«قازسۋشار» رمك يندەر وندىرىستىك ۋچاسكەسىنىڭ باسشىسى سايلاۋ بايبوسىنوۆتىڭ ايتۋىنا قاراعاندا, 105 شاقىرىمدىق باعىرلاي كانالى باتىس قازاقستان وبلىسىمەن شەكارادا ورنالاسقان.
«يندەر اۋدانىندا ءتورت سۋارۋ-سۋلاندىرۋ كانالى بار. بۇل – اقساي, باعىرلاي, العاباس-جورىق, قۇرايلىساي كانالدارى. ءتورت كانالدىڭ جالپى ۇزىندىعى 302 شاقىرىمدى قۇرايدى. ونىڭ ىشىندە ەڭ ۇزىنى سانالاتىن باعىرلاي كانالىنىڭ ستراتەگيالىق ماڭىزى بار. ويتكەنى, بۇل كانال اتىراۋ مەن باتىس قازاقستان وبلىستارىنىڭ شەكاراسىمەن وتەدى. 1994 جىلعى سۋ تاسقىنى كەزىندە باعىرلاي كانالىنا كوپ مولشەردە سۋ كەلگەن ەدى. قازىر باتىس قازاقستان وبلىسىنىڭ اۋماعىنان اتالعان كانالعا مول سۋ كەلىپ تۇر», دەيدى سايلاۋ بايبوسىنوۆ.
