەرلەرى مەسسەندجەر ارقىلى اۋديو/ۆيدەوقوڭىراۋ شالمايتىنىن, بانك قىزمەتكەرى بولىپ قوڭىراۋ شالعان اداممەن اراداعى اڭگىمەنى تەز ارادا ءۇزىپ, قانداي دا ءبىر شاراعا نەمەسە تولەم وپەراتسيالارىن جۇرگىزۋگە قاتىسۋدان باس تارتۋ كەرەكتىگىن ەسكەرتەدى.
ايتا كەتەيىك, ءوزىڭىز نەمەسە تانىسىڭىز الاياقتىڭ قۇربانى بولسا, قازاقستان رەسپۋبليكاسىنىڭ قۇقىق قورعاۋ ورگاندارىنا جۇگىنۋگە, ارىز جازۋعا بولادى. كەڭەس الۋ ءۇشىن 1477 قىسقا ءنومىرى ارقىلى ۇلتتىق بانكتىڭ بايلانىس ورتالىعىنا قوڭىراۋ شالۋعا دا بولادى.
