قارالى حابار ءبارىمىزدىڭ قابىرعامىزدى قايىستىردى. اياۋلى دوسىمىزدى قازمۋ-دىڭ جۋرناليستيكا فاكۋلتەتىندە بەس جىل بىرگە وقىعان بىزدەردىڭ – كۋرستاستاردىڭ عانا ەمەس, ونىڭ جانازاسىنا جينالعان قاراقۇرىم حالىقتىڭ ولىمگە قيمايتىنى قاقاعان ايازدا كۇڭىرەنگەن كوپشىلىكتىڭ لەبىنەن انىق اڭعارىلىپ تۇردى.
سول جولى دوسىمىزدىڭ ءومىرى مەن ونەرى ارقىلى حالقىنىڭ قادىرلى دە قيماس ۇلىنا اينالعانىنا جانە ءبىر كۋا بولدىق. قالىڭ ءنوپىر لەگى ءوزىنىڭ ونەرپاز ۇلىمەن جۇرەكجاردى سوزدەرىن ايتىپ قوشتاسقاننان كەيىن قارالى شەرۋ قونىسبايداي اسىل پەرزەنتىن جەر قوينىنا بەرۋ ءۇشىن پرەزيدەنت پارمەنىمەن بەلگىلەنگەن قازاقتىڭ كورنەكتى تۇلعالارى ماڭگىلىككە دامىلداعان پانتەونعا قاراي بەت تۇزەدى...
مىنە, سودان بەرى دە ارادا 1,5 جىلعا تاياۋ ۋاقىت وتە شىعىپتى. ءتىرى بولسا قونىسباي دوسىمىز بيىل جيىرما ءبىرىنشى مامىردا قالىڭ قازاعىمەن قاۋىشىپ, 70 جىلدىق مەرەيتويىن ادەتتەگى ادەتىمەن مەرەكە مەن بەرەكەگە اينالدىرىپ, دۇرىلدەتىپ تويلاپ جاتار ەدى-اۋ.
ءيا, قونىسباي ءبارىمىزدىڭ دوسىمىز ەدى. ءبارىمىز ونىمەن دوس بولۋعا ۇمتىلۋشى ەدىك. ويتكەنى ول كۋرستاستار اراسىنان ءا دەگەننەن-اق سۋىرىلىپ شىعىپ, وزىمەن قاتار جۇرگەندەردى ەلەڭ ەتكىزگەن مىنەزدىڭ يەسى ەدى.
مىنەز دەگەن ادام جانىنىڭ ايناسى عوي. سول ايناداعى بەينەسىن قونىسباي كۋرستاستارىمەن ەندى-ەندى تانىس بولا باستاعان العاشقى ايلاردا-اق جاريا ەتىپ ۇلگەرگەن بولاتىن. ءا دەگەننەن-اق ءازىل-قالجىڭىمەن, ءان-جىرىمەن دوستارىنىڭ كوڭىلىن اۋلاپ, جۇرەگىن باۋراپ العان ەدى.
كەلە-كەلە وسى ءبىر قاراتورى ءوڭدى, ورتا بويلى جىگىت اعاسىن كۋرستاس دوستارى عانا ەمەس, بۇكىل قازاقستان تانىپ-بىلە باستادى. ءبىلىپ قانا قويماي, جۇرتشىلىق ونىڭ اتى اتالعان جەردە ازاماتتىعىن, ادامگەرشىلىگىن, جان دۇنيەسى جاراسىمدى ءازىل-قالجىڭعا باي, توڭىرەگىن كۇلكىگە كومكەرىپ, ءماز-مەيرام كۇيگە بولەي بىلەتىن اقجارقىن مىنەزىن ايتىپ تاۋىسا الماي, ريزاشىلىقپەن تاڭداي قاعىپ وتىراتىن بولدى. ال ول بولسا, حالقى قۇرمەتتەگەن سايىن شابىتى شالقىپ, قاناتتانا تۇسۋمەن قاتار, قوشەمەت پەن قولپاشتىڭ بۋىنا بالقىپ, بولدىم-تولدىم كۇي كەشەتىن باز بىرەۋلەردەي ەمەس, كەرىسىنشە, ىزەتىنە ىزەت قوسىپ, قاشانعىداي سىپايىلىق قالپىنان ءبىر تانبايتىن.
ارينە, ءىلتيپات پەن سىي-قۇرمەت وزدىگىنەن كەلمەيدى. اسىرەسە حالىقتىڭ ءىلتيپاتىنا بولەنۋ وڭاي ەمەس. وعان جۇزدەن جۇيرىكتەر عانا قول جەتكىزەدى. قونىسباي ءابىل سول جۇيرىكتەر قاتارىنان ورىن الىپ, ەل سۇيىسپەنشىلىگىنە بولەنگەن سەگىز قىرلى, ءبىر سىرلى ونەرپاز ەدى. جانە ونەر ولكەسىنە ءوزىنىڭ كەزدەيسوق كەلمەگەنىن الدەقاشان الدەنەشە رەت دالەلدەگەن ناعىز ساڭلاق-تىن.
قونىسبايدىڭ ونەر ءۇشىن, حالقىنىڭ ار-نامىسىن ونەرىمەن قورعاۋ ءۇشىن جارالعان ازامات بولعانىنا دالەل كوپ. جورا-جولداستارى كەيدە ءازىل-شىنى ارالاس مىناداي اڭگىمە ايتاتىن. قونىسباي قازاق مەملەكەتتىك ۋنيۆەرسيتەتىنىڭ جۋرناليستەر دايارلايتىن فاكۋلتەتىنە وقۋعا تۇسكەن جىلى تالاپكەرلەردى كونكۋرستىق ىرىكتەۋ كەزىندە كىمنىڭ قانداي مۋزىكا اسپابىندا ويناي الاتىندىعىنا نازار اۋدارىلسا كەرەك. كەزەك قونىسبايعا كەلگەندە: «مەن كەز كەلگەن مۋزىكا اسپابىندا وينايمىن», دەمەي مە. مۇنى اسىرا ايتىلعانعا بالاعان ۇستازدار قاۋىمى شاكىرتتىڭ قابىلەتىن تەكسەرىپ كورمەك بولادى. سوندا قونىسباي شىنىندا دا دومبىرا, ماندولين, بايان ءتارىزدى مۋزىكا اسپاپتارىن قۇيقىلجىتا تارتىپ, ۇستازدار نازارىن اۋدارعان دەسەدى. كەيىن 2-كۋرستان باستاپ فاكۋلتەت ستۋدەنتتەرىنەن ء«لايلىم شىراق» اتتى ۆوكالدىق انسامبل قۇرىپ, ونىڭ جۇمىسىنا نۇرتىلەۋ يمانعالي ۇلى, ۇلىقبەك ەسداۋلەت, باقىت تابىلديەۆ, مارات نۇرقاليەۆ, باقىت احمەروۆ ءتارىزدى ونەرلى جىگىتتەردى تارتىپ, وقۋ بىتىرگەنشە ءوزى جەتەكشىلىك ەتكەن.
دەمەك قونىسبايدىڭ ونەرگە بەيىمدىگى بالالىق شاعىنان باستاۋ الادى. مەكتەپ قابىرعاسىندا جۇرگەندە دومبىراعا, ءان-كۇي مەن ولەڭ-جىرعا اۋەستەنەدى. رەسپۋبليكالىق گازەت-جۋرنالداردا ولەڭدەرى جاريالانادى. مەكتەپتىڭ كوركەمونەرپازدار ۇيىرمەسىنىڭ ۇيىتقىسى بولادى. توي-تومالاق, مەرەكەلەردە كوپشىلىكتى انىمەن, ءازىل-قالجىڭىمەن باۋرايتىن ونەرپاز بالا اتانادى. كەلە-كەلە اۆتورلىق قۇقىققا يە بولعان, «اۋىل كەشى كوڭىلدى» جيناقتارىنا ەنگىزىلگەن كوپتەگەن ءان جازادى. ول اندەردى «ايگۇل», «ادىرنا», «شەرتەر», «عاسىرلار پەرنەسى» انسامبلدەرى ورىنداپ, حالىققا كەڭىنەن تانىلادى.
قونىسبايدىڭ تالانتى اسىرەسە ايتىس ونەرىندە جارقىراپ كورىندى. قادىم زاماننان بەرى حالقىمىزبەن بىرگە جاساسىپ كەلە جاتقان بۇل ونەردىڭ وزىندىك ەرەكشەلىگى بار ەكەنىن جۇرتتىڭ ءبارى بىلەدى. تابان استىنان سۋىرىپ سالىپ, كوپشىلىكتىڭ كوڭىلىنەن شىعاتىن تاپقىر وي ايتۋ قۇداي تالانت بەرگەن ادامنىڭ عانا قولىنان كەلەدى. قونىسبايدىڭ وسىنداي قيىن ونەردىڭ شاۋجايىنان ۇستاپ قانا قويماي, ونىڭ بيىك شىڭىنا كوتەرىلۋىنىڭ باستى سەبەبىن ونىڭ تۋىپ-وسكەن ورتاسىنان ىزدەگەن ءجون. احمەت بايتۇرسىنوۆ, مىرجاقىپ دۋلاتوۆ, نۇرحان احمەتبەكوۆ, سىرباي ماۋلەنوۆ, عافۋ قايىربەكوۆ ءتارىزدى دۇلدۇلدەر ءومىر سۇرگەن قۇنارلى تورعاي توپىراعى قونىسبايدى دا باستاۋ بۇلاعىنىڭ قاينار كوزىنەن قاناتتاندىرعان ءتارىزدى. ونى ءبىر ايتىستا: «تورعايدان شىققان ءبىر تايمىن, جالعاعان جىرىن نۇرحاننىڭ» دەپ, قونىسبايدىڭ ءوزى دە تىلگە تيەك ەتكەن-ءدى.
قونىسباي ايتىسقا ارالاسا باستاعان سوناۋ 80-جىلداردان باستاپ ءار جىلدارى قازاقستاننىڭ حالىق اقىندارى كوكەن شاكەەۆپەن, ءاسىلحان قالىبەكوۆامەن, ءاسيا بەركەنوۆامەن, موڭعوليادان كەلگەن توقتامۇرات جومارتپەن, وزبەكستاندىق مەكەمباي وماروۆپەن, رەسەيلىك امانگەلدى جۇسىپوۆپەن, بەلگىلى ايتىسكەرلەر قاتيمولدا بەردىعاليەۆپەن, ەرىك اسقاروۆپەن, كوپباي وماروۆپەن, سەرىك قۇسانباەۆپەن, تاعى دا باسقالارىمەن ءسوز سايىستارىنا تۇسە ءجۇرىپ, وسى ونەردىڭ شىنايى شەبەرىنە اينالدى. تالاي رەت باس بايگەنى يەلەندى. اتاپ ايتقاندا 1990 جىلى تاشكەنت قالاسىندا بالقى بازاردىڭ 150 جىلدىعى قۇرمەتىنە وتكىزىلگەن ورتا ازيا جانە قازاقستان اقىندارىنىڭ ايتىسىندا, سول جىلعى رەسپۋبليكالىق ءىىى اقىندار ايتىسىندا جەڭىمپاز اتاندى. سونداي-اق س.تورايعىروۆ پەن ب.ءمايليننىڭ 100 جىلدىعى قۇرمەتىنە وتكىزىلگەن رەسپۋبليكالىق ايتىستاردا, تەلەۆيزيالىق ايتىستاردا سان مارتە توپ جاردى. ايتىس ونەرىنە سىڭىرگەن زور ەڭبەگى ءۇشىن 1990 جىلى «قازاقستاننىڭ حالىق اقىنى» اتاعىنا يە بولدى.
اتالعان ابىروي-اتاقتار, قالا بەردى حالىقتىڭ سۇيىسپەنشىلىگى قونىسبايعا كەيبىر اقىندار سياقتى ساحناعا شىعىپ الىپ, دومبىرانىڭ شاناعىن سابالاپ, ارزانقول ۇيقاستار ايتىپ, ۋاقىت ۇتقانى ءۇشىن بەرىلمەسە كەرەك. كەرىسىنشە, ورتاعا تۇيدەك-تۇيدەگىمەن تاستاعان وتتى جىرلارى تىڭداۋشىلاردىڭ ايىزىن قاندىرىپ, جۇرتشىلىقتى ء«اپ بەرەكەلدى!» دەگىزگەن ساتتەرى از بولماعان. قوعامدىق وي-پىكىرمەن استاسىپ جاتاتىن مۇنداي پايىمداۋلار كوپشىلىكتى ءسۇيسىندىرىپ عانا قويماي, كوتەرىلگەن كوكەيكەستى ماسەلەنىڭ كەلەشەكتە وڭ شەشىمىن تابۋىنا دا اسەرىن تيگىزدى. اسىرەسە اقىننىڭ تىلگە, ەلگە, جەرگە بايلانىستى ايتقان ورامدى شۋماقتارى كوپشىلىكتىڭ كوڭىلىنەن شىعاتىن. مىسالى, قونىسباي ءبىر ايتىستا:
«كەزىندە تالاي-تالاي اتقا قالدىق,
بۇگىندە جايىمىز جوق ماقتانارلىق.
ۇستالعان 37-دە اتامىزداي,
ازەر دەپ ءتىلىمىزدى اقتاپ الدىق», دەپ, قۋانۋعا ءالى ەرتە ەكەنىن ەسكەرتەدى. ايتسا ايتقانداي, ءتىلىمىزدىڭ ءازىر قاتارعا قوسىلار ءتۇرى بايقالمايدى. اقىننىڭ كەڭ-بايتاق قازاق جەرى تۋرالى:
«جەتىسۋ ارقا مەنەن ەكى ارانى,
جالعاۋعا قانداي قۇشاق جەتە الادى.
بابالار سويىلمەنەن قورعاپ سونى,
قانىمەن سىزىپ كەتكەن شەكارانى», دەگەن بەينەلى تەڭەۋى دە كوكەيگە قونىمدى.
مۇنداي تاپقىر ءسوز, ۇتقىر ويلار قونىسباي ايتىستارىنان مولىنان كەزدەسەتىن. ونىڭ ءبارىن تىزبەلەۋدى ماقسات تۇتپادىق. ءبىر عانا ايتارىمىز – قونىسبايدىڭ ايتىس ونەرىندە شەبەرلىك شىڭىنا كوتەرىلىپ, وزىندىك مادەني مەكتەبىنىڭ قالىپتاسۋىنا ونىڭ جازبا ادەبيەتتە دە ءونىمدى ەڭبەك ەتۋى يگى اسەرىن تيگىزدى دەگەن ويدامىز. اتاپ ايتقاندا, ول ايتىس ونەرىمەن عانا شەكتەلىپ قالماي, ءوزىن جۋرناليست رەتىندە دە, جازۋشى رەتىندە دە, ءازىل-قالجىڭ, سىقاقتىڭ ايتۋلى شەبەرى رەتىندە دە ءار قىرىنان تانىتا بىلگەن ناعىز امبەباپ تالانت ەدى.
وقۋ بىتىرگەننەن كەيىن ءوزى تۋىپ وسكەن جانگەلدين اۋداندىق «جاڭا ءومىر» گازەتىندە ءبولىم مەڭگەرۋشىسى, جاۋاپتى حاتشى, «لەنينشىل جاس» گازەتىنىڭ تورعاي, تسەلينوگراد وبلىستارى بويىنشا مەنشىكتى ءتىلشىسى, وبلىستىق «تورعاي تاڭى» گازەتى رەداكتورىنىڭ ورىنباسارى, قالالىق «ارقالىق تاڭى» گازەتىنىڭ رەداكتورى, تورعاي وبلىستىق تەلەراديوكومپانياسىنىڭ توراعاسى, استانا قالاسىندا تىلدەردى دامىتۋ باسقارماسىنىڭ باستىعى, قازاقستان رەسپۋبليكاسى پارلامەنتى ءماجىلىسىنىڭ اپپاراتىندا رەداكتسيالاۋ جانە اۋدارما ءبولىمىنىڭ سەكتور مەڭگەرۋشىسى قىزمەتتەرىن ويداعىداي اتقارا ءجۇرىپ, ءار جىلدارى وقىرمان تاراپىنان جىلى قابىلدانعان «باستاۋ», «كورشىلەر», «الاڭعاسار», «قونىسبايدىڭ قالجىڭدارى», «جەتپىس جەتىنىڭ جىگىتتەرى» «توپ جاردىم تۋىن جىقپاي تۋعان ەلدىڭ...», ء«اي-ءاي, اقىن ءالديى», «جادىمداعى جازبالار» ءتارىزدى سىقاق ولەڭدەر, ءازىل, قالجىڭ, قاعىتپالار, ولەڭدەر مەن ايتىستار, پوۆەستەر مەن اڭگىمەلەر جيناقتالعان بىرنەشە ادەبي تۋىندىلار ۇسىندى.
قونىسباي قازاقتىڭ سالت-ءداستۇرىن, مادەنيەتىن, ونەرىن ناسيحاتتاۋ سالاسىندا كوپتەگەن جەتىستىككە قول جەتكىزدى. مىسالى, «قازاقستان ايتىس اقىندارى مەن جىرشىلار وداعىنىڭ» توراعاسى بولىپ تۇرعان كەزىندە ق.ءابىلدىڭ ۇيىمداستىرۋىمەن استانا قالاسىندا رەسپۋبليكالىق دەڭگەيدە 10 اقىندار ايتىسى وتكىزىلدى. جاس ۇرپاقتى حالىق ەرتەگىلەرى كەيىپكەرلەرى رۋحىندا تاربيەلەۋ ماقساتىندا «تازشا بالا» كونكۋرسى قولعا الىنىپ, ەل ىشىندەگى كوپتەگەن تالانتتاردىڭ تانىلۋىنا جول اشتى. وسى بايقاۋدىڭ جەڭىمپازدارى اتانعان دانيار حامزين, تۇرسىنبەك قاباتوۆ, رينات زايىتوۆتاردىڭ ەسىمى بۇل كۇندە رەسپۋبليكا كولەمىنە كەڭىنەن تانىمال. سول سەكىلدى ناۋرىز مەيرامىن حالىقتىق مەرەكە رەتىندە تويلاۋ, ءتىل فەستيۆالىن قالىپتاستىرۋ, اباي ەسكەرتكىشى جانىندا «پوەزيا ساعاتىن» ۇيىمداستىرۋ, ەلوردادا تۇراتىن قالامگەرلەرمەن كەزدەسۋلەر وتكىزۋ قونىسبايدىڭ تۇسىندا داستۇرگە اينالدى.
قونىسباي حالقىنا بويىنداعى تابيعي دارىنىمەن, شىعارماشىلىق تۋىندىلارىمەن عانا قىزمەت ەتكەن جوق. كۇندەلىكتى مەملەكەتتىك قىزمەتتە دە ول ەلىنىڭ ەڭسەسىن كوتەرەر ىسپەن اينالىستى.
قونىسباي ءابىل 1998 جىلدان باستاپ استانا قالاسىندا مەملەكەتتىك ءتىلدى دامىتۋ ءىسىنىڭ نەگىزىن قالادى. العاشقى قادامىن استانا قالاسى اكىمدىگىندە تىلدەردى دامىتۋ سەكتورى مەڭگەرۋشىلىگىنەن (1998) باستاعان ول اراعا 4–5 اي سالىپ سەكتوردى ءتىل بولىمىنە اينالدىرۋعا قول جەتكىزدى. 2002 جىلدىڭ باسىندا ەلوردادا تىلدەردى دامىتۋ باسقارماسىن اشىپ, انا ءتىلدى وركەندەتۋ باعىتىندا بەل شەشە ەڭبەك ەتتى. سول كەزدەگى استانا قالاسى اكىمىنىڭ ورىنباسارى تولەگەن مۇحامەدجانوۆتىڭ باسشىلىعىمەن باسقارما جانىنان «رۋحانيات» مەملەكەتتىك ءتىلدى جەدەلدەتىپ وقىتۋ ورتالىعى اشىلىپ, وندا وزگە ۇلت وكىلدەرى دە ارنايى دايارلىقتان ءوتتى.
سونداي-اق قونىسبايدىڭ استانا قالالىق تىلدەردى دامىتۋ باسقارماسىنىڭ باستىعى رەتىندە دە اتقارعان شارۋالارى ايتارلىقتاي. مىڭداعان كورەرمەندەر كۋا بولعان شارشى توپتاعى ايتىستاردا تۋعان ءتىلىنىڭ جوعىن جوقتاعان, سونى ورگە باستىرۋ جولىندا قىزىل ءتىلدى بارىنشا بەزەگەن اقىن ەندى سول ءتىلدى وركەندەتۋگە باسشىلىق جاساۋ تاپسىرىلسا, ايانىپ قالسىن با. بۇل باعىتتا دا ءوندىرىپ جۇمىس ىستەدى. وعان تاۋبە, ارينە. بىراق ءبىتۋى قازاق بالاسىنىڭ وزىنە عانا بايلانىستى, الايدا بىتىرۋگە موينى جار بەرمەي, ەنجارلىققا سالىناتىن, ءتىپتى قازاق ءتىلىنىڭ قاتارعا قوسىلىپ ءجۇرىپ كەتۋىنە ىشتەي قارسىلىق تا ءبىلدىرىپ جۇرگەن قانداستارىن كورگەندە اشىنىپ تا, قىنجىلىپ تا قالاتىن.
ء«تىل ماسەلەسىندەگى كۇردەلى جاعدايعا ءوزىمىز كىنالى, – دەيتىن قونىسباي. – ءتىپتى ارالاس مەكتەپتى بىلاي قويعاندا, تازا قازاق مەكتەپتەرىنە بارساڭىز, ءۇزىلىس كەزىندە وقۋشىلار ورىسشا سويلەسىپ تۇرادى. بۇل – اتا-اناسىنىڭ, قوعامنىڭ جاۋاپسىزدىعى. قالالى جەردە سالت-داستۇرىمىزگە نەمقۇرايدى قارايتىندار كوپ. استانا كاسىپكەرلەرى نىساندارىنا قازاقشا ات قويۋدان قاشادى. سەبەبىن سۇراساڭ: «قازاقشا اتاساق, ەشكىم بارماي قويادى», دەيدى. نامىسىن وياتپاق بولىپ ايتقان سوزدەرىڭ كوبىنە دالاعا كەتەدى. ەل مۇددەسى ءۇشىن, ءتىلىمىز, ءدىلىمىز, ءدىنىمىز ءۇشىن حالىق بولىپ كۇرەسپەيىنشە, ىلگەرىلەۋگە قول جەتكىزە المايمىز».
قونىسباي وسىلاي تەبىرەنەتىن. كەيىنىرەك ءماجىلىس اپپاراتىنىڭ رەداكتسيالاۋ جانە اۋدارما بولىمىندە سەكتور مەڭگەرۋشىسى قىزمەتىن اتقارعان جىلداردا دا قازاق ءتىلىنىڭ ءومىردىڭ بارلىق سالاسىندا اينالىسقا ەنۋىنە جان اياماي ەڭبەك ەتتى. جۇزدەگەن تەرميندى قالىپتاستىرۋعا اتسالىستى. سول ارقىلى بولاشاقتا قازاق ءتىلىنىڭ كۇندەلىكتى قولدانىسقا ەمىن-ەركىن كىرىگۋىنە نەگىز قالادى.
حالقىنىڭ سۇيىسپەنشىلىگىنە بولەنگەن قونىسباي 1990 جىلعى «قازاقستاننىڭ حالىق اقىنى» اتاعىنان كەيىن «پاراسات» وردەنىمەن, بىرنەشە مەملەكەتتىك مەدالمەن ماراپاتتالدى. ارقالىق قالاسىنىڭ, تورعاي قالاسىنىڭ قۇرمەتتى ازاماتى اتاندى.
ول – ونەر جولىنداعى قيىندىقتاردى بىلاي قويعاندا, تىرشىلىكتىڭ اششى ءدامىن تاتۋداي-اق تاتسا دا, مويىماعان جان. ون ءۇش جاسىندا اناسىنان ايىرىلعان شەرلى جەتكىنشەك ەدى. سول كەزدە ءۇيدىڭ ۇلكەنى بولىپ, سوڭىنان ىلەسكەن ەكى ءىنىسىن دەمەگەن. انادان ايىرىلۋ وعان اۋىر ءتيدى. ازالى جاعداي ونىڭ جۇرەگىندە ءان بوپ ءورىلىپ, بۇگىندە جۇرتشىلىقتىڭ سۇيىكتى شىعارماسىنا اينالعان «بالا ماحابباتى» دەگەن ءان سوندا دۇنيەگە كەلگەن.
وتباسىنداعى وسىنداي اۋىرتپالىقتى قايسارلىعىمەن جەڭگەن قونىسبايدىڭ الماتى كەزەڭىندە باعىنا ءمۇنيرا سۇلۋ جولىققان. وقۋىن ءبىتىرىپ, مۇنيرامەن جۇبى جاراسىپ ەلگە ورالدى. ەكەۋى ىنىلەرىن قامقورلىعىنا الىپ, ۇزاق جىل اۋىل ءومىرىنىڭ ءدامىن تاتتى...
قايماعى بۇزىلماعان قازاقى تاربيەنى ونەر دارەجەسىنە دەيىن كوتەرىپ, حالقىمىزدىڭ رۋحاني بايلىعىن ءتۇرلى جانردا ناسيحاتتاي بىلگەن ونەر تۇلعاسى ۇلتتىق بوياۋعا سۋارىلعان تابيعي شىعارماشىلىق وركەن جايا بەرسە دەپ ارمانداۋشى ەدى.
ايتۋلى اقىننىڭ بۇل اڭسارىن ءىزباسارلارى جالعاستىرادى دەپ سەنەمىز.
ورىنبەك جولدىباي,
فيلولوگيا عىلىمدارىنىڭ كانديداتى, قازاقستاننىڭ قۇرمەتتى ءجۋرناليسى
