فوتو: Polisia.kz
الماتى قالاسىنىڭ كوشى-قون قىزمەتى بيىل قالاعا 23 مىڭعا جۋىق شەتەل ازاماتى كەلگەنىن حابارلادى.
«الماتى – ينفراقۇرىلىمى دامىعان, وزىندىك مادەنيەتى بار شاھار, سوندىقتان الىس جانە جاقىن ەلدەردەن كەلگەن ادامداردىڭ قىزىعۋشىلىعىن تەز وياتادى. كوشى-قون اعىنى جىل سايىن ارتىپ كەلەدى. بۇل ەكونوميكاعا وڭ اسەرىن تيگىزسە, قىلمىستىق جاعدايعا كەرى اسەرىن تيگىزىپ جاتىر. دالىرەك ايتقاندا, قۇقىق بۇزۋشىلىق سانى ءوسىپ جاتىر. اۋىر قىلمىستار دا تىركەلەدى. ماسەلەن, الماتىنىڭ تۇركسىب اۋدانىندا شەتەل ازاماتى ءوزىنىڭ تانىسىن ولتىرگەن. ال مەدەۋ اۋدانىندا ءۇندىستان مەن پاكىستاننىڭ ەكى ازاماتى سينتەتيكالىق ەسىرتكى وندىرەتىن زەرتحانا ۇيىمداستىرعان. ال شەتەلدىك ستۋدەنتتەر كوشەدە ءجيى توبەلەسىپ جاتادى», دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ.
ونىڭ ايتۋىنشا, الماتىدا قازاقستان رەسپۋبليكاسىنىڭ كوشى-قون زاڭناماسىن بۇزۋ فاكتىلەرىن انىقتاۋ بويىنشا ءىس-شارالار تۇراقتى تۇردە جۇرگىزىلەدى. جىل باسىنان بەرى قازاقستاننىڭ كوشى-قون زاڭناماسىن بۇزعانى ءۇشىن سەگىز مىڭنان استام ادام اكىمشىلىك جاۋاپكەرشىلىككە تارتىلسا, ونىڭ ءتورت مىڭعا جۋىعى - شەتەل ازاماتتارى. ناتيجەسىندە, سوت شەشىمىمەن 682 شەتەلدىك قازاقستان اۋماعىنان شىعارىلدى.
قىرمىزى جۇماعاليقىزى,
ەۇۋ ستۋدەنتى
