فوتو: قازاقستاندىق قوعامدىق دامۋ ينستيتۋتى
ەڭ الدىمەن, شارا مودەراتورى – وتاندىق قوعامدىق دامۋ ينستيتۋتىنىڭ باسقارما توراعاسى نۇربەك ماتجاني سالالىق جۋرناليستيكانى دامىتۋدىڭ ماڭىزىن اتاپ ءوتتى.
«مادەنيەت جانە اقپارات ءمينيسترى ايدا بالاەۆا سالالىق جۋرناليستيكانىڭ دامۋىنا ەرەكشە كوڭىل ءبولىپ وتىر. مىسالى, وتكەن جىلى «قازاقستان قوعامدىق دامۋ ينسيتۋتى» ءمينيستردىڭ تاپسىرماسىمەن «Ashyq syllabus» زەرتتەۋىن جۇرگىزدى. زەرتتەۋدە ەلىمىزدەگى جۋرناليستيكا سالاسى بويىنشا مامان دايارلايتىن وقۋ ورىندارى مەن ونداعى ءبىلىم بەرۋ باعدارلامالارىنىڭ ەرەكشەلىگى ساراپتالىپ, شەتەلدىك تاجىريبە تالداندى. سونىڭ ىشىندە سالالىق جۋرناليستيكانىڭ جاعدايى دا تىڭعىلىقتى زەرتتەلدى. بۇگىنگى دوڭگەلەك ۇستەل ماقساتى – اكادەميادا جۇرگەن عالىمدار مەن نارىقتا جۇرگەن پراكتيك مامانداردىڭ پىكىرلەرىن تىڭداپ, قولدانبالى ۇسىنىستاردى ازىرىلەۋ», دەدى مودەراتور.
سودان سوڭ جۋرناليست, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پروفەسسورى مولديار ەرگەبەكوۆ «وتاندىق جوو-دا مەديا مامانداردى دايارلاۋداعى وزەكتى ماسەلەلەر» تاقىرىبىندا بايانداما جاساپ, 3 نەگىزگى تۇيتكىلدى اتادى. ولار: ءبىلىم بەرۋ باعدارلامالارىنداعى ماسەلەلەر, وقۋلىق ماسەلەسى جانە پەداگوگيكالىق تۇسىنىك ماسەلەسى.
«قازاقستانداعى ءبىلىم بەرۋ باعدارلامالارىن قۇرۋشىلار الەمدەگى مەديا مامان دايارلاۋ پروتسەسىنەن حابارسىز. بۇنى ءبىز فوكۋس توپتىق زەرتتەۋىمىزدە بايقادىق. سوندىقتان دا مەديا ماماندارىن دايارلايتىن وقۋ ورىندارىنىڭ ۇستازدارىنا اعىلشىن تىلىنەن باستاپ, شەت تىلدەردى ۇيرەنۋ كەرەك», دەدى سپيكەر.
سونداي-اق مولديار ەرگەبەكوۆ وتاندىق جوو-لارداعى ءپان اتاۋلارىنىڭ ءبىرىزدى ەمەس ەكەنىنە توقتالدى. بۇل قازاقشا عىلىمي ءتىلدىڭ قالىپتاسۋىنا كەدەرگى كەلتىرەدى.
SDU «جۋرناليستيكا» مەكتەبىنىڭ دەكانى ماديار ساۋدباەۆ «بۇگىنگى جۋرناليستيكانىڭ جاعدايى مەن ونىڭ قوعامداعى ءرولى» تاقىرىبى اياسىندا بايانداما جاساپ, سالالىق جۋرناليستيكانىڭ باياۋ دامۋىنا اسەر ەتەتىن فاكتورلاردى اتادى.
«سالالىق جۋرناليستيكانى دامىتۋداعى تاعى ءبىر ماسەلە – ستۋدەنتتەردىڭ جۇمىسقا ورنالاسۋى جانە مانساپتا ءوسۋى. مىسالى, داتا جۋرناليستيكانى وقىتقانىمىزبەن, ونى بىتىرگەن ماماندار مەديا ورتالىقتارعا اسا قاجەت بولماۋى مۇمكىن. ويتكەنى كەيبىر بۇقارالىق اقپارات قۇرالدارى بۇل سالانىڭ ماڭىزىن جەتكىلىكتى تۇسىنبەيدى. سوندىقتان سالالىق جۋرناليستيكانى دامىتۋ ءۇشىن سۇرانىستى ارتتىرۋ كەرەك», دەدى ول.
ايتا كەتەيىك, قازىر قازاقستاندا مەديا جانە كوممۋنيكاتسيا باعىتى بويىنشا مامان دايارلايتىن 38 ءبىلىم بەرۋ باعدارلاماسى بار. ولاردىڭ بىرقاتارى «تسيفرلى جۋرناليستيكا», «كونۆەرگەنتتى جۋرناليستيكا», «جارناما جانە PR» ماماندارىن دايارلايدى. ياعني, مەديا سالاسىندا جاڭا ترەندتەر پايدا بولىپ, اقپارات تاراتۋدىڭ وزگەشە تەتىكتەرى قالىپتاستى. سوندىقتان دا تالقى نەگىزىندە قاتىسۋشىلار وتاندىق جوعارى وقۋ ورىندارىندا مەدياكوممۋنيكاتسيا ماماندارىن دايارلاۋ جۇمىسى جان-جاقتى جەتىلدىرۋدى تالاپ ەتەدى دەگەن قورىتىندىعا كەلدى.
ءىس-شارانى مادەنيەت جانە اقپارات مينيسترلىگىنىڭ قولداۋىمەن قازاقستان قوعامدىق دامۋ ينستيتۋتىنىڭ MediaLab ورتالىعى ۇيىمداستىردى.
