وسىدان دا قازىر ەلگە شىعا قالعاندا بولار ءىستىڭ باسىندا جۇرگەن جاستاردى كورسەڭ, كادىمگىدەي قۋانىپ قالاسىڭ. «شيەلىدەگى جاقاەۆ اۋىلىندا بالاباقشاداعى قىزمەتىمەن قوسا, ەشكى ءوسىرىپ, كاسىپ باستاپ وتىرعان بوتاگوز دەگەن تالاپتى جاس بار» دەگەندى بۇرىن دا ەستىپ جۇرەتىنبىز. جاقىندا مەملەكەت باسشىسى بوتاگوز ارقاشباەۆاعا حالىقارالىق ايەلدەر كۇنىنە وراي استانادا وتكەن سالتاناتتى جيىندا «ارۋ-انا» بايقاۋىنىڭ «اگروبيزنەس سالاسىنداعى ۇزدىك جوبا» اتالىمى جەڭىمپازى رەتىندە ماراپات تاپسىردى.
بوتاگوز قازانعاپ اتىنداعى مۋزىكالىق كوللەدجدى حورەوگراف ماماندىعى بويىنشا ءبىتىرىپ شىققان جاس. قازىر جاقاەۆ اۋىلىنداعى بالاباقشادا جەتەكشى رەتىندە بالدىرعانداردى بيگە باۋلىپ ءجۇر.
«كۇندەلىكتى جۇمىسىما بارىپ-كەلىپ, كەسىمدى ايلىعىمدى الىپ جۇرە بەرسەم دە بولاتىن ەدى. بىراق بىردە انام ءلاززات پارمەنقۇلوۆا «ەشكى باعىپ كورسەك قالاي بولادى؟» دەگەن وي تاستادى. اۋەلگىدە كادىمگى قازاقى ەشكى ۇستادىق. اسىپ كەتكەندە 1 ليتر ءسۇت بەرەتىن. بۇل ءسۇتتى ەشكىلەر جونىندە ىزدەنىسكە جول اشتى. قولداعى بار مالدى ساتىپ, اسىل تۇقىمدى 5-6 ەشكى العاندا بىزگە كۇلگەندەر دە بولدى. بىراق قاراپايىم تۇقىمداستارىنا قاراعاندا, ءسۇتتى 5 ەسە كوپ بەرەتىن بۇلار كوڭىلدەن شىقتى. شامالى قور جينالعاسىن تازا قاندى تەكە الدىرىپ, تۇقىم تازالاۋعا كىرىستىك», دەيدى بوتاگوز.
باستاپقىدا ارينە, وڭاي بولعان جوق. سىرتتان كەلگەن سەكسەك اتا تۇقىمىنىڭ اراسىندا سىردىڭ اپتابىن كوتەرە الماي اۋىرعاندار دا بولدى. بوتاگوزدىڭ اناسى رەسەيدەگى ماماندارمەن بايلانىستى جولعا قويىپ, ەمىن ىزدەدى. جەرگىلىكتى ۆەتەرينارلار ارقىلى قاجەتتى ەكپەسىن سالدىرىپ, تالداماسىن تاپسىرىپ, مالدىڭ بار جاعدايىن جاسادى. وسىنىڭ ارقاسىندا قازىر مۇنداعى زاانين, انگلو-نۋبيالىق جانە فرانتسۋزدىق ءالپى ەشكىلەرىنىڭ سانى 100-دەن اسادى. ايىنا 2 تونناعا دەيىن ءسۇت ساۋىپ, ونى ساتۋدان بولەك ماي شايقاپ, قۇرت, برىنزا جاسايدى.
وسى باعىتتا ىزدەنىپ ءجۇرىپ بىلگەنى – ەشكى سۇتىندەگى ماي تۇيىرشىكتەرى سيىر سۇتىنە قاراعاندا وتە ۇساق بولعاندىقتان, اعزاعا تەز سىڭەدى ەكەن. قۇرامىنداعى كالتسي كوپ ءسۇت بالالارعا وتە پايدالى. ودان بولەك, اسقازانى اۋىراتىندار, حيميوتەراپيا العاندار باسىنان كەلىپ, ساۋمال سياقتى ءىشىپ كەتىپ تۇرادى. وپەراتسيا جاساتار الدىندا يممۋنيتەت كوتەرۋ ءۇشىن ىشەتىندەر دە از ەمەس. لاقتار الدىندا ساۋىندى توقتاتقان ساتتە كەزەككە جازىلىپ قوياتىندار كوپ. ونىمدەرىن ءبىزدىڭ وبلىستان بولەك الماتى, اقتوبە, شىمكەنت پەن جامبىل وڭىرىنەن ارنايى الدىراتىندار بار.
«مال باسىن كوبەيتۋ ءۇشىن مەملەكەت سۋبسيديا بەردى. بيزنەستى قولداۋ باعدارلاماسى اياسىندا قايتارىمسىز گرانت الىپ, ساۋ اپپاراتتارىن الدىم. ەلىمىزدە وسىنداي شارۋاشىلىقپەن اينالىساتىندارمەن تۇراقتى بايلانىس جاساپ تۇرامىز. ورتا ازيا دەڭگەيىندە وتكەن سايىستاردان ەشكىلەرىمىز ءسۇتىنىڭ مايلىلىعى, قۇنارلىلىعى جاعىنان 2 مارتە جۇلدەلى ورىنداردان كورىنگەندە بەينەتىمىزدىڭ ءبىر بيىككە شىعارعانىنا قۋاندىق. باستاعان ءىسىمنىڭ بولاشاعىنا سەنەمىن. الدا ەتتى باعىتتاعى بۋر, ءجۇنى باعالى انگور تۇقىمداستارىن ءوسىرىپ كورمەك ويىم بار. مەملەكەتتىك قولداۋدى پايدالانىپ, ەشكى ءسۇتىن, ءسۇت ونىمدەرىن دايىندايتىن شاعىن زاۋىت اشقىم كەلەدى», دەيدى كەيىپكەرىمىز.
ناعاشى اتاسى مەلدەن جاندى دا, مالدى كىسى بولعان ەكەن. بالالارىنىڭ باسى قوسىلعان جەردە «ەسىڭ كەتسە, ەشكى جي» دەگەن قازاقتىڭ كونە ناقىلىن ءجيى ايتاتىن كورىنەدى. قازىنا كەۋدە قاريانىڭ سول ءبىر باتا-تىلەگى كەنجە قىزىنىڭ پەرزەنتى بوتاگوزگە قۇت بولعان سەكىلدى.
قىزىلوردا وبلىسى,
شيەلى اۋدانى,
جاقاەۆ اۋىلى
