اtpress.kz پاراقشاسىندا جازىلعانداي, 1996 جىلى كۇزدە اسكەرگە كەتىپ, ورالماعان اتىراۋ وبلىسىنىڭ قىزىلقوعا اۋدانىنا قاراستى جاسقايرات اۋىلىنىڭ 1977 جىلى تۋعان تۇرعىنى بەيبىت قوزىباەۆ 28 جىلدان كەيىن امان-ەسەن تابىلعان.
مالىمەتكە سۇيەنسەك, قارت انا مارجان قوزىباەۆا ۇلىنىڭ ءتىرى ەكەنىنەن ەش ءۇمىتىن ۇزبەي, جىلدار بويى توزدىرماعان تابالدىرىعى, قاقپاعان ەسىگى قالماپتى.
- مارجان اپايدىڭ بۇل كۇنگە دە جەتىپ, تۋعان ۇلىن قۇشاقتاپ, ساعىنىشىن باسقانىن كوزىمىز كوردى. اۋداندىق اسكەري كوميسسارياتىنا كەلىپ, بالاسىن سۇراپ ەگىلگەن انانىڭ تالاي قينالعاننان ەسىنەن تانىپ قالعانىن دا كورگەنبىز. سول كەزدەرى ونى نە دەپ جۇباتارىمىزدى بىلمەي, ءبىز دە قينالىپ قالۋشى ەدىك. بۇگىن, مىنە, 28 جىلدان كەيىن باۋىر ەتى – بالاسىمەن قاۋىشقان انا ءۇشىن ءبىزدىڭ دە كوڭىلىمىز جاي تاپقانداي بولدى, - دەيدى قىزىلقوعا اۋداندىق ءماسليحاتىنىڭ دەپۋتاتى, قورعانىس سالاسىنىڭ ارداگەرى ەسەنباي نۇروۆ.
بەيبىت قوزىباەۆتىڭ قالايشا جوعالعانى, نە ءۇشىن وسى ۋاقىتقا دەيىن ورالماعانى جازىلماعان. الايدا 2013 جىلى Lada.kz ول تۋرالى شاعىن جاڭالىق جاريالاعان.
- 16 جىل بۇرىن اقتاۋ بولىمىنەن قاشىپ كەتكەن ساربازدى اسكەري پوليتسيا ءالى دە ىزدەپ جاتىر. ۇقك اقتاۋ گارنيزونى بويىنشا اسكەري پوليتسيا باسقارماسىندا حابارلاعانداي, ۆەدومستۆو قر قك-ءنىڭ 372-بابى بويىنشا قىلمىس جاساعانى ءۇشىن ء("بولىمدى ءوز ەركىمەن تاستاپ كەتۋ") 10070 اسكەري ءبولىمى مەرزىمدى قىزمەتىنىڭ اسكەري قىزمەتشىسى, 1977 جىلى تۋعان ماتروس قوزىباەۆ بەيبىت التاي ۇلىن ىزدەۋدە. سارباز – اتىراۋ وبلىسى قىزىلقوعا اۋدانى جاسقايرات اۋىلىنىڭ تۋماسى. ول 1997 جىلدىڭ 9 قىركۇيەگىندە جوعالعان. وسى ۋاقىتقا دەيىن ورنالاسقان جەرىن انىقتاۋ مۇمكىن بولمادى. قازىر قوزىباەۆ مەملەكەتارالىق ىزدەۋدە, وعان قاتىستى "قاماۋعا الۋ" بۇلتارتپاۋ شاراسى كوزدەلگەن, - دەلىنگەن ماتەريالدا.
