«اۋىر ويلار» دەپ اتالاتىن ءمۇسىن 2009 جىلى قولادان قاشالىپ جاسالعان. ونەرتانۋشىلار بۇل شىعارمانى سيۋررەاليزم باعىتىنا جاتقىزادى.
ياعني بۇل ءمۇسىن ادەتتەگى ەرەجەلەردىڭ شەكاراسىنا سايكەس كەلمەيدى. دەنە ءپىشىنى قالىپتى بولعانىمەن, باسى وتە ۇلكەن. اۋىر ويدى ارقالاي الماي دەنەسى قيسايىپ, باسى توڭكەرىلىپ جاتقانى تالايلاردىڭ تاڭدايىن قاقتىردى. سەبەبى ادامدار بۇل مۇسىننەن وزدەرىن تانيدى. راسىمەن, ءبىز ارقالاپ جۇرگەن ەڭ اۋىر جۇك – ءوزىمىزدىڭ ويلارىمىز.
قۋىس كەۋدە
2013 جىلى فرانتسيانىڭ مارسەل پورتىندا كاتالانو برۋنونىڭ مۇسىندەرى حالىققا تانىستىرىلىپ, ءا دەگەننەن كوپشىلىكتىڭ كوڭىلىنەن شىقتى. سولاردىڭ ىشىندە ەڭ تانىمال بولعانى – «ساياحاتشىلار» دەپ اتالادى.
ءيا, ونىڭ چەمودانىنان-اق جيھانكەز ەكەنىن اڭعارۋ قيىن ەمەس. بىراق نەگە كەۋدەسى قۋىس؟ الەمدى ارالاعان جاننىڭ ىشكى الەمى دە باي بولۋ كەرەك ەدى عوي. سويتسەك, اۆتوردىڭ ايتپاعى مىناۋ ەكەن. ەگەر قيلى-قيلى كۇندەردى باستان كەشكەن ساياحاتشىنىڭ ەكى كوزى ءبارىن كورىپ, ءبارىن باقىلاعانىمەن, كوكىرەگى كەرەڭ بولسا, ءبارى بەكەر دەگەن ءسوز. توقسان ەلدى ارالاعان ءتۋريستىڭ قيالى جۇتاڭ بولسا, تۇيگەنى جوق دەپ ۇعىڭىز. ساناسىندا مىسقالداي تاڭبا, جۇرەگىندە زارەدەي ەموتسيا قالمايدى. قىسقاسى, كوپتى كورگەننىڭ ءبارى كوسەمدىك كورسەتە المايدى, ەگەر كوكىرەگى وياۋ بولماسا. قازىر الەۋمەتتىك جەلىنىڭ اسەرىنەن بە ەكەن, حالىقتىڭ شەتەلگە ىنتىزارى ەرەكشە. ءسىزدىڭ دە فرانتسياعا جولىڭىز تۇسسە, ەيفەل مۇناراسىنان بۇرىن وسى ءبىر ەسكەرتكىشكە سوققانىڭىز ابزال دەپ ويلايمىز.
جالاڭ اياق
بۋداپەشتەگى دۋناي وزەنىنىڭ جاعاسىندا جۇزدەگەن اياق كيىم جاتىر. ءبىر كورگەن ادام مۇنى جاعاجايدىڭ ءسانى ءۇشىن قويىلعان ەسكەرتكىش دەپ ويلاۋى مۇمكىن. بىراق ولاردىڭ سيمۆولدىق ءمانى مۇلدە باسقا.
ءمۇسىننىڭ اۆتورى – جيۋل پاۋەر. ونىڭ بۇل ەڭبەگى سوعىس ۋاقىتىندا وققا ۇشقان حولوكوست قۇرباندارىن ەسكە تۇسىرەدى. 1944-1945 جىلدارى ۆەنگريا ناتسيستىك پارتياسىنىڭ مۇشەلەرى دۋناي جاعاسىندا بىرنەشە مىڭ ادامدى اتۋ جازاسىنا كەسكەن. اتىلار الدىندا تۇتقىنداردىڭ اياق-كيىمىن شەشۋ تالاپ ەتىلىپتى. سونداي-اق وقتى ۇنەمدەۋ ءۇشىن 50-60 ادامدى ءبىر-بىرىنە بايلاپ اتقان. 2005 جىلى قۇربان بولعانداردى ەسكە الۋ ءۇشىن وزەن جاعاسىندا 60 جۇپ تەمىر اياقكيىم ورناتىلدى. قۇربانداردى ەسكە الۋ ءۇشىن جىل سايىن مۇندا مىڭداعان تۋريستەر كەلىپ, سۋرەتكە ءتۇسىپ جاتادى.
