قوس بوكسشىنىڭ قۋانىشى

جاقىندا قازاقستان ۇلتتىق قۇراما كومانداسىنىڭ كاپيتانى دانيار ەلەۋسىنوۆكە «سپورت» اتالىمى بويىنشا «دارىن» مەم­لە­كەتتىك جاستار سىيلىعى تاپسىرىل­دى. بۇل ەلەۋسىنوۆكە عانا ەمەس, جال­پى بارلىق بىلعارى قولعاپ شەبەر­لەرىمىزدىڭ ەڭبەگىن ەسكەرىپ, سولارعا دا بەرىلگەن اتاق دەۋگە بولادى. «دارىن» سىيلىعى حالىق اراسىندا ەڭبەگىمەن كوزگە ءتۇسىپ, ءوز سالالارىندا جاقسى جۇمىس ىستەپ, ەلگە قىزمەت كورسەتكەن جاستارعا تاپسىرىلاتىنى بەلگىلى. بىلتىرعى «دارىن» سىيلىعى «سپورت» اتالىمىندا جارىستاردا ەل نامىسىن قورعاپ, قۇرمەت تۇعىرىنا كوتەرىلىپ جۇرگەن باسقا وتانداستارىمىزعا ەمەس, دانيار ەلەۋسىنوۆكە عانا بەرىلگەنى تەگىن ەمەس. ويتكەنى, ول 69 كيلو سالماقتاعى وليمپيادا چەمپيوندارى باقتيار ارتاەۆ, باقىت سارسەكباەۆ, سەرىك ساپيەۆتەردىڭ جولىن جالعاستىرۋشى بولىپ سانالادى. دانيار ەلەۋسىنوۆ 2012 جىلى 64 كيلو سالماقتا XXX جازعى وليمپيادا ويىندارىنا قاتىسسا, ودان كەيىنگى جارىستاردا 69 كيلودا باعىن سىناي باستادى. وسى سالماقتا ول 2013 جىلى الماتىدا وتكەن الەم چەمپيوناتىن جەڭىپ السا, بىلتىر تۇڭعىش رەت قازاقستان بوكسى تاريحىندا ەكى دۇركىن ازيادا چەمپيونى اتاندى. بۇدان باسقا ازيا چەمپيونى اتاعىن دا جەڭىپ العانى بار. ەستەرىڭىزگە سالا كەتسەك, 1996 جىلعى 7 تامىزدا قازاقستان رەس­پۋبليكاسى ۇكىمەتى بەكىتكەن «دارىن» مەملەكەتتىك جاستار سىي­­لىعى العاش رەت 1998 جىلى بەرىل­دى. سىيلىق 35 جاسقا دەيىن­گى ەل ازا­ماتتارىنا عىلىمي, شىعار­ما­شىلىق جانە قوعامدىق قىز­مەت­تەرى ءۇشىن تاپسىرىلادى. سىي­لىق تالانتتى جاستاردى ىنتالاندىرۋ جانە ولاردىڭ سىڭىرگەن ەڭبەگىن باعالاۋ ماقساتىندا ەكى جىلدا ءبىر رەت بەرىلەدى. بىلتىر جىل سوڭىندا سپورت­تىق جەكپە-جەكتەر جانە كۇش قولدانىلاتىن سپورت تۇرلەرى كونفەدەراتسياسى پورتالى www.confederation.kz وتاندىق باق جانە ماماندار اراسىندا 2014 جىلعى ۇزدىك بوكسشىنى انىقتاۋ ماقساتىندا ساۋالداما جۇرگىزگەن بولاتىن. سونىڭ ناتيجەسىندە ەلىمىزدەگى تالانتتى جاستارىمىز­دىڭ ءبىرى جانىبەك ءالىمحان ۇلى «جىل­دىڭ ۇزدىك بوكسشىسى» اتاندى. جانىبەك 2013 جىلى الەم جانە ازيا چەمپيونى بولسا, بىلتىر ءحVىى جازعى ازيا ويىندارىن جەڭىپ الدى. الماتى وبلىسىنىڭ جىلاندى اۋىلىنىڭ تۋماسى 21 جاستاعى جانىبەك ءالىمحان ۇلى كورەيانىڭ ينچحون قالاسىندا وتكەن سىندا ءوزىن بارلىق قىرىنان كورسەتىپ, بوكس ماماندارىنان جوعارى باعا الىپ قايتتى. ءسويتىپ, ول ازيادا الدىندا الماتىدا وتكەن قازاق­ستان چەمپيوناتىندا ءبىرىنشى ورىن­دى جەڭىپ العانى كەزدەيسوق ەمەس ­ەكە­نىن دالەلدەدى. ەندى ج.ءالىمحان ۇلى 2016 جىلى ريو-دە-جانەيرودا جالاۋى جەلبىرەيتىن وليمپياداعا قاتىسۋدى باستى ماقسات ەتىپ وتىر. «برازيلياعا بارسام, بۇل مەنىڭ العاشقى وليمپيادام بولادى. سوندا ەلىمىزدىڭ نامىسىن قورعاپ, ەلىمىزگە مۇحيتتىڭ ار جاعىنان ۇلكەن قۋانىشىمدى ارقالاپ اكەلەمىن», دەيدى ول. جالپى, 2014 جىل بوكسشى­­لارىمىز ءۇشىن تابىستى ءوتتى. بىلتىر ەلىمىزدىڭ ءنومىرى ءبىرىنشى قۇ­رامىنىڭ بوكسشىلارى كورەيا­نىڭ ينچحون قالاسىندا وتكەن جازعى ازيا ويىندارىندا التى التىن مەدال الىپ, تاريحتا بۇرىن-سوڭدى بولماعان جەتىس­تىككە جەتتى. ودان باسقا دا كوپتە­گەن ۇلكەن حالىقارالىق تۋرنيرلەر مەن جارىستارعا قاتىسىپ, اسپان ءتۇستى تۋىمىزدى جەلبىرەتتى. مۇندا قازاقستاننىڭ ۇلتتىق قۇراما­سىمەن بىرگە ءنومىرى ەكىنشى, ءۇشىنشى بوكسشىلارىمىزدىڭ, سولاردى جاتتىقتىراتىن مامانداردىڭ ەڭبەكتەرى بار. داستان كەنجالين, «ەگەمەن قازاقستان».