– وزبەكستاندا جالاۋى جەلبىرەيتىن جارىستا وليمپيا ويىندارىنىڭ جولدامالارى ساراپقا سالىناتىنى بەلگىلى. سول سەبەپتى دە ءبىز ىرىكتەۋ سىنىنا ەڭ ۇزدىك گيمناستشىلاردى اپارۋعا ءتيىسپىز. سوڭعى تۋرنيرلەردى قورىتىندىلايتىن بولساق, يسپانياداعى گران-پريدە ەلجانا تانيەۆا «دوپ» جاتتىعۋىندا دارا شىقتى. كوپسايىستا جەڭىس تۇعىرىنا كوتەرىلۋ ءۇشىن وعان ساناۋلى عانا ۇپاي جەتپەدى. تانيەۆا – قازىر كوماندامىزدىڭ كوشباسشىسى. سول سەبەپتى ونىڭ ليتسەنزيالىق تۋرنيرگە قاتىساتىنى انىق. وسىدان ءبىراز كۇن بۇرىن گرەكيادا ءداستۇرلى «افروديتا كۋبوگى» ءوتىپ, جەرلەستەرىمىز التى جۇلدەگە قول جەتكىزدى. وسى جارىس قارساڭىندا مەن ءوز شاكىرتتەرىمە «افينادا كىم وتە جاقسى ونەر كورسەتسە, تاشكەنتكە سول بارادى» دەپ الدىن الا ەسكەرتتىم. بۇل باسەكەدە ايبوتا ەرتايقىزىنىڭ باعى جاندى. سوندىقتان دا اتالعان دوداعا ايبوتانىڭ قاتىسۋى زاڭدى, – دەيدى ءا.يۋسۋپوۆا.
ەستەرىڭىزگە سالا كەتەيىك, سوڭعى ازيا چەمپيوناتى بىلتىر ءفيليپپيننىڭ استاناسى مانيلادا ۇيىمداستىرىلدى. سول جارىستا قازاقستان قۇراماسى 14 جۇلدەگە (3 التىن+4 كۇمىس+7 قولا) قول جەتكىزىپ, جالپى ەسەپتە ءۇشىنشى ورىندى يەلەندى. الدىمىزدا – وزبەكستان (8+7+1) مەن قىتاي (4+0+2). سونداي-اق جۇلدە العانداردىڭ اراسىندا جاپونيا (0+1+6), قىرعىزستان (0+0+1), وڭتۇستىك كورەيا (0+0+1) جانە فيليپپين (0+0+1) قۇرامالارى بار.
قازاقستاننىڭ گيمناستشىلارى اراسىندا جەكەلەگەن سايىستا ايىم مەيىرجانوۆا («دوپ») عانا التىننان القا تاقسا, توپتىق جارىستا جەرلەستەرىمىز باس جۇلدەنىڭ ەكەۋىن ولجالادى. ال كوپسايىستىڭ قورىتىندىسى بويىنشا ەلجان تانيەۆا كۇمىس مەدالدى موينىندا جارقىراتسا, ايبوتا ەرتايقىزى بەسىنشى ورىنعا تابان تىرەدى. جارىستىڭ باس جۇلدەسىن وزبەكستاندىق تاحمينا يكروموۆا ولجالاسا, قىتايلىق ۆان زيلۋ قولاعا قول سوزدى.
